Kommunikasie wat tot die lewe lei
VAN al die aarde se skepsele is mense die enigstes wat nie daarmee tevrede is om net met mekaar te kommunikeer nie. Ongeag hulle nasionaliteit, sosiale status, geslag of opvoedkundige vlak, mense het ’n aangebore begeerte om met die Opperwese, naamlik God, te kommunikeer.
Is dit net ’n lawwe bygeloof? Glad nie! Soos in die vorige artikel gemeld is, het God mense na sy beeld geskep. Hy het ons ’n sin vir geestelikheid gegee. Dit sluit die begeerte in om met hom as ons hemelse Vader te kommunikeer (Genesis 1:27; Matteus 5:3). Trouens, God beskou kommunikasie met hom as so belangrik dat daar na hom verwys word as die “Hoorder van die gebed”.—Psalm 65:2.
Wat ’n eer is dit tog om tot die Almagtige te bid! Die meeste mense sal dit as ’n voorreg beskou om ’n privaat gesprek te hê met ’n belangrike hoogwaardigheidsbekleër, soos ’n president of ’n eerste minister. Maar Jehovah God is die belangrikste persoon in die heelal! En ons hoef nie ’n afspraak te maak om met hom te praat nie. Ons kan te eniger tyd en op enige plek bid. Ons kan selfs in ons hart met God praat (1 Samuel 1:12-15). Maar Jehovah vereis wel dat ons opreg is en dat ons na hom luister (Miga 6:8; Matteus 6:5-13). Goeie kommunikasie is per slot van rekening ’n tweerigtingpad, nie waar nie?
Luister jy na God?
Hoe luister ’n mens na God? Hoofsaaklik deur die leringe in sy geskrewe Woord, die Heilige Bybel, te lees en toe te pas (2 Timoteus 3:16; 2 Petrus 1:20, 21). ‘Die mens sal lewe van elke woord wat uit Jehovah se mond kom’, het Jesus gesê (Matteus 4:4). Luister jy na God deur sy geskrewe Woord te lees en dit toe te pas?
Diegene wat gereeld met Jehovah kommunikeer verkry sy guns en geniet “die vrede van God wat alle denke te bowe gaan” (Filippense 4:6, 7; Spreuke 1:33). Hulle het ook die vooruitsig op ewige lewe op ’n paradysaarde, vry van al die bekommernisse en lyding wat ons vandag ondervind (Psalm 37:29; Johannes 17:3). Watter wonderlike belonings hou dit tog in as ons die wonderwerk van intelligente kommunikasie ten beste benut!
[Prent op bladsy 10]
Kommunikasie met God behels dat ons die Bybel lees en bid