Maniere om beheer daaroor te kry
“AS ONS dit eers aangeskakel het, het ons na enigiets gekyk wat gewys het, die een ding na die ander”, het Claudine gesê. “Ons het dit nie afgeskakel totdat ons reg was om te gaan slaap nie.” Sommige sê: “Ek kan net nie my oë daarvan afhou nie”, en ander: “Ek wil nie soveel TV kyk nie, maar ek kan dit nie help nie.” Kyk jy te veel televisie? Is jy bekommerd oor die uitwerking wat TV dalk op jou gesin het? Hier is ’n paar wenke wat jou kan help om jou TV-kykery te beheer.
1. VIND UIT HOEVEEL JY KYK. “Die skerpsinnige gee ag op sy voetstappe”, sê Spreuke 14:15. Dit is verstandig om jou kykgewoontes te ondersoek om te sien of jy veranderinge moet aanbring. Hou sowat ’n week lank ’n dagboek en skryf neer hoeveel tyd jy aan TV-kykery bestee. Jy sal dalk ook die programme wil neerskryf waarna jy gekyk het, wat jy geleer het en hoeveel jy daardie programme geniet het. Die hoofdoel is egter om te bepaal hoeveel tyd jy voor die TV deurbring. Jy sal dalk verbaas wees oor wat jy uitvind. As jy weet hoeveel van jou lewe aan televisie gewy word, sal dit jou moontlik aanspoor om veranderinge aan te bring.
2. VERMINDER JOU KYKTYD. Probeer om een dag per week, ’n hele week of ’n maand lank sonder TV klaar te kom. Of jy kan dalk beperkings plaas hoeveel tyd jy elke dag voor die TV deurbring. As jy elke dag ’n halfuur minder TV kyk, sal jy elke maand 15 uur spaar. Gebruik daardie tyd in sinvolle bedrywighede, soos om geestelike belange na te streef, ’n goeie boek te lees of tyd saam met familie en vriende deur te bring. Studies het getoon dat mense wat min TV kyk, dit meer geniet as mense wat baie TV kyk.
Een manier om TV-kykery te verminder, is om die televisie uit die slaapkamer te verskuif. Kinders wat ’n TV in hulle kamer het, kyk byna een en ’n half uur meer TV as kinders wat nie ’n TV in die kamer het nie. Boonop weet ouers nie waarna ’n kind kyk wanneer daar ’n TV in die kind se kamer is nie. Ouers en egpare sal vind dat hulle meer tyd vir mekaar het as hulle ook die TV uit hulle slaapkamer verskuif. Party het besluit om glad nie ’n TV in die huis te hê nie.
3. BEPLAN WAARNA JY WIL KYK. Daar is natuurlik talle goeie programme om na te kyk. Gaan vooraf deur die TV-gids om die programme te kies waarna jy wil kyk, eerder as om heeltyd van een kanaal na die ander oor te skakel of na enigiets te kyk wat wys. Skakel die TV aan wanneer jou gekose program begin, en skakel die TV af wanneer dit klaar is. Of dalk wil jy die program opneem sodat jy dit later kan kyk, eerder as om dit te kyk wanneer dit uitgesaai word. Dan kan jy op ’n meer geleë tyd daarna kyk en die advertensies oorslaan.
4. WEES SELEKTIEF. Die Bybel het voorspel dat ons tyd gekenmerk sou wees deur mense wat “liefhebbers van hulleself [is], liefhebbers van geld, aanmatigend, hoogmoedig, lasteraars, ongehoorsaam aan ouers, ondankbaar, dislojaal, sonder natuurlike geneentheid, nie bereid tot enige ooreenkoms nie, kwaadsprekers, sonder selfbeheersing, wreedaardig, sonder liefde vir die goeie, verraaiers, eiesinnig, opgeblase van trots [en] liefhebbers van genot eerder as liefhebbers van God”. Jy sal waarskynlik saamstem dat baie televisiekarakters aan hierdie beskrywings beantwoord. Die Bybel maan: “Keer jou van hierdie mense af” (2 Timoteus 3:1-5). Ons word gewaarsku: “Moenie mislei word nie. Slegte omgang bederf nuttige gewoontes.”—1 Korintiërs 15:33.
Dit behels selfbeheersing om selektief te wees. Het jy al na die eerste paar minute van ’n drama of rolprent gekyk en, hoewel jy besef het dat dit onaanvaarbaar is, na die hele fliek gekyk net om uit te vind wat volgende gaan gebeur? Baie het al. Maar as jy die wilskrag het om die TV af te skakel sodat jy iets anders kan doen, sal jy waarskynlik vind dat jy nie werklik omgee wat gebeur het nie.
Lank voordat televisie uitgevind is, het die psalmis geskryf: “Ek sal geen waardelose ding voor my oë stel nie” (Psalm 101:3). Wat ’n goeie doelwit is dit tog vir ons om in gedagte te hou wanneer ons besluit waarna ons gaan kyk! Party, soos Claudine, het besluit om van hulle televisie ontslae te raak. Sy het gesê: “Ek het nooit besef hoe ongevoelig TV my gemaak het nie. Wanneer ek nou die geleentheid het om TV te kyk, is ek geskok oor die dinge wat my nie voorheen gepla het nie. Ek het gedink dat ek onderskeidingsvermoë aan die dag gelê het ten opsigte van die programme waarna ek gekyk het, maar nou besef ek dat dit nie die geval was nie. Wanneer ek na goeie dinge kyk, geniet ek dit meer.”
[Prent op bladsy 8]
Vervang TV-kykery met sinvoller bedrywighede
[Prent op bladsy 8]
Vervang TV-kykery met sinvoller bedrywighede
[Prent op bladsy 9]
Moenie huiwer om die TV af te skakel nie!