Moet jy syfers raadpleeg vir leiding?
KAN numerologie met die wetenskap en rede versoen word? Is syfers die middel waardeur ons lot geopenbaar kan word? Moet jy jou toekoms om numerologiese bevindings en voorspellings bou?
Een beswaar wat numeroloë nie kan oorkom nie, is die feit dat verskillende kulture verskillende kalenders gebruik. Sê nou byvoorbeeld iemand woon waar die Chinese kalender gebruik word? Dink aan die datum wat in die eerste artikel genoem is—11 September 2001. Volgens die Chinese kalender was dit die 24ste dag van die 7de maand van die 18de jaar van die 78ste siklus. Op die Juliaanse kalender sou dieselfde datum 29 Augustus 2001 wees. Volgens die Moslems se kalender was dit 22 Joemada II 1422, terwyl dit 23 Elul 5761 op die Hebreeuse kalender was. Hoe kan ’n datum wat op soveel verskillende maniere weergegee word, numeriese betekenis hê? Nog ’n faktor: Tale het dikwels unieke spelwyses vir name. Byvoorbeeld, die letters in die Engelse naam John het ’n numerologiese waarde van 2, maar die letters in die Spaanse spelling van dieselfde naam—Juan—het ’n waarde van 1.
Dit is een ding om te erken dat baie aspekte van die heelal deur middel van wiskundige formules verklaar kan word. Hierdie formules kan getoets en bewys word. Maar dit is iets heeltemal anders om te beweer dat jou naam voorbeskik is om by jou geboortedatum te pas en om met sekere syfers verbind te word sodat jy jou lot kan bepaal.
Die gevolgtrekking is duidelik: Om te glo dat numerologiese interpretasies akkuraat is wanneer dit op faktore soos kalenders en tale gebaseer is, wat elkeen uiters uiteenlopend is, is om die perke van geloofwaardigheid tot die uiterste te strek.
“Tyd en onvoorsiene gebeurtenisse”
Sommige begin in numerologie belangstel omdat hulle hulle lewe voorspelbaar wil maak. Maar die Bybel toon duidelik dat die manier waarop ’n mens se lewe gaan ontvou, nie vooruit bepaal kan word nie. Ons lees: ‘Die vinniges het nie die wedloop nie en die sterkes ook nie die geveg nie, en die wyses ook nie die voedsel nie en dié met begrip ook nie die rykdom nie, en selfs dié wat kennis het, nie die guns nie; want tyd en onvoorsiene gebeurtenisse tref hulle almal’ (Prediker 9:11). Ja, baie dinge vind onverwags plaas. Sulke toevallige gebeurtenisse maak dit onmoontlik om voorspellings op grond van geboortedatums of die numeriese waarde van ’n naam te maak.
Beskou nog ’n voorbeeld: Die Bybel moedig vrygewigheid aan en sê: “Stuur jou brood uit op die oppervlak van die waters, want na verloop van baie dae sal jy dit weer vind. Gee ’n deel aan sewe, of selfs aan agt, want jy weet nie watter rampspoed op die aarde sal plaasvind nie” (Prediker 11:1, 2). In verreweg die meeste gevalle weet mense nie vooraf wanneer rampe gaan plaasvind nie—hulle kan trouens ook nie weet nie. Gevolglik skryf die wiskundeprofessor Underwood Dudley oor numeroloë: “Hulle gee toeval nie genoeg erkenning nie. Ongelooflike dinge kan onvoorsiens gebeur.”
Sommige voorspellings wat deur numeroloë gemaak word, word weliswaar bewaarheid. Hoe kan dit verklaar word? In party gevalle is dit dalk blote toeval. En soms is die numeroloë se verklarings so dubbelsinnig dat dit verskeie toepassings kan hê. Maar daar is iets ernstigers wat ons in ag moet neem.
’n Vorm van waarsêery?
Die woord numerologie kom nie in die Bybel voor nie. Maar dit maak wel melding van Haman, ’n Amalekiet wat gedurende die vyfde eeu v.G.J. die Jode wou uitroei wat in Persië gewoon het. Die verslag sê: “Met die Pur, dit is met die lot, in die teenwoordigheid van Haman [is] beslis om ’n geskikte datum te kry om die Jode uit te roei. Die lot het geval op die twaalfde maand, die maand Adar.” (Ons kursiveer.)—Ester 3:7, Die Bybel, 1983.
Om die lot te werp, was in die ou tyd ’n aanvaarbare manier om ’n geskil op te los (Spreuke 18:18).a Maar toe Haman die lot gewerp het, het hy waarsêery beoefen—iets wat deur die Bybel veroordeel word. Deuteronomium 18:10-12 sê dat God enigiemand haat “wat van waarsêery gebruik maak, die toorkuns beoefen of voortekens soek of wat ’n towenaar is . . . , of wat ’n towerspreuk oor ander uitspreek of ’n geestemedium of ’n beroepsvoorspeller van gebeure om inligting vra . . . Elkeen wat hierdie dinge doen, is vir Jehovah verfoeilik.”
Die Bybel verbind waarsêery en towerkrag met spiritisme. Bose geeste kan gebeure manipuleer om hulle oogmerke te bereik. Of dit in ’n spesifieke geval so is of nie, een ding is seker: Spiritisme word deur God veroordeel, en dit kan ’n mens onder die beheer van bose geeste bring.—1 Samuel 15:23; Efesiërs 6:12.
Numerologie het geen wetenskaplike grondslag nie, en dit skiet te kort wanneer dit in die lig van rede ondersoek word. Nog belangriker, omdat numerologie ’n vorm van waarsêery is, is dit in stryd met Bybelleringe. Gevolglik is dit nie verstandig om numerologie te gebruik om jou lewe te rig of jou toekoms te beplan nie.
[Voetnoot]
a Wanneer die lot gewerp is, is klein voorwerpe—soos klippies of stukkies hout—in die voue van ’n kledingstuk of in ’n vaas gesit. Daarna is dit geskud. Die een wie se lot getrek is, is die een wat gekies is.
[Venster op bladsy 6]
DIE VERSKILLENDE KALENDERS SKEP ERNSTIGE PROBLEME VIR NUMEROLOGIE
GREGORIAANS 11 September 2001
CHINEES 24ste dag van die 7de maand van die 18de jaar
van die 78ste siklus
JULIAANS 29 Augustus 2001
MOSLEM 22 Joemada II 1422
HEBREEUS 23 Elul 5761
[Venster/Prente op bladsy 7]
IS HOROSKOPE BETROUBAAR?
“Soms is jy uitgaande, maar op ander tye is jy teruggetrokke. Jy voel dat dit onverstandig is om te veel omtrent jouself aan vreemdelinge te openbaar. Jy is ’n onafhanklike denker wat bewyse soek en nie net sake goedgelowig aanvaar nie. Jy hou van verskeidenheid in die lewe, en dit maak jou ongelukkig wanneer jy deur reëls ingeperk word. Jy het baie potensiaal, wat jy nog nie ten volle benut het nie. Jy is geneig om krities oor jou werk en vermoëns te wees.”
Klink dit soos jy? Indien wel, heg jy dalk groter waarde aan die beskrywing as wat dit verdien. Die meeste van wat hierbo gesê word, is per slot van rekening waar van die meerderheid mense. Lesers sal dus geneig wees om die stellings te aanvaar wat hulle dink akkuraat is en die res te ignoreer. Die boek Why Do Buses Come in Threes—The Hidden Mathematics of Everyday Life sê: “As die sterretekens op ’n horoskoop verwyder word, het navorsers gevind dat mense nie kan identifiseer watter paragraaf by hulle teken pas nie, maar as die tekens ingesluit word, sal hulle glo dat hulle horoskopiese beskrywing die akkuraatste is.”
[Venster op bladsy 8]
SIMBOLIESE SYFERS IN DIE BYBEL
Sekere syfers in die Bybel het simboliese betekenisse, maar slegs in die konteks van die Skrifgedeelte waarin dit gebruik word. Die syfer vier word byvoorbeeld gebruik om alomvattendheid of universaliteit aan te dui. Hierdie gedagte word oorgedra in uitdrukkings soos “vier uithoeke van die aarde” en “vier windstreke van die hemel” (Jesaja 11:12; Daniël 8:8). Soms verteenwoordig die syfer ses onvolmaaktheid. Dit is interessant dat die getal wat in die boek Openbaring aan Satan se aardse politieke organisasie gegee word, “’n mens se getal” is—666 (Openbaring 13:18). Hier word ses drie keer herhaal, wat die onvolmaaktheid van daardie dierlike organisasie beklemtoon. Wanneer die syfer sewe simbolies gebruik word, verteenwoordig dit volkomenheid (Levitikus 4:6; Hebreërs 9:24-26). Hierdie en ander simboliese syfers in die Skrif het spesiale betekenis weens hulle gebruik in ’n profetiese konteks.
Hoewel sekere syfers in die Skrif van belang is, moedig die Bybel ons nie aan om die letters van sekere woorde met syfers te verbind om geheime waarhede daarin te probeer vind nie.
[Prent op bladsy 8]
Haman het waarsêery gebruik om ’n datum te kies vir sy moorddadige plan