“Kangaroe-moedersorg”—’n Oplossing vir ’n lewensgevaarlike probleem?

Omdat die sterftesyfer onder vroeggebore babas in ’n hospitaal in Bogota, Colombia, ontstellend hoog was, het ’n Colombiaanse dokter in 1979 met ’n ongewone oplossing vorendag gekom—“kangaroe-moedersorg”.

Dit is vir dokters ’n uitdaging om vroeggebore babas aan die lewe te hou. Babas wat by geboorte te min weeg, word dikwels in die warmte van ’n broeikas gesit, waar hulle bly totdat hulle gewig aansit. Maar in ontwikkelende lande het oorvol fasiliteite, onhigiëniese toestande en ’n tekort aan mediese personeel en toerusting dikwels gevaarlike kruisinfeksies tot gevolg.

’n Dokter in Colombia het met ’n metode vorendag gekom wat lyk of dit ’n oplossing vir hierdie probleem kan wees. Hoe werk dit? Wanneer ’n baba vroeg gebore word, word hy op die gewone manier behandel totdat sy toestand stabiliseer. Intussen word die moeder geleer hoe om haar kind te versorg. Wanneer die baba gesond genoeg is, word die moeder ’n lewende broeikas. Hoe? Deur haar baba teenaan haar te hou, vertikaal tussen haar borste toegedraai. Veilig in sy “kangaroe-sak” bly die baba warm en kan daar maklik vir hom sy moeder se melk gegee word. Daarom word die metode dikwels kangaroe-moedersorg genoem.

Geen duur toerusting is nodig nie. Die moeder dra ’n gepaste bloes of ’n gewone rok met ’n band om die middel. Wanneer die baba genoeg gewig aangesit het, kan die moeder en baba huis toe gaan. Hulle moet egter gereeld teruggaan hospitaal toe vir ondersoeke.

Voorlopige navorsing dui daarop dat kangaroe-moedersorg doeltreffend en veilig is. Daarbenewens lyk dit of daar dan ’n hegter band tussen die baba en die moeder ontwikkel. Dit is nie verbasend dat ’n vorm van hierdie metode in baie lande gebruik word nie. In Mexiko word familielede as “kangaroe-vaders”, “kangaroe-oumas” en selfs “kangaroe-susters” opgelei sodat hulle kan help wanneer die moeder ’n welverdiende blaaskansie nodig het. Dr. Guadalupe Santos, wat in beheer is van ’n kangaroe-moedersorgprogram in Mexiko, het aan Ontwaak! gesê: “Ons gebruik hierdie metode al van 1992 af en het gesien hoe doeltreffend dit is. Minder broeikaste en baie minder tyd in die hospitaal is nodig.”