Pandemies—Wat die toekoms inhou

VIR sommige wat die 1918-19-griepepidemie bestudeer het, was dit ’n kragtige herinnering aan Bybelprofesieë. Gina Kolata skryf byvoorbeeld in haar boek Flu—The Story of the Great Influenza Pandemic of 1918 and the Search for the Virus that Caused It: “Hulle het die plaag van 1918 griep genoem, maar dit was anders as enige griep van die verlede. Dit was eerder soos ’n Bybelprofesie wat in vervulling gegaan het.”

Is daar enigiets opgeteken in die Bybel wat moontlik met hierdie menseramp verband hou? Om die waarheid te sê, daar is.

Bybelprofesie en pessiektes

Die dissipels van Jesus Christus het hom ’n teken gevra van “die voleinding van die stelsel van dinge” (Matteus 24:3). Jesus het geantwoord en gesê: “Nasie sal teen nasie opstaan en koninkryk teen koninkryk; en daar sal groot aardbewings wees, en op die een plek na die ander pessiektes” (Lukas 21:7, 10, 11). Die Bybel voorspel ook dat daar gedurende die tyd van die einde “dodelike plae” sal wees.—Openbaring 6:8.

Die Spaanse griepepidemie het teen die einde van die Eerste Wêreldoorlog (1914-18) uitgebreek. Daardie tydperk was die begin van die vervulling van Bybelprofesieë aangaande “die laaste dae”. Hierdie profesieë meld verskriklike voedseltekorte, groot aardbewings, ’n toename in wetteloosheid en ’n buitengewone agteruitgang in waardes. Jy is ongetwyfeld deeglik bewus van hierdie einste toestande in die wêreld van vandag.—Matteus 24:3-14; 2 Timoteus 3:1-5.

Die vervulling van die profesieë aangaande “pessiektes” en “dodelike plae” het ongekende vrees, ellende en lewensverlies tot gevolg gehad. En volgens die tydskrif Microbes and Infection “het ons geen rede om te dink dat daar nie weer een of ander tyd in die toekoms ’n pandemie sal plaasvind nie. Dit lyk onafwendbaar.”

Die bedreiging duur voort

Die tydskrif Emerging Infectious Diseases van April 2005 sê: “Optimiste het vroeër gedink dat die bedreiging van ernstige besmetlike siektes teen hierdie tyd iets van die verlede sou wees.” Die tydskrif voeg egter by dat “besmetlike siektes bly kop uitsteek”. Die tydskrif Nature van 8 Julie 2004 meld die gevolge: “Daar is jaarliks sowat 15 miljoen . . . sterftes regoor die wêreld wat direk verband hou met besmetlike siektes.”

“Die verskyning van vigs het mense opnuut bewus gemaak van die onafwendbaarheid en gevolge van besmetlike siektes”, verduidelik Nature. “In die 45 lande wat die meeste geraak word”, berig UNAIDS, ’n vigs-program wat deur die Verenigde Nasies en ander groepe geborg word, “sal daar tussen 2000 en 2020 na raming 68 miljoen mense ontydig as gevolg van vigs sterf.”

In die afgelope 25 jaar was vigs ’n verwoestende plaag wat meer as 20 miljoen mense se dood veroorsaak het. Maar die Spaanse griep het sy verwoesting in net meer as ’n jaar gesaai. Volgens herhaalde waarskuwings lyk dit nou asof ’n aggressiewe vorm van griep waarvoor die wêreld nie gereed is nie, lankal reeds sy verskyning moes gemaak het.

Op 19 Mei 2005 het Reuters Alert Net ’n waarskuwing gerig oor die herhaalde verskyning van nuwe griepvirusse en bygevoeg dat dit “’n voortdurende bedreiging inhou wat kan vererger en pandemiese afmetings kan aanneem”. The Wall Street Journal van die vorige dag het gesê: “Die voëlgriepvirus wat tans in Asië voorkom, staan bekend as H5N1 en is die eerste keer in 1997 in Hongkongse pluimveemarkte gesien. Dit is besonder aggressief—tot 80% van diegene wat dit opdoen, sterf daaraan.” Die virus kan blykbaar mense besmet wat in noue kontak met besmette diere kom.

Die toekoms—Donker of helder?

Ons vooruitsigte vir ’n gesonde toekoms lyk dalk nie helder nie. Toe Jesus Christus van pessiektes gedurende die laaste dae gepraat het, het hy beslis te kenne gegee dat daar rede tot kommer is. Maar die Bybel gee ons ook hoop. God het byvoorbeeld voor die wêreldvloed ’n belofte aan Noag en sy gesin gemaak. Eers het hy Noag oor die naderende vernietiging gewaarsku, maar toe het hy Noag beveel om ’n ark te bou, waarin hy en ander beskerming sou vind (Genesis 6:13, 14; 7:1). Die apostel Petrus het verduidelik dat “die geduld van God in Noag se dae gewag het, terwyl die ark gebou is”, en nadat die ark voltooi is, is die oorlewendes “veilig deur die water heen gevoer”.—1 Petrus 3:20.

Jesus Christus, wat baie [dinge] voorspel het aangaande die wêreldtoestande wat ons vandag sien, het geopenbaar dat ons tyd met dié van Noag sou ooreenstem. Diegene wat, soos Noag, op God vertrou, het die vooruitsig om ’n ontsaglike vernietiging te oorleef (Lukas 17:26, 27). Johannes, ’n apostel van Jesus, het geskryf: “Die wêreld gaan verby en so ook sy begeerte, maar hy wat die wil van God doen, bly vir ewig.”—1 Johannes 2:17.

Die huidige wêreldstelsel sál dus tot ’n einde kom. Watter soort lewe sal oorlewendes geniet? Die apostel Johannes het ’n visioen ontvang van die wonderlike toestande wat op aarde sal heers onder die heerskappy van God se Koninkryk: “[God] sal by hulle woon, en hulle sal sy volke wees. En God self sal by hulle wees. En hy sal elke traan van hulle oë afvee, en die dood sal daar nie meer wees nie, en ook verdriet en angsgeroep en pyn sal daar nie meer wees nie. Die vorige dinge het verbygegaan.”—Openbaring 21:3, 4.

Jou toekoms hoef nie donker te lyk nie. As jy van God leer en ten volle op hom vertrou, wag daar ’n helder toekoms op jou. Die onfeilbare belofte van God is dat die dooies in sy nuwe wêreld opgewek sal word (Johannes 5:28, 29; Handelinge 24:15). En pessiektes sal vir ewig iets van die verlede wees. In ’n profesie wat in daardie nuwe wêreld vervul sal word, belowe die Bybel: “Geen inwoner sal sê: ‘Ek is siek’ nie.”—Jesaja 33:24.

[Prent op bladsy 10]

Die Bybel belowe ’n nuwe wêreld waarin “geen inwoner sal sê: ‘Ek is siek’ nie”