Van ons lesers

Dokters Ek het onlangs die reeks “Toon begrip vir jou dokter” (22 Januarie 2005) gelees. Dankie dat julle die gevoelens van dokters so duidelik beskryf het. Ek is ’n verpleegster, en ek het self al die gebrek aan begrip tussen mediese personeel en pasiënte gesien. Ek hoop dat hierdie reeks baie mense sal help om mediese personeel beter te verstaan en hulle werk te waardeer.

L. K., Rusland

’n Dokter het my vertel dat hy die tydskrif met groot belangstelling gelees het. Hy het die navorsing geprys en gesê dat hy geheel en al met die inligting saamstem. Dankie vir hierdie wonderlike artikels.

H. Z., Duitsland

As ’n pasiënt het ek net aan myself gedink. Maar hierdie tydskrif het my gehelp om die stres wat dokters ondervind, te verstaan. Wanneer ek weer mediese behandeling ontvang, sal ek nie net konsentreer op hoe ek oor my siekte voel nie, maar ek sal die raad volg in die venster “Werk saam met jou dokter”. Ek wil ’n simpatieker pasiënt wees.

J. M., Japan

Ek is ’n Christen- ouer man en ’n geneesheer. Ek word veral deur empatie-uitputting geraak, omdat ek soveel pasiënte in ’n dag behandel. Die feit dat ek ’n Getuie van Jehovah is, het my gehelp om gebalanseerd in my werk te wees. Ek streef daarna om doeltreffend by die werk te wees sodat ek by die huis genoeg tyd vir my vrou en kinders en vir my Christelike bedrywighede kan hê. Ontwaak! help my om gebalanseerd te wees en my oë gevestig te hou op wat werklik belangrik is.

P. R., Verenigde State

Ek wil beswaar maak teen die bewering dat ‘party regsgeleerdes onbenullige eise instel om geld te maak’. Regsgeleerdes kry gewoonlik niks sonder ’n hofuitspraak of ’n skikking nie. Om ’n saak te wen, moet hulle kan bewys dat daar ’n skending was van die standaard van behandeling. Aangesien ek al meer as 30 jaar lank by wanpraktyksake betrokke is, kan ek vir julle sê dat ek honderde regsake verwerp het voordat ek een aanvaar het.

J. M., Verenigde State

“Ontwaak!” antwoord: Ons stelling dat ‘party regsgeleerdes onbenullige eise instel’, was nie ’n kommentaar oor hoe algemeen dit voorkom nie. Die punt wat ons wou maak, is dat die gereeldheid van wanpraktykgedinge vir baie dokters ’n bron van ware kommer is. Ongegronde regsgedinge vind beslis plaas. Die leser se kommentare is nogtans geldig. Die regstelsel het perke wat dit onprakties—dalk selfs oneties—kan maak om ’n onbenullige eis in te dien.

Jongmense vra Ek is 11 jaar oud. Ek het baie gehou van die artikel “Jongmense vra . . . Wat moet ek doen wanneer ander my van hulle probleme vertel?” (22 Januarie 2005). Daar is ’n meisie by die skool wat ’n baie moeilike lewe gehad het, en sy het my alles vertel. Om dinge te vererger, het haar oupa laas week doodgegaan. Ek het baie punte in hierdie artikel gevind wat my sal help om haar te troos. Dit maak my hart baie bly om te weet dat Jehovah heeltemal verstaan wat jongmense deurmaak.

A. H., Verenigde State

Ek is 14 jaar oud, en baie van my portuurs kom na my toe vir raad. Elke nou en dan het hulle probleme waarmee ek hulle nie kan help nie. Ek verduidelik vriendelik waarom ek hulle nie kan help nie, en soms wys ek hulle wat die Bybel sê. Nou vra my skoolmaats my vrae oor my godsdiens. Dit het my aangespoor om “Wie is Jehovah se Getuies werklik, en wat glo hulle?” as die onderwerp te gebruik vir ’n praatjie wat ek moet hou.

B. D., Kanada