Wysheid vir die lewe in ’n komplekse wêreld
“God gee wysheid en kennis en vreugde aan die mens wat hom behaag.”—PREDIKER 2:26, THE NEW ENGLISH BIBLE.
DIT is baie moeilik om wyse, sedelik aanvaarbare besluite in ’n wêreld te neem wat medies en tegnologies al hoe komplekser word. Neem byvoorbeeld onlangse kontroversiële verwikkelinge. Vroue kan nou ’n ongewenste swangerskap beëindig deur eenvoudig ’n nabehoedpil te neem. Wetenskaplikes het die “geenwêreld” betree, wat hulle in staat stel om plante en diere te manipuleer. Laboratoriums is in ’n wedloop om menslike embrio’s in die hande te kry sodat hulle die kosbare stamselle kan oes, wat baie mense hoop tot ’n mediese revolusie sal lei.
Sulke pogings om die natuur te manipuleer, maak baie mense ongerus en bang, om nie eers te praat van die sedelike of etiese verwarring wat dit veroorsaak nie. Dit herinner ons aan die Bybel se woorde: “Ek weet goed . . . dat aan die mens sy weg nie behoort nie. Dit behoort nie aan die mens wat loop om sy voetstappe te rig nie” (Jeremia 10:23). Ja, net soos kinders hulle ouers se leiding nodig het, het alle mense die hulp van ons hemelse Vader nodig om in wysheid te wandel.—Spreuke 1:33.
Die wysheid wat van God kom
Ons luister na God deur sy geskrewe Woord te lees en toe te pas. Dit is so dat die Bybel nie spesifiek al die komplekse mediese en wetenskaplike geskille bespreek waarmee ons vandag te kampe het nie. Maar die ewige beginsels daarin, kan ons help om wyse gevolgtrekkings te maak.—1 Petrus 1:25.
Dink byvoorbeeld aan die geskil oor menslike embrionale stamselle. Soos ons gesien het, word dit ten koste van ’n lewende embrio verkry. Francis Collins, die direkteur van die Nasionale Menslike Genoomnavorsingsinstituut in die Verenigde State, het in verband met die etiese dilemma wat dit skep, gesê: “Dit is ’n klassieke voorbeeld van ’n konflik tussen twee uiters belangrike beginsels. Die een is die heiligheid van menselewe en die ander is ons dwingende plig as mense om lyding te verlig en verskriklike siektes te behandel . . . Baie mense voel, en ek dink met goeie rede, dat hierdie soort navorsing die beginsel van die heiligheid van menselewe skend deur selle te manipuleer wat van ’n menslike embrio verkry is.”
Die Bybel help ons met hierdie komplekse kwessie deur te openbaar wat God se beskouing van die ongebore baba is. As ’n swanger vrou in eertydse Israel deur iemand beseer is en sy of haar ongebore kind as gevolg daarvan gesterf het, het God die persoon wat daarvoor verantwoordelik was, as ’n moordenaar beskou. Hy moes as sy straf “siel vir siel” gee (Eksodus 21:22, 23).a Ons kan dus tot die slotsom kom dat alle menselewe vir die Skepper heilig is, insluitende dié van die ongeborene. Trouens, God stel reeds in die baarmoeder al in ons belang, soos die psalmis toon: “U oë het selfs my embrio gesien, en in u boek was al die dele daarvan opgeskrywe.”—Psalm 139:16.
Ondanks die groot tegniese vooruitgang wat mense gemaak het, help die Bybel ons om ’n gebalanseerde, realistiese gesindheid teenoor mense en hulle prestasies te hê. Dit sê: “Moenie op magtiges vertrou nie, nie op ’n mens nie; hy kan jou nie red nie. Sy asem verlaat hom, hy word weer grond en sy planne is daarmee heen” (Psalm 146:3, 4, Die Bybel, 1983). Vir party klink hierdie stelling dalk pessimisties. Maar is dit werklik? Beskryf dit nie maar die ware toedrag van sake nie? Ja, want selfs die intelligentste persoon kan nie keer dat hy oud en siek word en uiteindelik sterf nie—wat nou nog te sê om te keer dat dit met ander gebeur.
Die Skepper het egter nie enige van die beperkings wat ons het nie. Daarbenewens kan en wil hy ons red. Jesus het gesê: “God het die wêreld so liefgehad dat hy sy enigverwekte Seun gegee het, sodat elkeen wat geloof in hom beoefen, nie vernietig sal word nie maar die ewige lewe kan hê” (Johannes 3:16). Toe Jesus op aarde was, het hy ons rede gegee om ‘geloof in hom te beoefen’ deur al die siekes en gebreklikes wat na hom gekom het, te genees. Hy het selfs die dooies opgewek!—Lukas 7:21, 22.
Wat Jesus gedoen het, gee ons ’n voorskou van God se groot genesingsprogram, wat sal begin wanneer sy Koninkryk heerskappy oor die hele aarde oorneem. Dit is waarvoor mense vra wanneer hulle die gebed opsê wat algemeen as die Onse Vader bekend staan. Dit is inderdaad net deur God se Koninkryk—God se hemelse regering in die hande van Jesus Christus—dat God se wil op die aarde sal geskied.—Daniël 2:44; Matteus 6:9, 10.
Gee hierdie Bybelbeloftes jou hoop? En wil jy jou bes doen om God nou te behaag deur sy siening te hê van die talle moeilike kwessies waarvoor ons te staan kom? Indien wel, moedig ons jou aan om na God se Woord te luister en daarop ag te slaan. Dit is werklik wysheid vir die lewe—ja, vir eindelose lewe.—Johannes 17:3; 2 Timoteus 3:16.
[Voetnoot]
a Party het al aangevoer dat hierdie wet net verwys na geweld wat die moeder aangedoen is. Maar dit is nie wat die oorspronklike Hebreeuse teks te kenne gee nie. Die hoogaangeskrewe Bybelgeleerdes C. F. Keil en F. Delitzsch sê dat die bewoording van die Hebreeuse teks “blykbaar geen ruimte laat vir die interpretasie dat dit net verwys na geweld wat die vrou aangedoen is nie”.—Sien The Watchtower van 1 Augustus 1977, bladsy 478.
[Prente op bladsy 10]
Die Bybel voorsien leiding vir vandag en ’n vaste hoop om volmaakte gesondheid in die toekoms te geniet