Betroubare leiding vir die toekoms

BETEKEN die feit dat numerologie en ander vorme van waarsêery onbetroubaar is dat daar geen manier is om uit te vind wat die toekoms inhou nie? Hoegenaamd nie!

Die mens kan nie met behulp van abstrakte syfers uitvind wat die toekoms inhou nie. Maar die “lewende God” wat “van die begin af die uiteinde” bekend maak, het dit al gedoen. Hy doen dit in sy geskrewe Woord, die Bybel (1 Timoteus 4:10; Jesaja 46:10). Dit is ook die woord van die lewende God, nie die woord van numeroloë nie, wat “gedagtes en bedoelings van die hart [kan] onderskei” en jou sodoende kan help om te verstaan wat jou motiewe is en wat jou werklik suksesvol sal maak.—Hebreërs 4:12.

Ons Skepper, die Outeur van die Bybel, is die enigste een wat die toekoms akkuraat kan voorspel. Dit is omdat God almagtig is, en hy het nog altyd sy woord gestand gedoen. “Ek het dit gespreek”, het Jehovah God gesê. “Ek sal dit ook doen” (Jesaja 46:11). Nadat Josua die Israeliete in die Beloofde Land ingelei het, kon hy met vertroue sê: “Geen belofte van al die goeie beloftes wat Jehovah aan die huis van Israel gemaak het, het onvervuld gebly nie; alles is bewaarheid.”—Josua 21:45; 23:14.

Daar is baie profesieë in die Bybel wat nog vervul moet word. Dit voorspel onder meer ’n tyd wanneer die aarde bevry sal word van goddeloosheid en in ’n paradys omskep sal word (Psalm 37:10, 11; Spreuke 2:21, 22). Wil jy graag so ’n toekoms hê? Glo jy dat ons Skepper die wysheid en die krag het om toestande op hierdie planeet reg te stel? Indien wel, moet jy uitvind wat die Bybel oor die aarde se toekoms sê.a

Gebruik dus nou jou tyd wyslik—nie deur syfers te raadpleeg om uit te vind wat jou toekoms inhou nie, maar deur ’n juiste begrip van die Bybel en die profesieë daarin te probeer verkry. Jehovah se Getuies is bereid om jou te help om meer oor die toekoms uit te vind, soos dit in God se Woord, die Bybel, geopenbaar word.

[Voetnoot]