Van ons lesers

Slawerny Ek kan skaars woorde vind om my dankbaarheid uit te spreek vir die voorbladreeks “Die einde van alle vorme van slawerny!” (22 Junie 2002). Hierdie artikels het my help besef dat mense slawe van verskeie dinge kan word, soos dwelms, rook en leuens. Ek was ’n dobbelslaaf. In my hart het ek geweet dat dit verkeerd is, maar dit was baie moeilik om hierdie drang te onderdruk. Ricardo se ondervinding in julle artikel het my tot trane beweeg. Dit het my gehelp om te sien dat ’n mens sulke soort verslawings te bowe kan kom as jy jou inspan. Dankie dat julle sulke vertroostende artikels publiseer wat oor werklike situasies handel.

M. W., Verenigde State

Drie-eenheid Dankie vir die artikel “’n Verdraagsame koninkryk in ’n onverdraagsame tyd” (22 Junie 2002). Dit was opwindend om oor Sigismund te lees, wat die anti-Trinitariërs in hulle debatte verdedig het, en hoe wetlike erkenning aan die Unitariese Kerk verleen is. Ek het Fransiskus Dawid se oortuigende argumente teen die Drie-eenheid baie interessant gevind. Dit het my laat dink aan die moed van die apostel Paulus. Gewoonlik stel ek nie belang in artikels wat baie geskiedenis bevat nie, maar ek probeer my denke verruim en ’n begeerte ontwikkel om alles te lees wat “die getroue en verstandige slaaf” deur middel van ons tydskrifte voorsien (Matteus 24:45-47). Hierdie artikel is goed geskryf en nagevors. Ek het dit werklik geniet.

M. C., Verenigde State

Ek het julle interessante artikel gelees wat ’n standpunt inneem teen die Drie-eenheidsleer. Ons bespreek tans hierdie onderwerp in ons kerk. Ek meen al lank dat die Drie-eenheidsleer verkeerd is, en ek wil graag 15 eksemplare van hierdie nommer bestel om te versprei.

A. O., Duitsland

Gras Dankie vir die artikel “Gras—nie net die groenigheid onder jou voete nie” (8 Junie 2002). Dit het my waardering vergroot vir die feit dat Jehovah God alle lewe op die aarde deur middel van gras onderhou. Dit is “soos ’n dam wat die mensdom teen hongersnood beskerm”, soos ’n plantkundige gesê het. Jehovah is die Groot Kunstenaar, en dit het my laat besef dat Jehovah se eienskappe liefde, wysheid, geregtigheid en krag duidelik in die grasfamilie gesien kan word.

K. O., Japan

Van ’n kind Ek is nege jaar oud en is in graad vier. Ek wil dankie sê vir die mooi artikels in julle tydskrifte. Een reeks wat my baie gehelp het, is “Gewilde vierings—Is daar verskuilde gevare?” (8 Oktober 2001). Ek het die tydskrif vir my Engelse onderwyseres gegee, en sy het later die inligting onder die onderhofie “Godsdiensteenkanting” in die klas gebruik. Sy het die akkuraatheid van die artikels baie waardeer. Dankie vir alles wat julle skryf om ons aan te moedig en te beskerm.

N. R., Italië

Waardering Ek waardeer werklik die feit dat julle gespesialiseerde artikels publiseer, soos dié oor diere. Ek is die enigste een in my gesin wat een van Jehovah se Getuies is, en niemand in my gesin stel daarin belang om enige van ons publikasies te lees wat lyk of dit godsdienstig van aard is nie. Maar hierdie artikels is baie interessant, en dit loof ons Skepper op so ’n manier dat dit aanvaarbaar is vir mense wat nie Getuies is nie. Dankie vir die wonderlike werk wat julle doen en die pragtige tydskrifte wat julle publiseer.

T. C., Verenigde State