Van ons lesers
Aanbidding Voordat ek een van Jehovah se Getuies geword het, kon ek nooit verduidelik hoe ek oor God voel nie. Die voorbladartikels “Kan ek God op my eie manier aanbid?” (22 April 2002) verduidelik presies waarom ek aanvanklik gevoel het dat ek die Bybel moet bestudeer. Ek is van plan om aan elke familielid ’n eksemplaar te stuur.
B. R., Verenigde State
Lewensverhaal Ek het trane van vreugde en hartseer gestort terwyl ek die lewensverhaal “My hoop het ondanks beproewinge sterk gebly” (22 April 2002) gelees het. Die moed wat broer Hanák op 20-jarige ouderdom aan die dag gelê het, het my daaraan herinner dat ons op Jehovah kan vertrou om selfs jongmense vasbeslote te maak om Jehovah se regverdige standaarde te handhaaf. Dankie dat julle aanhou om sulke uitstekende artikels te druk wat ons almal die nodige aanmoediging gee gedurende die kritieke tye waarin ons lewe.
K. G., Verenigde State
Jongmense vra Ek is ’n 11-jarige seun en ek wil julle bedank vir die artikel “Jongmense vra . . . Sê nou ek ontmoet een van my skoolmaats?” (22 Februarie 2002). Ek was al in dieselfde situasie as dié van die jongmense in die artikel. Nadat ek dit gelees het, het ek besef dat ek geen rede het om my te skaam vir die kosbare en dringende boodskap wat ons na mense neem nie. Baie dankie vir hierdie inligting.
D.D.S., Italië
Ek is 10 jaar oud. Dankie vir hierdie artikel. Die dag nadat ek dit gelees het, het ek velddiens gedoen en meer op my gemak gevoel omdat ek die tydskrif se raad toegepas het.
D.D.C., Italië
Die artikel “Jongmense vra . . . Waarom is dit vir my so moeilik om verblyf te deel?” (22 April 2002) is net vir my geskryf! Ek is ’n voltydse evangeliedienaar, en ek bly al ses maande saam met my kamermaat. Soos die artikel sê, kan dit interessant wees om saam met iemand te bly wat anders grootgemaak is, maar dit kan ook spanning veroorsaak. Met die hulp van my ouers, die ouer manne en Jehovah het ek stadigaan my beskouing verander. Nou wil ek graag saam met my kamermaat na ’n gemeente verhuis waar daar hulp nodig is. Ek beskou hierdie artikel as ’n geskenk van Jehovah!
I. S., Japan
Die artikel “Jongmense vra . . .Hoe kan ek vir my skoolmaats getuig?” (22 Maart 2002) was vir my baie betekenisvol. Ek onthou hoe ek, ietwat huiwerig, getuig het vir ’n paar skoolmaats en veral vir een vriend wat my oortuigings gerespekteer het. Ek het voeling met hom verloor tot ’n paar jaar gelede toe ek gehoor het dat hy die Bybel saam met Jehovah se Getuies studeer. Vandag is ons albei gemeentelike ouer manne en baie goeie vriende. Soos die artikel getoon het, het dit altyd goeie resultate as ons met ander oor Jehovah praat.
J.R.M., Brasilië
Verligting vir alle ouderdomme Ek geniet werklik julle tydskrifte, want dit is nie net vir my interessant nie, maar ook vir my kinders. Baie koerante en tydskrifte het ’n verderflike invloed op ons jeug. Maar julle laat hulle ten goede verander. Dankie vir die lig wat julle bring.
G. M., Rusland