Van ons lesers

Vooroordeel Dankie vir die reeks “Sal vooroordeel ooit tot ’n einde kom?” (8 September 2004). Terwyl ek dit gelees het, het ek besef dat ek self ’n probleem met vooroordeel het. Dit is ironies omdat ek dikwels kwaad raak vir mense wat vooroordeel openbaar. Ek weet dat hierdie tydskrif my sal help.

M. U., Verenigde State

Al woon ek ver van my geboorteland af, voel ek nie dat ek ’n slagoffer van vooroordeel is nie. Maar hierdie reeks het my gehelp om empatie te hê vir dié wat wel slagoffers hiervan is. Ons is dankbaar dat Jehovah binnekort ’n einde aan hierdie probleem sal maak!

T. G., Noorweë

Ek wil julle graag prys vir julle poging om mense bewus te maak van die probleem van vooroordeel. Maar ek dink tog dat julle julle op bladsye 8 en 9 self skuldig maak aan diskriminasie. Daar beskryf julle twee Jode wat verbygeloop het en nie ’n beseerde man wou help nie. Waarom sonder julle die Jode uit?

H. H., Verenigde State

“Ontwaak!” antwoord: Dit was die Joodse man Jesus wat die verhaal van die barmhartige Samaritaan vertel het. In Jesus se dag het baie Jode vooroordeel teenoor Samaritane geopenbaar. Deur te wys hoe iemand van ’n ander ras naasteliefde teenoor ’n Jood betoon, het Jesus dus vir sy Joodse luisteraars ’n baie waardevolle les geleer.

Geestesiektes Dankie vir die artikel “Wanneer ’n geliefde ’n geestesiekte het” (8 September 2004). My ma ly al jare lank aan ’n geestesiekte. Ek verstaan nou dat ek haar moet aanmoedig om hulp te kry en dat dit nie ’n skande is om dit te doen nie.

M. P., die Oekraïne

Ek is maar net 16, maar ek ly al jare lank aan depressie. Baie dankie dat julle so ’n nuttige artikel geskryf het om my deur moeilike tye te help. Ek sal beslis nie die enigste een wees wat hierby baat vind nie.

K. J., Duitsland

Hou aan om sulke artikels te skryf! Dit help ons almal om te besef dat ons geduldiger en liefdevoller moet wees en die nodige hulp moet kry. Hoe sien ons tog daarna uit om in God se nuwe wêreld te lewe, waar ons vry van sulke aftakelende siektes sal wees!

K. F., Verenigde State

Jongmense Ek is 15 jaar oud, en ek het ook al dikwels met onderwysers en klasmaats oor my geloof gepraat. Dit is waar wat die artikel “Jongmense wat onbeskroomd oor hulle geloof praat” (8 September 2004) sê—om by die skool te getuig, is werklik ’n beskerming. Hou aan om sulke uitstekende artikels te skryf!

R. B., Duitsland

Paradys Ek het die artikel “’n Stukkie paradys” (8 September 2004) geniet. Baie van die diere wat genoem is, het ek nog nooit van gehoor nie! Ek wil van nou af probeer om elke nommer van die Ontwaak! te lees.

W. C., Frankryk

Baie dankie vir hierdie artikel. Ek verlaat selde die dorpie waar ek woon, maar deur middel van die bladsye van Ontwaak! kan ek gereeld “op reis gaan”. Die prag van Jehovah se skepping vervul ons met ontsag en maak ons bewus van sy groot liefde.

D. H., Verenigde State

Iets beters Ek is diep getref deur die lewensverhaal van Charles Sinutko, soos vertel in die artikel “Iets beters as beroemdheid” (22 Augustus 2004). Broer Sinutko het sy beroep verlaat en beroemdheid en rykdom die rug toegekeer om Jehovah te dien. Hy en sy vrou was tevrede met eenvoudige lewensomstandighede. Hulle sterk geloof het my tot trane beweeg en my vertroue in Jehovah versterk. Ek is aangemoedig om my kragtig in die bediening in te span. Dankie vir hierdie aanmoedigende lewensverhaal.

I. B., Pole