Bied die uitdagings van moederskap die hoof

Aangesien kinders die toekomstige geslag verteenwoordig, verdien die vrouens wat hulle opvoed, hulle moeders, beslis respek, eer en ondersteuning. Al stuur die hedendaagse wêreld teenstrydige boodskappe oor moederskap uit, bevestig die Bybel dat kinders ’n seën van God af is en vir ouers ’n bron van geluk kan wees (Psalm 127:3-5). Tog sien die Skrif nie die werklikhede van moederskap oor die hoof nie. Die Bybel meld baie van die uitdagings daarvan.

Die besluite wat ouers oor ouerskap en moederskap neem, het ’n groot en blywende invloed op die lewe en persoonlikheid van hulle kinders. Hierdie besluite kan groot veranderinge in die ouers se lewenstyl meebring, en daarom moet dit versigtig geneem word. Hulle moet vrae oorweeg soos: Moet ’n moeder weg van die huis af werk? Indien wel, voltyds of deeltyds? Wie sal die kinders versorg terwyl die moeder by die werk is? Op die ou end moet ouers doen wat hulle meen die beste vir hulle kinders is en ook wat reg is in God se oë.

Moeders hoef egter nie te voel dat hulle alleen is in die stryd om wyse besluite te neem nie. Hulle kan groot vertroosting put uit die woorde van Jesaja 40:11, wat toon dat God baie belangstel in die behoeftes van moeders met jong babas, wat hy ‘met sorg sal lei’. God openbaar sy opregte belangstelling deur verskeie riglyne in die Bybel te voorsien wat moederskap genotvol en suksesvol kan maak.

❖ Wees redelik: Christene moet bekend wees vir hulle redelikheid (Filippense 4:5). Janet Penley, ’n skryfster en moeder, het die waarde van hierdie beginsel geleer. “Ek het moederskap met die hoogste verwagtinge begin”, sê sy. “Ek wou die beste moeder wees wat daar nog ooit was. Ek het al die boeke gelees en na al die deskundiges geluister. Maar in plaas van suksesvol en bekwaam te voel, het ek op die ou end onbevoeg en baie gespanne gevoel.” Sy sê dat “dit tot mismoedigheid, bekommernis en skuldgevoelens lei as ’n mens aan ander se verwagtinge probeer beantwoord en aan die een of ander ‘volmaakte’ standaard probeer voldoen”.

❖ Vereenvoudig: “In hierdie dolle gejaag loop gesinne gevaar om die unieke ondervinding van kindwees en die vreugde van die gesinslewe te verloor”, het die tydskrif Newsweek geskryf. Daarom smag baie moeders na ’n eenvoudiger lewe. Hoe kan jy jou lewe vereenvoudig? Eerstens moet jy prioriteite stel en aandag gee aan “die belangriker dinge”, met inbegrip van die tyd en persoonlike sorg wat jou kinders nodig het (Filippense 1:10, 11). Tweedens moet jy jou lewenstyl noukeurig ondersoek. Jy sal dalk bedrywighede en besittings moet prysgee wat nie werklik nodig is nie.

Wat is die belangrikste in jou lewe? Is dit om alles dadelik te hê, of kan party doelwitte uitgestel word terwyl jy ander nastreef? Carolyn, ’n moeder met beperkte lewensmiddele, vertel hoe sy die mas opkom: “Ek hou dinge eenvoudig en besnoei uitgawes.” Gloria, ’n moeder van drie, sê: “Ons het nie geld vir ontwerpersklere gehad nie, maar ek het vir die kinders klere gemaak en vir hulle gesê dat dit spesiaal is omdat niemand anders sulke klere het nie.”

God se Woord sê dat iemand wat ‘onderskeidingsvermoë bewaak, die goeie gaan vind’ (Spreuke 19:8). Onderskeidingsvermoë is nodig om te bepaal watter van die eindelose verskeidenheid ontspanningsbedrywighede, toestelle en tendense waardeur moeders en kinders oorweldig word, werklik nut het. Judith, ’n moeder in Suid-Afrika, sê: “Ons word gedurig aan nuwe produkte, beter tegnologie en meer dienste blootgestel!” Angela, ’n moeder van vier in Duitsland, sê hoe sy dié uitdaging die hoof bied: “Jy moet besluit wat vir jou noodsaaklik en nuttig is en jou kinders help om dieselfde te doen.”

❖ Bring die veranderinge aan wat moontlik is: “Gebruik gesonde verstand en goeie oordeel”, vermaan die Bybel ons (Spreuke 3:21, Contemporary English Version). As jy op die oomblik weg van die huis af werk, kan jy jou afvra: Kan my gesin net van my man se inkomste leef? Om hierdie vraag te help beantwoord, moet jy uitwerk hoeveel van jou salaris jy in werklikheid huis toe bring nadat belasting, kindersorg, vervoerkoste, klere, etes in restaurante en ander uitgawes afgetrek is. Jou man se inkomste word moontlik ook teen ’n hoër tarief belas as julle gesamentlike inkomste julle in ’n hoër inkomstegroep plaas. Jy sal dalk verbaas wees om te sien hoe min oorbly.

Party werk minder ure of nader aan die huis, wat moontlik beteken dat hulle minder geld kry, maar meer tyd saam met die kinders kan deurbring. As jy besluit om op te hou werk en as jou werk vir jou belangrik was omdat dit jou ’n gevoel van eiewaarde gegee het en jou laat voel het dat jy iets bereik, moet jy dink oor wat jy kan doen om nog so te voel terwyl jy by die huis bly.

❖ Kry hulp: God se Woord toon herhaaldelik dat ’n “hulpgeroep” beantwoord kan word (Eksodus 2:23, 24; Psalm 34:15). ’n Moeder se hulpgeroep moet haar man beweeg om te help. Met sy samewerking sal julle dalk ’n stelsel kan uitwerk waarvolgens julle die huiswerk deel sodat julle die tyd het om die doelwitte te bereik wat julle saam gestel het—soos om daar te wees vir julle kinders. Indien moontlik moet ’n moeder ook ’n ondersteuningsnetwerk opbou van mense, onder meer familielede en betroubare vriende, wat dieselfde belangstellings en doelwitte as sy het.

Baie moeders kry waardevolle ondersteuning van hulle medegelowiges in die plaaslike Christengemeente. María, ’n moeder van drie, het besef dat “’n hegte band met die gemeente” een van die maniere is waarop “God liefde en medelye aan ons betoon en vir ons wys dat hy oor ons besorg is”.

❖ Maak tyd vir ontspanning: Selfs Jesus, ’n volmaakte mens met groot uithouvermoë, het sy dissipels genooi om ‘alleen na ’n eensame plek te gaan en ’n bietjie te rus’ (Markus 6:30-32). Jou sukses as ’n moeder hang af van jou vermoë om deur moeilike tye heen gebalanseerd te bly. Dit is waar dat jou kinders jou nodig het, maar dit is ook vir hulle belangrik dat jy gelukkig en tevrede moet wees. Jy het redelike ontspanning nodig.

Angela, wat vroeër genoem is, het ’n plan vir ontspanning: “Ek sit in die oggend stiltetyd opsy. Ek neem minstens ’n halfuur vir myself. En ek en my man het een of twee aande per week wanneer ons van die kinders verwag om na ’n ander plek in die huis te gaan en hulle daar stil besig te hou. Sodoende kan ons ’n uur vir onsself hê.”

❖ Stel geestelikheid eerste: Daar is al gesien dat die uitdagings van moederskap groter word wanneer ’n moeder nie doelgerig is en prioriteite stel nie. Christengesinne is gelukkig wanneer hulle saamwerk om God se wil eerste in hulle lewe te stel. Die apostel Paulus het geskryf: “Godvrugtige toegewydheid is voordelig vir alles, aangesien dit belofte inhou vir die teenswoordige en die toekomstige lewe” (1 Timoteus 4:8). ’n Gesin wat met godvrugtige toegewydheid lewe en God se riglyne volg soos dit in die Bybel vervat is, sal gelukkig wees. Al pas net een gesinslid Bybelbeginsels toe, gaan dinge beter as wanneer nie een dit doen nie.

Adele, ’n Christenmoeder wat voltyds werk, het gesien watter voordele dit inhou om geestelikgesind te wees. Sy sê: “Ons het baie riglyne en inligting in die Bybelpublikasies wat ons leer waarmee ons kinders te kampe het en hoe ons hulle kan help. As jy sien dat jou kinders reageer op die geestelike opvoeding wat jy hulle gee, is dit alles die moeite werd. Wanneer jy geringe verbeteringe in hulle gedrag en denkwyse sien, besef jy dat hulle inneem wat jy hulle leer en dat jou pogings vrugte afwerp.”a

Ja, dit is moontlik om die uitdagings van moederskap met welslae die hoof te bied. God self gee ons die bemoedigende versekering dat die pogings van vlytige en selfopofferende moeders wat op hom vertrou, nie tevergeefs sal wees nie. Moeders wat ’n persoonlike verhouding met hom aankweek, kan vertroosting put uit sy belofte om ‘die vermoeide krag te gee’.—Jesaja 40:29.

[Voetnoot]

[Venster op bladsy 10]

’n Moeder se invloed

As ’n moeder wonder jy dalk soms hoe groot jou invloed op jou kind se lewe is. Partykeer lyk dit miskien of maats, onderwysers, vermaak, videospeletjies en musiek ’n groter invloed as jy het.

Dink byvoorbeeld aan Jogebed, die moeder van Moses. Sy het in baie moeilike tye gelewe en beperkte seggenskap gehad oor wat met haar seun sou gebeur. Maar sy het die geleenthede wat sy gehad het, gebruik om sy karakter te vorm. Eerstens het sy moedige geloof aan die dag gelê deur nie toe te laat dat Moses doodgemaak word nie. God het haar geloof beloon deur nie net die baba se lewe te spaar nie, maar sake ook so te reël dat Jogebed sy soogvrou—en moeder—kon wees.—Eksodus 1:15, 16; 2:1-10.

Dit ly geen twyfel dat Jogebed haar seun se persoonlikheid help vorm het nie. Die feit dat die volwasse man Moses hom met die Hebreërs en hulle God vereenselwig het ondanks sy koninklike bande in Egipte, is ’n bewys van sy ouers se invloed gedurende sy vormingsjare.—Hebreërs 11:24-26.

As ’n moeder het jy waarskynlik meer geleenthede as Jogebed om ’n invloed op jou kind te hê. Benut jy die paar kort jare van jou kind se kinderjare om blywende, Goddelike onderrigting te voorsien? Of laat jy toe dat die algemene kultuur die grootste invloed op jou kind se ontwikkeling het?

[Prente op bladsy 10]

Laat ander jou met die huiswerk help, sit tyd opsy vir jouself en stel geestelikheid eerste