Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • g05 10/8 bl. 28-29
  • Ons beskou die wêreld

Video nie beskikbaar nie.

Jammer, die video kon nie laai nie.

  • Ons beskou die wêreld
  • Ontwaak!—2005
  • Onderhofies
  • Soortgelyke materiaal
  • Rotte help om mense te red
  • Opdraand of afdraand?
  • Seebodem wemel van lewe
  • Sjokolade is dodelik vir honde
  • Wanneer jou motor gesteel word
  • Tienerbestuurders
  • Waarskuwing oor tandbleikmiddels
  • Sjokolade—Van die boon tot by jou
    Ontwaak!—2005
  • Ons beskou die wêreld
    Ontwaak!—2001
  • Motorongelukke—Is jy veilig?
    Ontwaak!—2002
  • Is kinders veilig by jou hond?
    Ontwaak!—1997
Sien nog
Ontwaak!—2005
g05 10/8 bl. 28-29

Ons beskou die wêreld

Rotte help om mense te red

Metaalverklikkers, wat al lank gebruik word om landmyne op te spoor, “is stadig en tydrowend, want hulle reageer op elke stukkie metaal, wat dan nagegaan word”, berig die Suid-Afrikaanse koerant The Citizen. “Nou het ons die Gambiese reuserot, die nuutste wapen in die stryd om meer as 100 miljoen landmyne in sowat 60 lande te verwyder wat elke dag ongeveer 50 mense doodmaak of beseer.” Die groot knaagdier word saam met metaalverklikkers en honde gebruik om antipersoneelmyne op te spoor wat in Mosambiek oorgebly het, al het die burgeroorlog reeds in 1992 geëindig. “Landmyne”, sê die berig, “is ’n verraderlike nalatenskap van daardie konflik, en vandag nog word Mosambiekers daardeur vermink en doodgemaak, met inbegrip van kinders op die platteland wat gebore is lank nadat die geweerskote ophou klap het.” Die Gambiese reuserot met sy groot wangsakke waarin hy kos dra, kom in groot dele van Afrika voor, kan maklik mak gemaak word en is ’n gewilde troeteldier.

Opdraand of afdraand?

Maak dit enige verskil wat gesondheidsvoordele betref, of jy vir oefening teen ’n steil helling op- of afstap? Navorsers sê dat dit in party opsigte wel ’n verskil kan maak. ’n Studie is gedoen op ’n berg in die Alpe waar 45 vrywilligers vir twee maande teen ’n helling van 30 grade opgestap het en met ’n kabelkar afgekom het. Toe het hulle vir twee maande die teenoorgestelde gedoen. Hoewel stap in albei rigtings gehelp het om slegte cholesterol te verlaag, het die studie getoon dat “opdraand stap doeltreffender is om die vlak van die vette wat trigliseriede genoem word, te verlaag, [terwyl] afdraand stap beter was om bloedsuiker te verminder en glukoseverdraagsaamheid te verbeter”, sê Tufts University Health & Nutrition Letter. Om oefening te doen deur afdraand te stap, kan dus goed wees vir mense wat aan suikersiekte ly en is ’n bietjie makliker vir diegene wat net begin oefen. Stadsbewoners kan dit doen deur in hoër geboue met die hysbak op te gaan en dan met die trap af te klim of deur op ’n heuwel afgelaai te word en dan teen die heuwel af te stap en die motor onder te ontmoet. Maar hou in gedagte dat ’n mens se knieë aan groter druk onderwerp word wanneer jy oefening doen deur afdraand te stap.

Seebodem wemel van lewe

In ’n internasionale projek wat die Seelewe-sensus genoem word, word ’n uitgebreide studie van die see gedoen, wat die seebodem insluit. Tot dusver “is kennis omtrent die seelewe byna uitsluitlik beperk tot lewe naby die oppervlak, tot ’n diepte van 200 meter”, verduidelik die Spaanse koerant El País. Aangesien die grootste deel van die seebodem tussen 5 en 11 kilometer onder seevlak is, is 95 persent van die seebodem nog nie verken nie. Om hierdie moeilike deel van die sensus uit te voer, sal bioloë gesofistikeerde toestelle gebruik om spesies in hulle natuurlike omgewing op te spoor en af te neem, aangesien die eienskappe van party van hierdie lewensvorme merkbaar verander wanneer die diertjies na die oppervlak geneem word. ’n Span van 50 bioloë verwag dat hulle miljoene nuwe spesies in die diepsee sal vind. Die projekbestuurder, Pedro Martínez Arbizu, wys daarop dat 500 spesies in een vierkante meter van die seebodem naby die kus van Angola gevind is. “Negentig persent [daarvan] is vir die wetenskap onbekend en moet nog beskryf en name gegee word”, het hy gesê.

Sjokolade is dodelik vir honde

Sjokolade “veroorsaak braking en stuiptrekkings by honde” en “kan dodelik wees as hulle te veel daarvan eet”, waarsku BBC News. Sjokolade bevat teobromien, ’n chemiese stof wat giftig is vir honde en hulle hart, niere en sentrale senuweestelsel aantas. Die berig sê dat “[200 gram] donker sjokolade dodelik kan wees vir ’n hond wat [25 kilogram] weeg, soos ’n Labradorteef”. Net 30 gram onversoete baksjokolade kan ’n klein hond doodmaak. Maar nagemaakte hondesjokolade wat by troeteldierwinkels gekoop word, is veilig.

Wanneer jou motor gesteel word

Motordiefstal het ’n groot bedryf in Mexiko-stad geword, berig El Universal. Gemiddeld 80 motors word elke dag gesteel en dan herverkoop. Volgens een aanklaer lyk dit of mans wat alleen ry, as slagoffers verkies word, want die diewe meen dat dit waarskynliker is dat vroue sal skreeu of kinders by hulle sal hê, wat die diefstal moeiliker sal maak. Vyf-en-tagtig persent van die skuldiges wat gevang word, is jongmense tussen die ouderdomme van 18 en 25. Van die metodes wat meestal vir die diefstal gebruik word, is om die bestuurder met ’n wapen te dreig wanneer hy by ’n verkeerslig staan, om in die motor vas te ry sodat die bestuurder moet uitklim of om die motor te steel wanneer die bestuurder sy garage oopmaak. Die koerant beveel aan dat bestuurders nie weerstand bied nie, maar eerder kalm bly—veral as wapens gebruik word—en soveel inligting moontlik omtrent die misdadigers probeer onthou. Slagoffers wat hulle motor se registrasienommer en kleur ken en dit en ander gepaste inligting dadelik vir die polisie gee, sal dit makliker maak om hulle voertuig terug te kry.

Tienerbestuurders

Ouers wat dalk strenger beheer oor hulle tienerkinders se gebruik van die motor wil uitoefen, kan nou ondersteuning kry in onlangse navorsing deur die Amerikaanse Nasionale Gesondheidsinstitute. Volgens hierdie studie “is die deel van die brein wat gevaarlike gedrag onderdruk, eers teen die ouderdom van 25 heeltemal gevorm”, berig die internasionale uitgawe van The Miami Herald. Daar is voorheen gedink dat breinvolwassenheid ten minste teen die ouderdom van 18 bereik word, wanneer sintuie en reflekse op hulle beste werk. Maar statistiek van die Versekeringsinstituut vir Hoofwegveiligheid toon dat “dit vier keer waarskynliker is dat tieners in ’n ongeluk betrokke sal wees as ouer bestuurders en dat dit drie keer waarskynliker is dat hulle in ’n ongeluk sal sterf”, wat bewys dat hulle aandag maklik afgelei word en dat hulle geneig is om waaghalsig te wees terwyl hulle bestuur.

Waarskuwing oor tandbleikmiddels

Tandartse by die Fray Antonio Alcalde- Burgerlike hospitaal in Guadalajara, Mexiko, waarsku dat tandbleikmiddels skade en pyn kan veroorsaak, berig die koerant Milenio van Mexiko-stad. Dit kan “oppervlakkige tot diep verwering” van tande veroorsaak en is dalk nie eens doeltreffend om dit wit te maak nie. Volgens hierdie deskundiges kan gesonde tande ’n verskeidenheid kleure wees wat wissel van oranje tot grys. As iemand wit tande het, beteken dit nie noodwendig dat hy goeie tande het nie, sê die spesialis Rocío Liliana Hernández, al word mense wysgemaak dat wit tande die “mooiste en gesondste” is.

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel