Van ons lesers

Terrorisme Ek is 15 jaar oud en wil julle bedank vir die reeks “Gebede om vrede—Kan dit ’n einde maak aan terrorisme?” wat in die nommer van 22 Oktober 2002 verskyn het. Sedert die aanvalle op 11 September 2001 op die World Trade Center is ek baie ontsteld. Dit is soos ’n nare droom. Ek sien uit na die dag wanneer Jesus, die Vredevors, ons almal sal beskerm. Dit is iets waaruit ons vertroosting kan put.

A. M., Verenigde State

Zeppelins Die artikel “Zeppelins—ontsagwekkende reuse in die lug” in die nommer van 22 Oktober 2002 het werklik my aandag getrek, want dit het my aan my kinderdae laat terugdink. Ek het my skooldae langs die ooskus van Engeland deurgebring. Toe ek tien jaar oud was, het ek eendag by die venster uitgekyk en een van hierdie groot lugskepe gesien wat stadig in die lug verbybeweeg. Die hele klas het buitentoe gehardloop om na hierdie ontsagwekkende skouspel te kyk. Dit is iets wat my nog altyd bygebly het, en julle artikel het my daaraan laat dink.

R. W., Engeland

My pa was ’n vlieënier van een van die grootste niestywe lugskepe wat nog gebou is. Ek het self al twee keer in ’n ballonskip gevlieg en het nog altyd in die geskiedenis van lugskepe belanggestel. Ek is bly om te sien dat julle die woorde “ballonskip” en “zeppelin” akkuraat omskryf het, want hierdie terme word dikwels verkeerd gebruik.

R. P., Verenigde State

Pikkewyne My man het my seuns nie toegelaat om die Bybel te bestudeer nie. Gevolglik stel hulle nie daarin belang nie. Maar danksy julle leersame artikels kan ek nog steeds iets doen om hulle geestelik te onderrig. Ek soek artikels uit wat nie spesifiek van die Bybel of God praat nie, maar wat miskien vir my seuns interessant sal wees. Ek het byvoorbeeld ’n afskrif gemaak van die artikel “Hier kom die kleinbloupikkewyne!” (22 Oktober 2002) en dit in ’n klein vouer gesit wat ek vir hulle gemaak het en “Die wondere van die natuur” noem. Ek bid dat Jehovah my pogings sal beloon om my geliefdes se harte te bereik.

J. G., Frankryk

Selfone Die artikel “Jongmense vra . . . Het ek ’n selfoon nodig?” (22 Oktober 2002) het my baie gehelp. Voordat ek dit gelees het, kon ek nie aan die slaap raak as ek nie my teksboodskappe beantwoord het nie. Maar julle het my nou gehelp om die voor- en nadele van hierdie toestel te sien.

C. A., Filippyne

Die meeste kinders in my skool het selfone, en ek het dus daaraan gedink om ook ’n selfoon te kry. Noudat ek die artikel gelees het, sal ek eers die koste deeglik bereken en kyk of ek dit wyslik sal gebruik. Ek voel dat Jehovah hierdie artikel vir my voorsien het.

M. F., Japan

Ek het my telefoon gebruik om ’n seun te e-pos. Ons het oor persoonlike probleme gesels, en ek was bly dat ek iemand gehad het om in my vertroue te neem. Mettertyd het hy opgehou om my te e-pos, en dit het my geïrriteer. Maar die artikel het my gehelp om te besef dat dit ’n vorm van afsprake kan wees. En ek dink dat die seun tot dieselfde gevolgtrekking gekom het. Nou gee ek my e-posadres net vir mense wat dit nodig het.

J. M., Japan

Tienerdepressie Ek is 17 jaar oud en hou regtig baie van julle tydskrifte. Toe ek eenkeer in die hospitaal was, het ek ’n klompie nommers van die Ontwaak! op ’n rakkie in die gang gesien. Ek het geleer dat die almagtige God ’n naam het—Jehovah. Ek het veral die artikels oor “Hulp vir tieners met depressie” (8 September 2001) geniet. Dit was goeie leesstof wat my met my situasie gehelp het, aangesien ek op daardie stadium aan depressie gely het. Dankie vir sulke wonderlike en leersame tydskrifte. Ek is dankbaar dat mense soos julle bestaan.

G. Z., Rusland