Ons beskou die wêreld

Speen kinders van die TV

In ’n vyf maande lange studie waarby 16 kleuterskole in die noorde van die staat New York betrokke was, is bevind dat kinders wat eenvoudige lesse in alternatiewe vir TV ontvang het, “drie uur per week minder TV gekyk het”, berig The New York Times. Die lesse het die kinders aangemoedig om te lees en dinge te doen soos om tafelmatjies vir die gesin te maak sowel as “Geen TV”-tekens vir elke TV-stel in die huis. Die kinders het self ook ander dinge voorgestel om te doen wanneer hulle nie TV of video’s kyk nie. Ouers is aangemoedig om daagliks vir hulle kinders stories te lees en om die TV tydens etes af te sit. Gedurende die studie het dit twee keer gebeur dat gesinne die TV ’n week lank glad nie aangeskakel het nie. Die hoofnavorser, dr. Barbara Dennison, het gesê dat ouers nie moet voel dat dit onmoontlik is om die gewoonte om TV te kyk, af te leer nie en het gemeld dat “kinders verbasend maklik alternatiewe aanvaar”.

Tabak nadelig vir die hele liggaam

“Rokers stel meer as net hulle longe en slagare in gevaar: alle weefsel word beskadig”, berig New Scientist. ’n Verslag wat deur die Amerikaanse geneesheer-generaal Richard H. Carmona gepubliseer is, lys tientalle siektes wat met tabakgebruik verbind is, onder andere longontsteking, leukemie, katarakte, tandvleissiekte en kankers van die niere, serviks, maag en pankreas. “Ons weet al dekades lank dat rook sleg is vir jou, maar hierdie verslag toon dat dit selfs erger is as wat ons gedink het”, sê Carmona. “Gifstowwe in sigaretrook bereik al die plekke waar bloed heen vloei.” Vir diegene wat dink dat hulle gevaar kan vermy deur oor te slaan na sigarette met ’n laer teer- en nikotieninhoud, voeg Carmona by: “Daar is geen veilige sigarette nie, ongeag of dit ‘lig’, ‘ultralig’ of enigiets anders genoem word.” Hy het uitgewys dat rokers gewoonlik 13 tot 14 jaar vroeër sterf as nierokers. “Rook veroorsaak siekte in byna elke orgaan in die liggaam gedurende elke stadium van die lewe”, het Carmona volgens The New York Times gesê.

Hulle smee van wapens speelgrondtoerusting

In Brasilië is ’n veldtog op tou gesit om die aantal wapens wat sy bevolking besit, te verminder. Vergoeding vir elke wapen wat vrywillig ingegee is, het gewissel van R180 tot R600. Volgens Folha Online is meer as 200 000 wapens tussen Julie en Desember 2004 in die land versamel. Wapens wat in die staat São Paulo versamel is, is uitmekaar gebreek, saamgepers, gesmelt en toe omskep in speelgrondtoerusting wat in ’n stadspark opgerig is. Die park het nou ’n wipplank, ’n swaai en ’n glyplank wat alles van die herwonne materiaal gemaak is. Die minister van justisie, Márcio Thomaz Bastos, het gesê: “Een van die belangrikste oogmerke van die veldtog is die skepping van ’n kultuur van vrede.”

Minder nonne

“In Argentinië wil al hoe minder vroue nonne word”, het die Buenos Airese koerant Clarín in 2004 berig. Dit het bygevoeg: “In die afgelope vier jaar het die aantal nonne met 5,5 persent gedaal, van 9 113 in 2000 tot 8 612 vanjaar. Die afname is baie erger—amper 36 persent—as dit vergelyk word met 1960, toe daar 13- 423 nonne was.” Party redes wat vir die afname aangevoer is, is “die onaantreklike beeld wat godsdiensberoepe het”, en “die vrees vir ’n lewenslange verbintenis” tot ’n geestelike loopbaan. Gedurende dieselfde tydperk het die aantal priesters afgeneem. “Baie voel dat die afname in die komende jare sal vererger”, het Clarín gesê, “en almal stem saam dat dit ’n wêreldwye verskynsel is.”

Bootreise as bejaardesorg

Die koste van bejaardesorg het so hoog geword dat party mense voorstel dat bejaardes op ’n toerskip woon as ’n aantreklike alternatief vir die lewe in ’n sentrum wat ondersteunde bejaardesorg bied. Volgens ’n verslag in die Journal of the American Geriatrics Society is “toerskepe soortgelyk aan ondersteundesorgsentrums ten opsigte van die geriewe wat aangebied word, maandelikse koste en baie ander aspekte”. Trouens, baie toerskepe bied dienste aan wat hierdie sentrums nie altyd voorsien nie. Dit kan die volgende insluit: ’n dokter wat 24 uur per dag op die perseel beskikbaar is, persoonlike begeleiding na alle maaltye sowel as huishoudings- en wasserydienste. Ander voordele behels die opwinding van reise en die geleentheid om mense te ontmoet. Die verslag sê ook dat “meer besoekers geneig sal wees om ‘by Ouma te gaan kuier’ as sy op ’n toerskip woon”.

Panieksteurnis

“Panieksteurnis kan enige tyd aanvalle veroorsaak en kan lyers selfs in die nag wakker maak met simptome wat borspyn, kortasemheid, intense vrees, verstikking, sweet en ’n drang om te vlug insluit”, sê die koerant Vancouver Sun. ’n Onlangse verslag wat opgestel is uit onderhoude met 36- 894 deelnemers toon dat die steurnis 3,7 persent van Kanada se bevolking van 15 jaar en ouer, of omtrent eenmiljoen mense, aantas. Meer vroue (4,6 persent) as mans (2,8 persent) het gesê dat hulle al ’n paniekaanval gehad het. “Dit is byna twee keer meer waarskynlik dat [diegene wat aan die steurnis ly] drank as ’n manier sal gebruik om die probleem die hoof te bied en byna drie keer meer waarskynlik dat hulle meer sal rook as mense wat nie aan die toestand ly nie”, sê die koerant. Vanuit ’n positiewe oogpunt beskou, soek byna 70 persent van lyers professionele mediese hulp. Volgens die verslag glo dr. Jacques Bradwejn, die voorsitter van die departement psigiatrie van die Universiteit van Ottawa, dat die aanvalle “deur stresvolle lewensgebeurtenisse aangebring kan word”, hoewel genetiese en biologiese faktore die steurnis kan veroorsaak.

Die grootste voedselskandaal

Volgens die Voedsel- en Landbou-organisasie van die Verenigde Nasies (VLO) gaan omtrent vyfmiljoen kinders elke jaar dood van die honger, berig die Italiaanse koerant Corriere della Sera. Die VLO-verslag toon dat daar wêreldwyd 852 miljoen mense is wat nie genoeg voedsel het nie—815 miljoen in onderontwikkelde lande, 28 miljoen in ontwikkelende lande en 9 miljoen in ontwikkelde lande. Die verslag haal ’n verklaring aan wat onderteken is deur verteenwoordigers van 110 nasies wat die Wêreldleiersberaad oor Honger vir 2004 by die VN-hoofkwartier in New York bygewoon het. ’n Gedeelte daarvan sê: “Die grootste skandaal is nie dat honger bestaan nie, maar dat dit voortbestaan al is dit binne ons vermoë om dit uit die weg te ruim.”