Die wetenskap en godsdiens—Die konflik

“Word godsdiens die beste beskryf as ’n aansteeklike siekte van die verstand?”—Bioloog Richard Dawkins.

MENSE neem soms aan dat godsdiens en die wetenskap aartsvyande is. Vir party lyk dit of hulle in so ’n groot stryd gewikkel is dat die een skynbaar slegs deur die ander se ondergang sal seëvier.

In die een kamp is party wetenskaplikes, soos die skeikundige Peter Atkins, wat meen dat dit “onmoontlik” is om godsdiens en die wetenskap te versoen. Atkins sê dat dit intellektueel veragtelik is om te glo “dat God ’n verduideliking (van enigiets, wat nog te sê van alles) is”.

In ’n ander kamp is godsdienstige mense wat die wetenskap die skuld gee vir die vernietiging van geloof. Sulke persone is van mening dat die wetenskap, soos dit vandag beoefen word, ’n bedrogspul is; die feite waarmee dit vorendag kom, is dalk korrek, maar die verkeerde vertolking van daardie feite ondermyn die oortuigings van die gelowiges. Die bioloog William Provine sê byvoorbeeld dat Darwinisme te kenne gee dat daar “geen absolute grondslag vir sedelike norme is nie; geen absolute sin in die lewe nie”.

Maar sommige van die konflikte het ontstaan omdat albei kante valse of onbewysbare bewerings gemaak het. Godsdiensleiers het eeue lank mitiese legendes en dwaalleringe verkondig wat in stryd is met hedendaagse wetenskaplike bevindings en nie op die geïnspireerde Skrif gebaseer is nie. Die Rooms-Katolieke Kerk het Galileo byvoorbeeld veroordeel omdat hy tereg die gevolgtrekking gemaak het dat die aarde om die son draai. Galileo se sienswyse het geensins die Bybel weerspreek nie, maar dit was in stryd met wat die kerk destyds geleer het. Aan die ander kant, wanneer wetenskaplikes die onbewysbare teorie dat lewe sonder die toedoen van God uit lewelose materie geëvolueer het, as ’n feit voorhou, maak hulle ’n fout. Hulle spot en sê dat geloof in God onwetenskaplik is.

Is dit dan moontlik om die wetenskap en godsdiens te versoen? Ja, dit is. Trouens, die bewese wetenskap en ware godsdiens weerspreek mekaar nie, maar vul mekaar aan.

[Prent op bladsy 2, 3]

Galileo het wetenskaplike waarheid geleer, waarvoor hy deur die kerk veroordeel is