Van ons lesers

Moederskap Dankie vir die voorbladreeks “Moederskap—Moet jy ’n supervrou wees?” (8 April 2002). Baie mense voel vandag dat moeders wat nie sekulêre werk doen nie, nie so besig soos werkende moeders is nie. Julle artikel het julle lesers gehelp om te sien dat alle moeders werkende moeders is!

T. M., Verenigde State

Wat my heel eerste opgeval het, was die prent van ’n supervrou op bladsy 2. Ek wou die artikel onmiddellik lees. As ’n moeder van twee klein kinders kan ek sê dat die daaglikse roetine van ’n moeder realisties in die artikels uitgebeeld is.

C. L., Duitsland

Ek is ’n 12-jarige meisie, en toe ek hierdie tydskrif gekry het, het ek dit dadelik gelees. Ek besef nou wat my ma vir my en my pa doen. Ek waardeer wat sy doen en help haar nou meer!

A. L., Verenigde State

Ek het twee jaar gelede ’n babaseuntjie gehad. Ek was tot daardie tyd toe ’n voltydse evangeliedienaar met ’n deeltydse werk. Ek het so na my vorige lewenswyse verlang dat ek gevoel het dat ek onwaardig is om ’n moeder te wees. Dit was vir my belangrik om gerusgestel te voel, en dit is hoe ek gevoel het toe ek hierdie artikels gelees het.

S. T., Italië

Julle raad dat ’n mens tyd moet maak vir ontspanning, is iets wat ek onlangs begin besef het. Ek het dit begin doen voordat ek hierdie artikels gelees het, maar dit het my skuldig laat voel. Dankie dat julle my gehelp het om te sien dat ek nie skuldig hoef te voel nie, solank ek gebalanseerd bly.

C. C., Verenigde State

Sommige moeders voel dat hulle nie genoeg erkenning ontvang vir hulle harde werk nie. Hierdie artikels het hulle die erkenning gegee wat hulle verdien. As ’n moeder van vier kinders weet ek hoe moeilik dit is om ’n balans te vind tussen my verantwoordelikhede as ’n huisvrou en my werk. Die feit dat Jehovah Salomo gebruik het om gedagtes neer te skryf oor hardwerkende moeders is bemoedigend en spoor my aan om my bes te doen.

E. S., Duitsland

As die moeder van ’n driejarige dogtertjie voel ek skuldig omdat ek altyd so moeg is. Hierdie artikels het my gehelp om te sien dat ek nie die enigste een is wat so voel nie, en dit het uitstekende wenke gegee oor wat ek kan doen om my situasie te verbeter.

K. J., Verenigde State

Op die voorblad van hierdie tydskrif is daar ’n moeder met haar baba in haar arms. Dit lyk of die baba ’n worsie eet. Ek en my vrou het onlangs ’n klas bygewoon waar ons geleer het om KPR op babas en kinders toe te pas. Die instrukteur het gesê dat worsies die vernaamste oorsaak van verstikking onder babas en kinders is. Sy het ons ten sterkste afgeraai om jong kinders worsies te laat eet.

G. E., Verenigde State

“Ontwaak!” antwoord: Ons stem saam dat babas en klein kinders aan worsies kan verstik. Eintlik suig die kind op die voorblad aan ’n wortel terwyl haar ma haar in haar arms vashou.

Dierekommunikasie Baie dankie vir die artikel “Taal in die natuur—die geheime van dierekommunikasie” (8 April 2002). Ek het lekker gelag toe ek lees oor die ongewone manier waarop die wildebees, of ghnoe, sy vyande verwar. Aan die ander kant het Joyce Poole se woorde oor ’n olifantkoei wat oor haar doodgebore baba “getreur” het, my laat huil. Sulke interessante, leersame artikels laat ’n mens dink en help ons om te besef dat hierdie “taal in die natuur” ‘die een wat dit gemaak het, Jehovah God, tot eer strek’. Hou aan om sulke artikels te skryf!

A. G., Pole