Geteister deur stres!
“AMERIKA se grootste gesondheidsprobleem.” So lui die opskrif van ’n artikel wat deur die Amerikaanse Instituut vir Stres gepubliseer is en beweer dat die grootste gesondheidsgevaar vandag nie kanker of vigs nie. Die verslag sê: “Volgens skatting is 75-90 persent van alle besoeke aan algemene praktisyns weens stresverwante probleme.”
Dit is nie ’n oordrywing om te sê dat mense vandag deur stres geteister word nie. Volgens die Nasionale Verbruikersvereniging “is werk die grootste oorsaak van stres onder volwassenes wat probleme en stres ondervind (39%), gevolg deur die gesin (30%). Ander oorsake sluit gesondheid (10%), besorgdheid oor die ekonomie (9%) en besorgdheid oor internasionale konflikte en terrorisme (4%) in.”
Maar stres kom natuurlik nie net in die Verenigde State voor nie. ’n Britse opname in 2002 het geskat dat “meer as ’n halfmiljoen mense in Brittanje in 2001/2 gemeen het dat hulle soveel werkverwante stres ondervind dat dit hulle siek maak”. As gevolg van “werkverwante stres, depressie of angstigheid” gaan daar “volgens berig ongeveer dertien en ’n half miljoen werksdae per jaar in Brittanje verlore”.
Die situasie is net so somber in Europa. Volgens die Europese Agentskap vir Veiligheid en Gesondheid by die Werk “is daar al bewys dat werkverwante stres miljoene Europese werkers in alle werksektore aantas”. Een opname het aan die lig gebring dat “ongeveer 41 miljoen werkers elke jaar [in die Europese Unie] deur werkverwante stres aangetas word”.
Wat van Asië? ’n Verslag wat deur ’n konferensie in Tokio uitgereik is, het tot die volgende slotsom gekom: “Werkstres is ’n algemene bekommernis in talle lande van die wêreld, in ontwikkelende sowel as geïndustrialiseerde lande.” Die verslag het gesê dat “verskeie lande in Oos-Asië, insluitende China, Korea en Taiwan, vinnig geïndustrialiseer is en ekonomies gegroei het. Hierdie lande is nou baie bekommerd oor werkstres en die nadelige uitwerking wat dit op werkers se gesondheid het.”
Maar jy het nie ’n navorsingstudie nodig om vir jou te sê dat mense stres ondervind nie. Stres eis heel waarskynlik ook sy tol in jou lewe! Watter skadelike uitwerking kan stres op jou en jou geliefdes hê? Hoe kan gesinne leer om dit die hoof te bied? Die volgende artikels sal hierdie vrae bespreek.
[Prent op bladsy 3]
Vir baie is hulle werk hulle grootste bron van stres