Syfers en jy

HET syfers verskuilde betekenis? “Natuurlik!” sê sommige en verwys dan na ’n interessante voorbeeld—die terreuraanval op 11 September 2001.

“Toe ek die nuus hoor”, sê ’n numeroloog, “het die datum: 11-9-2001 my onmiddellik opgeval.” Die syfer 11 word oor die algemeen onder numeroloë as een van die “meestersyfers” beskou. Numeroloë het dus ’n lys van verskillende items opgestel wat met die terreuraanval verband hou en op die “meestersyfer” 11 dui. Hier is net ’n paar voorbeelde van wat hulle gevind het:

▪ Die tragedie het op 11/9 plaasgevind. . . . 1 + 1 + 9 = 11.

▪ 11 September was die 254ste dag van die jaar. . . . 2 + 5 + 4 = 11.

▪ Die vliegtuig wat die noordelike toring getref het, was Vlug 11.

▪ Daardie vliegtuig het 92 mense aan boord gehad. . . . 9 + 2 = 11.

▪ Die vliegtuig wat die suidelike toring getref het, het 65 passasiers gehad. . . . 6 + 5 = 11.

▪ Die Tweelingtorings het soos die syfer 11 gelyk.

▪ In Engels het die naam “New York-stad” 11 letters.

Numerologie—waarin spesiale betekenis geheg word aan syfers, kombinasies daarvan en numeriese totale—is ’n baie algemene gebruik in Afrika, Asië en die Amerikas. Waarom het dit soveel aantrekkingskrag? Volgens een webwerf verskaf die ontsyfering van die letters van die alfabet wat in name gebruik word—een gewilde aspek van numerologie—“akkurate inligting oor mense se persoonlikheid, geaardheid, eienskappe en tekortkominge”. Volgens hierdie bron ontsluier ’n studie van ons “geboortedatum ons lewensweg, met al sy vreugdes en beproewinge”.

Is hierdie bewering waar? Of is daar dalk verskuilde gevare in die metafisiese studie van syfers?