Van ons lesers

Vaders Ek het so pas die reeks “Wat beteken dit om ’n goeie vader te wees?” (22 Augustus 2004) gelees. Ek wil my werkrooster aanpas sodat ek meer tyd vir gesins- en gemeentelike verantwoordelikhede het. My finansiële situasie laat my soms voel dat ek meer geld moet verdien deur meer sekulêre werk te doen. Maar hierdie reeks het my oortuig dat die tyd wat ek saam met my gesin bestee, baie belangriker is as geld. Ek is aangemoedig deur die ondervindinge van suksesvolle vaders.

K. S., Japan

Ek en my suster het hierdie reeks regtig waardeer. Ons kommunikeer baie min met ons pa. Ons is natuurlik lief vir hom, en al sê hy nie so nie, glo ons dat hy dieselfde voel. Toe ons hierdie artikels gelees het, het dit ons laat voel dat iemand ons verstaan. Ons sê opreg dankie!

V. D., Italië

Beroemdheid Die artikel “Iets beters as beroemdheid” (22 Augustus 2004) was ’n antwoord op my gebede. Dit het my oortuig dat ek ’n wyse besluit geneem het toe ek die voltydse evangelisasiewerk hervat het. Soos die artikel toon, het Charles se pa aanvanklik nie met sy besluit saamgestem nie. Maar hoe is hy tog later geseën! Ek hoop dat my ma eendag my besluit sal goedkeur om my diens aan Jehovah uit te brei. Dankie dat julle deur middel van sulke artikels Jehovah se getroue knegte aan ons bekend stel.

J. P., die Oekraïne

As ’n jong persoon vind ek soms dat my aandag afgetrek word deur die wêreld en wat dit skynbaar aanbied. Om die waarheid te sê, die sekulêre beroep wat ek gekies het, kan my beroemd maak. Nadat ek hierdie artikel gelees het, het ek besef dat ek nie werklik beweeg is om Jehovah te dien toe ek my beroepskeuse gemaak het nie. Broer Charles Sinutko se lewensverhaal het my geraak omdat hy self beroemdheid gesmaak het, en tog het hy gekies om Jehovah te dien. Hierdie artikel het vir my gewys dat daar niks beters in hierdie wêreld is as om Jehovah voltyds te dien nie.

R. K., Kanada

Ek is beïndruk deur die feit dat broer Sinutko ’n belowende sangloopbaan die rug toegekeer het sodat hy Jehovah voltyds kon dien. Ek geniet die pionierdiens saam met my man. Ons wil broer Sinutko se voorbeeld volg deur geloof in Jehovah te stel en God se Koninkryk altyd die eerste plek in ons lewe te gee. Dankie vir hierdie opbouende ondervinding!

E. S., Japan

Voorhuwelikse seks Ek wil julle bedank vir die artikel “Jongmense vra . . . Hoe kan ek voorhuwelikse seks vermy?” (22 Augustus 2004). As ’n onderwyseres en voorligter het ek hierdie artikel baie interessant gevind. By ’n klasbespreking het ek nuttige punte uitgelig om die leerlinge te help sodat hulle as heilig en kuis deur Jehovah God beskou kan word en hulle goeie vordering in hulle studies kan maak sonder om die probleme te ervaar wat met voorhuwelikse seks gepaardgaan. Baie leerlinge het belangstelling getoon en wou meer omtrent die Bybel leer! Sedertdien het party onderwysers my gevra om met leerlinge in hulle klas te praat. Ek bespreek elke week verskeie onderwerpe uit die Jongmense vra . . . -boek met die leerlinge in my klas.

B. C., Mosambiek

Ek is 25 jaar oud en doen my bes om kuis te bly. Ek is nou meer vasbeslote as ooit tevore om in ’n eerbare huwelik te tree. Hou aan met julle wonderlike werk.

F. K., Uganda