Van ons lesers

Veilig om te vlieg? Ek is 10 jaar oud en woon in Kalifornië, VSA. Dankie vir die Ontwaak! oor die onderwerp “Is dit nog veilig om te vlieg?” (8 Desember 2002). Daar is 47 mense in my skool wat van San Diego na Sacramento gaan vlieg. Ek was bang dat daar dalk ’n ongeluk of ’n kaping sal wees. Maar hierdie artikel het my gerusgestel, en die inligting oor nuwe veiligheidsmaatreëls het my meer vertroue gegee. Ek sal probeer om hierdie nommer vir al my klasmaats te gee wat bang of senuweeagtig is om te vlieg.

V. M., Verenigde State

Dodelike sending Ek is geraak deur die ondervinding van Tosjiaki Niwa soos dit vertel is in die artikel “Van ’n dodelike sending tot ’n vreedsame weg” (8 Desember 2002). Ek is ’n paar jaar ná die Tweede Wêreldoorlog in die Filippyne gebore. In baie van die oorlogsverhale wat my gesin vertel het, het hulle die soldate se wreedheid genoem. As kind het ek gewoonlik gevra: “Hoe kon hulle dit doen?” Broer Niwa se ondervinding het my gehelp om die antwoord op hierdie vraag baie beter te verstaan. Dankie dat julle sulke artikels druk. So ’n lewensverandering is nog ’n bewys van Jehovah se ontsaglike krag.

A. C., Verenigde State

Stamselle Ek lees al 20 jaar lank die Ontwaak!, en danksy die artikels daarin het ek ’n wye algemene kennis gekry. Toe mense oor kloning en stamselle begin praat, kon ek nie verstaan hoe sekere weefsels buite die menseliggaam gekweek kan word nie. Danksy die reeks “Stamselle—Het die wetenskap te ver gegaan?” (22 November 2002) verstaan ek nou hoe dit moontlik is en waarom dit ’n omstrede onderwerp is.

F. M., Italië

Terwyl ek hierdie artikels gelees het, het die metodes wat mense gebruik om ernstige siektes te genees, my bang gemaak. Baie dankie vir julle moeite om hierdie artikels te skryf en feite oor hierdie onderwerpe aan ons oor te dra. Nou sien ek nog gretiger uit na die dag wanneer God al ons siektes sal genees.

T. F., Filippyne

Liefde in aksie Die artikel “Liefde in aksie—’n maraton-noodlenigingspoging” (22 November 2002) het my baie beïndruk! Wat vrywilligers gedurende al daardie maande in Houston uitgerig het, lewer kragtige bewys dat daar ware liefde in aksie onder God se volk is en dat ons Skepper die pogings van sy knegte ryklik seën.

C. T., Duitsland

Terwyl ek hierdie artikel gelees het, kon ek nie my trane keer nie. Toe die Elberivier sy walle oorstroom het, moes 44 mense van ons gemeente na veiligheid gebring word. Ek en my man is liefdevol deur ’n gesin in ons gemeente ingeneem, en ons twee volwasse seuns is deur ’n ander gesin ingeneem. Sedert hierdie ramp het ons gemeente baie nader aan mekaar gekom. As ’n gesin besef ons werklik die waarde van die noodlenigingswerk wat gedurende rampe soos die een in Houston gedoen word.

S. R., Duitsland