Van ons lesers
Landmeting Ek het die artikel “Landmeting—Wat is dit?” (8 Junie 2002) geniet. Ek en my man is padbouinspekteurs vir die staat. Ons doen elke dag landmeting as deel van ons werk. Ek het dit baie geniet om oor die geskiedenis daarvan te lees, en julle verwysing na Spreuke 22:28 het dit besonder spesiaal gemaak. Hoewel ek weet dat die foto’s bloot as voorbeelde dien, wil ek net sê dat ons ten sterkste aanbeveel dat alle landmeters veiligheidsbaadjies en -toerusting dra. Dit maak hulle baie opsigtelik, en dit is belangrik, aangesien hulle dikwels langs die pad met hulle rug na die verkeer werk. Dankie vir ’n baie leersame artikel!
C. S., Verenigde State
Oorlog Ek was so bly nadat ek die artikel “Die Bybelse beskouing: Keur God oorlog goed?” (8 Mei 2002) gelees het. Hierdie einste onderwerp was vir my van belang omdat ek een van Jehovah se Getuies is en al mense in my bediening ontmoet het wat gevra het waarom die eertydse nasie Israel soveel oorloë gevoer het. Ek het dit probeer verduidelik, maar ek het nie genoeg inligting gehad nie. Hierdie artikel was so eenvoudig en oortuigend! Ek het al die punte neergeskryf sodat ek dit enige tyd sal kan gebruik. Ons het sulke artikels werklik nodig!
V. S., Rusland
Ek was gedurende die Tweede Wêreldoorlog ’n swaartenkbestuurder aan die front. Die oggend nadat ’n strategiese heuwel verower is, is ’n altaar in die veld opgerig. Ek onthou hoe die bemanningslede van drie tenks voor die altaar gekniel en deur die kapelaan geseën is. Kort daarna is ons aangeval, en die bemanningslede van die drie tenks het gesneuwel. Ek en my vrou het in 1957 Jehovah se Getuies geword en toe geweet dat God nie in daardie konflik kant gekies het nie. Sedertdien neem ons aan ’n geestelike oorlog deel, en ons weet beslis aan watter kant God is.
F. S., Nieu-Seeland
Moederskap Dankie vir die reeks “Moederskap—Moet jy ’n supervrou wees?” (8 April 2002). Ek is net 13, maar hierdie artikels het my gehelp om te verstaan waarvoor my ma nou te staan kom, en waarvoor sy oor ’n paar maande te staan sal kom—sy is vyf en ’n half maande swanger. Noudat ek hierdie tydskrif gelees het, probeer ek baie hard om haar te eer en haar met groter respek te behandel.
N. B., Verenigde State
Hoë bloeddruk Dankie vir die uitstekende artikel “Hoë bloeddruk—voorkoming en beheer” (8 April 2002). Ek moes in die hospitaal opgeneem word weens skielike hartversaking. Daarna het ek hierdie artikel gelees, en dit het breedvoerig bespreek hoe ’n mens hoë bloeddruk onder beheer kan hou. Ek het natuurlik baie inligting by my dokter en ’n voedingkundige gekry. Maar hierdie artikel is so geskryf dat ’n mens dit maklik kan verstaan. Van nou af wil ek goed omsien na die lewe wat Jehovah my gegee het!
N, I., Japan
Ek het hoë bloeddruk, en gesondheidsdeskundiges het aanbeveel dat ek my soutinname tot twee gram per dag beperk. Op bladsy 22 sê julle dat die Derde Brasiliaanse Konsensus oor Arteriële Hipertensie ses gram per dag aanbeveel het, wat vir my nogal hoog lyk. Is dit dalk ’n setfout?
F. S., Verenigde State
“Ontwaak!” antwoord: Die bron van hierdie stelling beveel niks meer as 100 mekw (milli-ekwivalent) sout per dag aan nie, wat 5,85 gram is. ’n Teelepel, wat dalk makliker is om te visualiseer, is 5,18 gram. Maar soos die voetnoot gesê het, moet iemand met hoë bloeddruk of ’n soortgelyke siekte ’n dokter raadpleeg. Dit sal moontlik goed wees as so iemand sy soutinname selfs verder verminder.