Hoër liggaamstemperatuur verminder risiko van infeksie

DAAR BESTAAN ALTYD DIE MOONTLIKHEID VAN ’N wondinfeksie ná ’n operasie. Maar “die risiko van infeksie kan met meer as 60 persent verminder word as pasiënte se liggaamstemperatuur voor roetine-operasies verhoog word”, berig The Times van Londen.

Navorsers by die Universiteitshospitaal van North Tees, Engeland, het meer as 400 pasiënte in drie groepe verdeel kort voordat hulle bors-, spataar- en breukoperasies sou ondergaan. Een groep se liggaamstemperatuur is nie verhoog nie, en die ander twee groepe se liggaamstemperatuur of die temperatuur van die liggaamsdeel wat geopereer sou word, is ten minste ’n halfuur voor die operasie, verhoog. Wat was die resultaat?

Ná die operasies het slegs 5 persent van die pasiënte wie se liggaamstemperatuur verhoog is, wondinfeksies gehad, in vergelyking met 14 persent van dié wie se liggaamstemperatuur nie verhoog is nie. Dit is opmerkenswaardig dat hierdie metode die infeksiesyfer verminder het onder pasiënte wat kolorektale operasies ondergaan het.