Van ons lesers
Stamselnavorsing Ek sê selde iets oor julle artikels; ek het daaraan gewoond geraak dat die Ontwaak! altyd van goeie gehalte is. Maar ek voel ek moet net skryf en sê dat die reeks “Stamselle—Het die wetenskap te ver gegaan?” (22 November 2002) ’n voortreflike voorbeeld is van uitstekende skryfwerk oor ’n moeilike onderwerp. Daar is al so baie oor stamselnavorsing in die media gesê dat dit moeilik is om die feite bymekaar te kry. Julle artikels het dit goed verduidelik terwyl julle genoeg aandag gegee het aan die sedelike, etiese en maatskaplike kwessies.
K. M., Verenigde State
Portuurdruk Baie dankie vir die artikel “Jongmense vra . . . Portuurdruk—Is dit regtig so sterk?” (22 November 2002). Ek het nooit gedink dat ek deur portuurdruk beïnvloed word nie. Maar waar ek woon, trou baie mense as hulle nog baie jonk is. Ek wou altyd ’n ruk lank ongetroud bly en ’n geestelike jong vrou word. Maar mense kom my gereeld vra “Wanneer gaan jy trou?” (Ek is net 16.) Ek het begin dink dat dit miskien verkeerd is om ongetroud te wees! Hierdie artikel het my gehelp om te sien hoe sterk portuurdruk regtig is.
E. A., Verenigde State
Vloednoodleniging Baie dankie vir die artikel “Liefde in aksie—’n maraton-noodlenigingspoging” (22 November 2002). Ek was verbaas om uit te vind hoe groot die vloedskade in Houston, Texas, was. Ek het nie geweet van die treurige toestande waarvoor my Christenbroers en -susters daar te staan gekom het nie. Die goed georganiseerde noodlenigingswerk het my ’n voorskou gegee van hoe die aarde ná Armageddon weer mooi gemaak sal word.
M. I., Japan
Genetiese kode Ek wil graag die aandag vestig op die manier waarop die term “genetiese kode” in julle publikasie gebruik word. In die artikel “Hoe het die heelal en lewe ontstaan?” (8 Junie 2002) praat julle byvoorbeeld van “die onlangse kartering van die menslike genetiese kode”. As ’n bioloog wil ek graag daarop wys dat hierdie gebruik van die term onakkuraat is.
A. R., Rusland
“Ontwaak!” antwoord: Streng gesproke is ons leser reg. Wetenskaplikes gebruik nie die term “genetiese kode” om die gene self te beskryf nie. Die kode dui eerder op die meganisme of stel reëls wat selle in staat stel om die gene te “lees” of te ontsyfer en proteïenes te vervaardig. Maar die “Ontwaak!” word vir die algemene publiek geskryf—nie vir wetenskaplikes nie. In gebruikstaal word die term “genetiese kode” dikwels ’n breër, nie-tegniese betekenis gegee.
Afvalwater As die hoofoperateur van ’n watersuiweringsaanleg het ek dit baie geniet om die artikel “Wat word van die water?” (8 Oktober 2002) te lees. Die suiwering van afvalwater voorkom dat miljoene der miljoene mense met patogeniese infeksies besmet word. In die verlede het ingewandskoors, cholera en ander waterverspreide siektes wêreldwyd op groot skaal voorgekom. Interessant genoeg, moderne watersuiwering is ’n natuurlike proses waarin daar dikwels min of geen chemiese bymiddels gebruik word nie. In my aanleg word ultravioletlig gebruik om behandelde afvalwater te ontsmet. Dankie dat julle mense se aandag op die lewensreddende watersuiweringsproses gevestig het.
E. P., Verenigde State
Amber Ek het die artikel “Vasgevang in ’n goue traan” (22 September 2002) werklik waardeer. Ek moet erken dat amber voorheen glad nie my aandag getrek het nie. Maar vandat ek hierdie artikel gelees het, kan ek nie anders as om elke keer wanneer ek by ’n juwelierswinkel verbyloop, hierdie wonder te bekyk nie—iets wat ek altyd gedink het alledaags en niks besonders is nie.
F. L., Frankryk