Kommunikasie in die Christelike bediening

“Gaan dan heen, maak dissipels van al die nasies.”—MATTHEÜS 28:19.

1. Watter opdrag deur Christus impliseer dat ons moet kommunikeer?

DIE opdrag deur Jesus wat hierbo aangehaal word, bied ons die uitdaging om in ons bediening met mense te kommunikeer terwyl ons van huis tot huis gaan, herbesoeke doen en aan alle ander aspekte van Koninkryksprediking deelneem. Inbegrepe by daardie opdrag is die verantwoordelikheid om die waarheid bekend te maak oor Jehovah God, Jesus Christus en die Messiaanse Koninkryk waarin Jesus nou heers.—Mattheüs 25:31-33.

2. Wat het ons nodig om doeltreffend te kommunikeer?

² Hoe kan ons doeltreffend kommunikeer? Ons moet eerstens glo in die dinge waaroor ons praat. Met ander woorde, ons moet vas glo dat Jehovah die enigste ware God is, dat die Bybel werklik God se Woord is en dat God se Koninkryk die enigste hoop vir die mensdom is. In daardie geval sal ons onderrigting uit die hart kom, en ons sal ag slaan op Paulus se raad aan Timotheüs: “Lê jou daarop toe om jou beproef voor God te stel as ’n werker wat hom nie hoef te skaam nie, wat die woord van die waarheid reg sny.”—2 Timotheüs 2:15.

Kommunikasie sonder woorde

3-5. (a) Hoe kan ons kommunikeer sonder om ’n woord te sê? (b) Watter ondervindinge staaf dit?

³ Kommunikasie behels meestal woorde. Maar in werklikheid kommunikeer ons met mense selfs voor ons met hulle praat. Hoe? Deur ons houding en deur ons kleredrag en persoonsversorging. Jare gelede het ’n gegradueerde van die Wagtoring-Bybelskool Gilead per skip na sy buitelandse toewysing gereis. Ná ’n paar dae op see het ’n vreemdeling hom gevra waarom hy so anders as al die ander mense op die skip is. Bloot deur sy kleredrag en sy gedrag het die sendeling iets opmerkliks oorgedra—dat hy ander standaarde het en genaakbaar is. Dit het die sendeling ’n goeie geleentheid gebied om ’n getuienis te gee.

⁴ By ’n ander geleentheid het ’n suster wat Bybellektuur vir mense op straat aangebied het vriendelik geglimlag vir ’n vrou wat naby haar verbygeloop het. Die vrou het met die trap na ’n moltreinstasie begin afklim. Toe het sy van plan verander, na die suster teruggeloop en ’n tuisbybelstudie gevra. Wat het haar beïndruk? Al het die Getuie wat straatwerk gedoen het nie vir haar Bybellektuur aangebied nie, het sy vriendelik vir haar geglimlag.

⁵ ’n Derde voorbeeld: ’n Groep jong Getuies het in ’n restaurant gaan eet en was verbaas toe ’n vreemdeling na hulle tafel kom en vir hulle ete betaal. Waarom het hy dit gedoen? Hulle gedrag het hom beïndruk. Sonder om ’n woord vir die vreemdeling te sê, het hierdie jong Christene getoon dat hulle godvresende mense is. Ons kommunikeer klaarblyklik nog voordat ons enigiets sê deur ons gedrag, voorkoms en vriendelikheid.—Vergelyk 1 Petrus 3:1, 2.

Redenering is onontbeerlik vir kommunikasie

6. Lig toe hoe redenering van onskatbare waarde is in kommunikasie.

⁶ As ons mondelings met mense oor die goeie nuus wil kommunikeer, moet ons bereid wees om met hulle te redeneer en nie dogmaties te wees nie. Ons lees dikwels dat Paulus geredeneer het met diegene aan wie hy die goeie nuus wou oordra (Handelinge 17:2, 17, NW; 18:19, NW). Hoe kan ons sy voorbeeld navolg? Wel, verslegtende wêreldtoestande het party laat twyfel aan die bestaan van ’n almagtige en liefdevolle God wat vir die mensdom omgee. Ons kan egter met hulle redeneer oor die feit dat God ’n tyd vir alles het (Prediker 3:1-8). Galasiërs 4:4 sê dus dat toe God se vasgestelde tyd aangebreek het, het hy sy Seun aarde toe gestuur. Dit was duisende jare ná hy belowe het dat hy dit sou doen. Wanneer sy vasgestelde tyd aanbreek, sal hy eweneens ’n einde bring aan goddeloosheid. Daarbenewens toon God se Woord dat God dwingende redes het om lyding en goddeloosheid so lank toe te laat. (Vergelyk Exodus 9:16.) As ons hierdie redenasie gebruik en dit met illustrasies en onweerlegbare skriftuurlike bewyse steun, sal dit opregte persone help om te besef dat die heersende goddeloosheid nie as bewys aangevoer kan word dat Jehovah nie bestaan of nie omgee nie.—Romeine 9:14-18.

7, 8. Hoe kan redenering ons help om met ’n Ortodokse Jood te kommunikeer?

⁷ Sê nou jy gaan van huis tot huis en ’n huisbewoner sê vir jou: “Ek is ’n Jood. Ek stel nie belang nie.” Hoe kan jy voortgaan? Een broer het welslae met hierdie benadering gehad: ‘Ek is seker jy sal met my saamstem dat Moses een van die grootste profete was wat God ooit gebruik het. En het jy geweet dat hy volgens Deuteronomium 31:29 gesê het: “Ek weet dat julle ná my dood . . . sal afwyk van die weg wat ek julle beveel het, sodat die onheil julle . . . sal teëkom”? Moses was ’n ware profeet, gevolglik moes sy woorde bewaarheid word. Is dit dalk bewaarheid toe God die Messias na die Jode gestuur het en die Jode hom juis daarom nie aangeneem het nie? Dit kan wees. As dit die geval is en hulle ’n fout gemaak het, is dit nodig dat ek en jy ook daardie fout maak?’

⁸ Onthou ook dat die Jode baie onder die Christendom gely het, veral gedurende hierdie eeu. Derhalwe kan jy vir die huisbewoner sê dat ons niks daarmee te doen gehad het nie. Jy kan byvoorbeeld sê: ‘Het jy geweet dat Jehovah se Getuies tydens Hitler se bewind sy boikot van die Jode teëgestaan het? Hulle het ook geweier om “Heil Hitler” te sê en in sy leër te dien.’a

9, 10. Hoe kan redenering gebruik word om iemand te help wat in die helse vuur glo?

⁹ As jy met iemand probeer kommunikeer wat in die helse vuur glo, kan jy redeneer dat as iemand vir ewig in die hel gaan ly, hy ’n onsterflike siel moet hê. Iemand wat in die hel glo, sal geredelik saamstem. Dan kan jy na die verhaal van die skepping van Adam en Eva verwys en taktvol vra of hy ooit in daardie verslag enige verwysing na ’n onsterflike siel gesien het. Jy kan daarna jou redenasie voortsit deur sy aandag op Genesis 2:7 te vestig, waar die Bybel vir ons sê dat Adam ’n siel geword het. En let op wat God gesê het die gevolg van Adam se sonde sou wees: “In die sweet van jou aangesig sal jy brood eet totdat jy terugkeer na die aarde, want daaruit is jy geneem. Want stof is jy en tot stof sal jy terugkeer” (Genesis 3:19). Gevolglik het Adam die siel na die stof teruggekeer.

¹⁰ Jy kan ook die aandag vestig op die feit dat God nêrens in die Genesis-verslag van ewige lyding in die helse vuur melding maak nie. Toe God Adam gewaarsku het om nie van die verbode vrug te eet nie, het hy gesê: “Die dag as jy daarvan eet, sal jy sekerlik sterwe” (Genesis 2:17). Geen melding van die helse vuur nie! As die werklike gevolg van sonde vir Adam nie die dood, ’n ‘terugkeer na die stof’, nie, maar ewige lyding sou wees, moes God dit nie in alle billikheid duidelik aan hom gestel het nie? Sorgvuldige en taktvolle redenasie kan ’n opregte persoon help om die teenstrydighede in sy oortuiging te sien. Laat ons altyd onthou hoe belangrik dit is om redenering te gebruik wanneer ons ander van die waarheid van God se Woord vertel.—Vergelyk 2 Timotheüs 2:24-26; 1 Johannes 4:8, 16.

Eienskappe wat nodig is vir doeltreffende kommunikasie

11-13. Watter Christelike eienskappe kan ons help om doeltreffend te kommunikeer?

¹¹ Maar watter eienskappe moet ons aankweek sodat ons Koninkrykswaarhede op die doeltreffendste wyse kan oordra? Wel, wat leer ons uit Jesus se voorbeeld? In Mattheüs 11:28-30 lees ons sy woorde: “Kom na my, almal wat swoeg en swaar belaai is, en ek sal julle verkwik. Neem my juk op julle en leer van my, want ek is sagaardig en ootmoedig van hart, en julle sal verkwikking vind vir julle siel. Want my juk is sag en my vrag is lig” (NW). Daar sien ons een van die redes vir Jesus se suksesvolle kommunikasie. Hy was sagaardig en ootmoedig van hart. Regskapenes het hom verkwikkend gevind. Die apostel Paulus het ook ’n goeie voorbeeld gestel, want hy het, soos hy vir die ouere manne van Efese gesê het, die Here van die eerste dag dat hy by hulle gekom het “met alle nederigheid” gedien.—Handelinge 20:19.

¹² As ons altyd beskeidenheid en nederigheid aan die dag lê, sal ander ons ook verkwikkend vind, en dit sal vir ons makliker wees om met hulle te kommunikeer. Enige ander gesindheid sal waarskynlik ’n versperring veroorsaak tussen ons en diegene met wie ons probeer kommunikeer. Voorwaar, “by die beskeidenes is wysheid”.—Spreuke 11:2.

¹³ Ons moet ook geduldig en taktvol wees as ons inligting doeltreffend wil oordra. Die apostel Paulus was beslis taktvol toe hy vir die wysgere op Marsheuwel getuig het. Hy het die goeie nuus aangebied op ’n manier wat hulle kon verstaan (Handelinge 17:18, 22-31). As ons met welslae met ons hoorders wil kommunikeer, moet ons ag slaan op die raad wat die apostel Paulus vir die Kolossense gegee het toe hy gesê het: “Wat julle sê, moet altyd vriendelik wees en van goeie smaak getuig; en julle moet weet hoe julle elkeen behoort te antwoord” (Kolossense 4:6, NAV). Ons woorde moet altyd aangenaam wees. Sulke woorde sal help om die verstande van ons hoorders ontvanklik te maak, terwyl ondeurdagte woorde hulle hul verstande sal laat sluit.

14. Hoe kan ’n ontspanne, vriendelike benadering ons help om met ander te kommunikeer?

¹⁴ Ons wil te alle tye ontspanne voorkom. Dit help om ons hoorders op hulle gemak te laat voel. Om ontspanne te wees, beteken dat ons nie al die praatwerk wil doen nie. Ons moet ons hoorders eerder met ’n ongejaagde houding en vriendelike vrae die geleentheid bied om hulle mening te gee. Veral wanneer ons informeel getuig, is dit verstandig om die ander persoon te laat praat. ’n Getuie het hom byvoorbeeld eenkeer op ’n vliegtuig langs ’n Rooms-Katolieke priester bevind. Die Getuie het die priester meer as ’n uur lank deur taktvolle vrae uitgelok, en terwyl hy geantwoord het, het die priester die meeste van die praatwerk gedoen. Maar teen die tyd dat hulle uitmekaargegaan het, het die priester verskeie Bybelse publikasies aanvaar. So ’n geduldige benadering sal ons help om nog ’n belangrike eienskap, naamlik empatie, aan die dag te lê.

15, 16. Hoe kan empatie ons help om te kommunikeer?

¹⁵ Empatie beteken om ons, as ’t ware, in iemand anders se plek te stel. Die apostel Paulus het die behoefte aan empatie ten volle begryp, soos ons kan sien uit die woorde wat hy aan die Korinthiërs geskryf het: “Want alhoewel ek van almal vry was, het ek my aan almal diensbaar gemaak om soveel van hulle as moontlik te win. Vir die Jode het ek soos ’n Jood geword om die Jode te win; vir die wat onder die wet is, soos een wat onder die wet is, om die wat onder die wet is, te win. Vir die wat sonder die wet is, soos een sonder wet—al is ek nie sonder die wet van God nie, maar onder die wet van Christus—om die wat sonder die wet is, te win; vir die swakkes het ek soos ’n swakke geword om die swakkes te win; vir almal het ek alles geword om in alle geval sommige te red.”—1 Korinthiërs 9:19-22.

¹⁶ As ons die apostel Paulus in hierdie aspekte wil navolg, moet ons taktvol, oordeelkundig en oplettend wees. Empatie sal ons help om die waarheid aan ons hoorders oor te dra ooreenkomstig hulle denkwyse en gevoelens. Die publikasie Redenering uit die Skrif help ons baie in hierdie opsig. Hou dit altyd byderhand in die bediening.

Liefde—’n hulpmiddel in kommunikasie

17. Wat is die waardevolste Christelike eienskap as ons die waarheid doeltreffend wil oordra, en hoe word dit betoon?

¹⁷ Beskeidenheid, nederigheid, geduld en empatie is noodsaaklik om doeltreffend te kommunikeer en inligting oor te dra. Maar bowenal sal onselfsugtige liefde ons help om die harte van ander met welslae te bereik. Jesus het jammer gevoel vir die mense omdat hulle “moeg en uitgeput was, soos skape wat geen herder het nie”. Dit was liefde wat Jesus laat sê het: “Kom na my, almal wat swoeg en swaar belaai is, en ek sal julle verkwik” (Mattheüs 9:36; 11:28, NW). Dit is omdat ons mense liefhet dat ook óns hulle wil verkwik en hulle wil help om op die weg te kom wat na die lewe lei. Aangesien ons ’n boodskap van liefde dra, laat ons dit altyd op ’n liefdevolle manier oordra. Hierdie liefde word betoon deur ’n vriendelike glimlag, deur goedhartigheid en sagmoedigheid, deur opgeruimdheid en hartlikheid.

18. Hoe kan ons Paulus navolg, soos hy die Meester nagevolg het?

¹⁸ In hierdie opsig was die apostel Paulus ’n uitstekende navolger van sy Meester, Jesus Christus. Waarom het hy soveel welslae gehad om die een gemeente na die ander te kon stig? Weens sy ywer? Ja. Maar ook weens die liefde wat hy aan die dag gelê het. Let op sy betuiging van liefde in verband met die nuwe gemeente in Thessalonika: “Ons was vriendelik onder julle soos ’n pleegmoeder haar kinders koester. Terwyl ons so na julle verlang het, was dit ons aangenaam om aan julle nie alleen die evangelie van God mee te deel nie, maar ook ons eie lewe, omdat julle vir ons dierbaar geword het.” As ons Paulus navolg, sal dit ons help in ons pogings om te kommunikeer.—1 Thessalonicense 2:7, 8.

19. Waarom moet ons nie toelaat dat ons ontmoedig word deur ’n gebied waar mense nie belang stel nie?

¹⁹ Moet dit ons ontmoedig as ons ons bes gedoen het om te kommunikeer en ons nie die gewenste resultate kry nie? Glad nie. Die Bybelstudente (soos Jehovah se Getuies voorheen genoem is) het altyd gesê dat mense drie eienskappe nodig het om die waarheid aan te neem. Hulle moet eerlik, nederig en geestelik honger wees. Ons kan nie verwag dat onopregte mense, diegene wat nie eerlik is nie, in die waarheid moet belang stel nie; ons kan ook nie verwag dat verwaande of trotse mense na die goeie nuus moet luister nie. Maar al is iemand betreklik eerlik en nederig sal hy waarskynlik nie die waarheid aanneem as hy nie geestelik honger is nie.

20. Waarom kan daar altyd gesê word dat ons pogings nie tevergeefs is nie?

²⁰ Jy sal ongetwyfeld baie mense in jou gebied ontmoet wat een of meer van hierdie drie eienskappe kortkom. Die profeet Jeremia het dieselfde ondervinding gehad. (Jeremia 1:17-19; vergelyk Mattheüs 5:3, NW.) Ons pogings is egter nooit tevergeefs nie. Waarom nie? Omdat ons Jehovah se naam en Koninkryk bekend maak. Deur ons predikingswerk en ons blote teenwoordigheid waarsku ons die goddeloses (Esegiël 33:33). En moet nooit vergeet dat ons self baat vind by ons pogings om die waarheid aan ander oor te dra nie (1 Timotheüs 4:16). Ons hou ons geloof sterk en ons Koninkrykshoop helder voor oë. Daarbenewens handhaaf ons ons onkreukbaarheid en neem ons deel aan die heiliging van Jehovah God se naam en verbly sodoende sy hart.—Spreuke 27:11.

21. Wat kan ter opsomming gesê word?

²¹ Ter opsomming: Kommunikasie is die doeltreffende meedeling van inligting. Die kommunikasiekuns is noodsaaklik, en wanneer kommunikasie ontbreek, het dit groot skade tot gevolg. Ons het gesien dat Jehovah God en Jesus Christus die vernaamste kommunikeerders is en dat Jesus Christus ’n kommunikasiekanaal vir ons dag ingestel het. Ons het ook gesien dat ons deur middel van ons persoonsversorging en gedrag kommunikeer en boodskappe aan ander oordra. Ons het geleer dat redenering ’n belangrike rol speel wanneer ons met mense probeer kommunikeer en dat ons beskeie en nederig moet wees, empatie moet betoon, geduldig moet wees en bowenal deur ’n hart vol liefde aangedryf moet word as ons doeltreffend wil kommunikeer. As ons hierdie eienskappe aankweek en Bybelse voorbeelde volg, sal ons suksesvolle Christelike kommunikeerders wees.—Romeine 12:8-11.

[Voetnoot]

Hoe sal jy antwoord?

◻ Hoe begin ons kommunikeer nog voor ons iets gesê het?

◻ Wat is ’n paar voorbeelde van kommunikasie deur goeie redenasie?

◻ Watter eienskappe het Jesus Christus en Paulus in staat gestel om doeltreffend te kommunikeer?

◻ Waarom moet ons nie ontmoedig raak as daar nie onmiddellik resultate is nie?