Van ons lesers
Wêreldvrede Die reeks “Is wêreldvrede net ’n droom?” (8 Mei 2002) is uitstekend geskryf. Al die politici moet dit lees. ’n Mens kan baie duidelik uit julle publikasies sien wat jy moet weet en hoe jy moet lewe.
J. S., Tsjeggiese Republiek
’n Jong persoon se inisiatief Ek wou nog altyd vir julle gesê het hoe baie ek die tydskrifte waardeer, en ek het uiteindelik besluit om dit te doen nadat ek die artikel “Haar inisiatief is beloon” (8 Mei 2002) gelees het. Ek het onlangs ’n soortgelyke ondervinding as Stella gehad. Dit maak my hart bly om te weet dat daar wêreldwyd jongmense soos ek is wat Jehovah eerste in hulle lewe stel. Sulke ondervindinge is vir almal, oud en jonk, aanmoedigend.
L. P., Verenigde State
Diere Ek het so pas die artikel “Ontmoet die geheimsinnige sneeuluiperd” (8 Mei 2002) gelees. Ek is lief vir al die diere wat Jehovah geskep het, veral dié wat sag en wollerig is! Dit maak my kwaad om te lees hoe min sneeuluiperds daar nog oor is. Dink net hoe Jehovah moet voel.
D. R., Verenigde State
Hankoel Ek is 13 en het dit geniet om die artikel “Kom ons probeer in Hankoel skryf!” (8 Mei 2002) te lees. Vandat ek leer lees het, stel ek baie belang in ander tale. Ek hoop dat julle in die toekoms nog artikels oor ander tale sal druk!
B. J., Verenigde State
Ek is 11 jaar oud, en wat my verbaas het, is dat Hankoel selfs gebruik kan word om woorde te skryf wat nie Koreaans is nie. Wat julle in die artikel geskryf het, was maklik om te verstaan. Dankie vir die artikel!
J. I., Verenigde State
Spinnekoppe Ek is gefassineer deur die artikel “’n Spinnekop wat hom voordoen as ’n mier” (22 April 2002). Wat ’n wonderlike Skepper is Jehovah tog! Ek sien uit na die lewe in die nuwe wêreld, wanneer ek meer sal kan leer oor die dinge wat hy geskep het.
P. P., Sri Lanka
Gevangeneskepe Ek lees nou al meer as 50 jaar lank julle tydskrifte. Ek het onlangs die artikel “Australië se berugte gevangene-era” (22 April 2002) gelees. Op bladsy 13 sê julle dat die Britse gevangeneskip Amphitrite in 1883 gestrand het. Ek dink dit is ’n fout. Volgens my navorsing het dit eintlik in Augustus 1833 gebeur. Dít val wel in die gevangenetydperk wat in die artikel bespreek word, wat in 1868 geëindig het.
D. B., Skotland
“Ontwaak!” antwoord: Die bron van ons artikel sê wel dat die “Amphitrite” in 1833 gestrand het. Ons vra om verskoning vir die fout.
Jongmense vra Dankie vir die artikel “Jongmense vra . . . Sê nou ek ontmoet een van my skoolmaats?” (22 Februarie 2002). Baie jare gelede was ek ’n uiters skaam tiener met ’n hakkelprobleem. Die bediening was vir my moeilik, veral wanneer ek kinders van ons skool ontmoet het. Ek weet dat hierdie artikel ander jongmense geweldig baie gaan help.
W. T., Verenigde State
Betroubare raad Dankie vir die interessante en leersame leesstof. Julle artikels dek ’n groot verskeidenheid onderwerpe, en anders as baie ander publikasies bly julle tydskrifte onbevooroordeeld en respekteer dit ander se sienings. Die Ontwaak! het ’n goeie en onmisbare vriend geword, ’n bron van betroubare raad wat my help om ’n optimistiese benadering tot die lewe se probleme te hê.
N. P., Brasilië