Beskerm jou gesin teen griep
In Jesus se profesie oor die einde van die teenswoordige stelsel van dinge het hy voorspel dat “siektes op baie plekke sal uitbreek” (Lukas 21:11, The New Testament in Plain English). Griep, of influensa, is een van hierdie siektes.
GRIEP word veroorsaak deur ’n virus, ’n mikroskopiese agens wat lewende selle binnedring en die werking daarvan oorneem om meer virusse voort te bring. Die griepvirus, wat die asemhalingstelsel aanval, word hoofsaaklik van een persoon na ’n ander oorgedra in druppeltjies liggaamsvloeistowwe wat vrygestel word wanneer die besmette persoon nies, hoes of selfs praat. ’n Pandemie breek uit wanneer baie mense oor ’n groot gebied besmet word.
Virusse tas nie net mense aan nie, maar ook diere en voëls. Griepvirusse word gekategoriseer as tipe A-, B- of C-virusse. Tipe A is die algemeenste oorsaak van griep. Virusstamme word hoofsaaklik geklassifiseer volgens twee proteïene wat op die oppervlak van die virus gevind word: hemagglutinien (H) en neuraminidase (N).
Die grootste bekommernisse in verband met griepvirusse is dat dit baie vinnig kan vermenigvuldig met variasies wat voortdurend verander en dat verskillende stamme met mekaar kan verbind en ’n nuwe stam kan voortbring. As ’n stam uniek genoeg is, sal die menslike immuunstelsel dalk geen weerstand daarteen hê nie.
Griep is gewoonlik algemener gedurende koue maande. Onlangse navorsing toon dat die buitenste membraan van ’n virus in koue temperature ’n beskermende jel word wat die virus langer in die lug laat oorleef, maar wat dan in die hoër temperature van die menslike asemhalingskanaal smelt en infeksie veroorsaak. Koue lug veroorsaak nie virusinfeksies nie, maar dit kan die omstandighede skep wat infeksies laat versprei.
Beskermingsmaatreëls
Omdat regerings besef dat dit belangrik is om voorbereid te wees, het baie van hulle reeds planne van aksie saamgestel. Maar wat kan jy doen? Kom ons kyk na drie basiese beskermingsmaatreëls:
Versterk die liggaam: Maak seker dat jou gesin genoeg slaap kry en voedsel eet wat die liggaam sal help om sy weerstand te versterk. ’n Groot deel van jou dieet moet bestaan uit vars vrugte en groente, volgraankosse en laevetproteïene, wat die nodige aminosure voorsien om die immuunstelsel te versterk.
Skep ’n omgewing wat ongunstig is vir kieme: Sorg dat werksoppervlakke en tafels sover moontlik elke dag heeltemal skoon is. Was skottelgoed elke keer nadat jy dit gebruik het, en was beddegoed gereeld. Ontsmet dinge waaraan mense raak: deurhandvatsels, telefone, afstandbeheerders. Indien moontlik, maak seker dat daar goeie ventilasie is.
Maak persoonlike higiëne ’n gewoonte: Was jou hande deeglik met seep en water of met ’n handreiniger met ’n alkoholbasis. (As dit prakties is, dra ’n botteltjie handreiniger saam met jou.) Probeer om handdoeke waarmee jy jou gesig of hande afdroog, met niemand te deel nie, nie eers met ander gesinslede nie.
Moenie met ongewaste hande aan jou oë, neus of mond raak nie. Indien moontlik, hou sneesdoekies voor jou mond en neus wanneer jy hoes of nies, en gooi dit dadelik weg. Moenie toestelle deel wat kieme maklik kan versprei nie, soos telefone. Kinders moet deeglik opgelei word om hierdie gewoontes te volg. Hierdie gewoontes behoort te alle tye gevolg te word, maar veral gedurende die griepseisoen.
Neem ander in ag
’n Dag voordat jy enige simptome toon en tot vyf dae nadat jy siek geword het, kan jy ander begin aansteek. Simptome is soortgelyk aan die gewone verkoue, maar baie intenser. Dit sluit koors (gewoonlik hoog), hoofpyn, intense moegheid, ’n droë hoes en spierpyn in. ’n Loopneus en maagsimptome—soos naarheid, braking en diarree—is algemener by kinders as by volwassenes. As jy simptome het, bly indien moontlik tuis en probeer om ander nie aan te steek nie.
Kry genoeg rus en drink baie vloeistowwe. Antivirale medisyne kan help, maar net as dit geneem word kort nadat die simptome begin. Aspirien (asetielsalisielsuur) moenie vir kinders gegee word wat griep het nie. Kry mediese noodsorg as jy simptome het wat soortgelyk is aan dié van longontsteking, soos moeilike asemhaling, borspyn of hewige en aanhoudende hoofpyn.
Dit kan ’n angswekkende ondervinding wees om griep te hê. As jy voorbereid is, kan dit jou help om makliker daardeur te kom. Maar wat meer is, jy kan na die tyd uitsien wanneer “geen inwoner sal sê: ‘Ek is siek’ nie”, soos die Bybel belowe.—Jesaja 33:24.
[Venster op bladsy 27]
’N ERNSTIGE VORM VAN GRIEP
Die griep wat in 2009 eerste in Mexiko geïdentifiseer is, is van die H1N1-stam, soortgelyk aan die Spaanse griep van 1918, waaraan tienmiljoene mense gesterf het. Maar dit bevat ook elemente wat in die virusse gevind word wat varke en voëls aantas.
[Venster/Prente op bladsy 28, 29]
MANIERE OM JOU EN ANDER TE BESKERM
1. Hou iets voor jou mond wanneer jy hoes
2. Was jou hande
3. Laat vars lug in jou huis in
4. Hou dit skoon
5. Probeer tuis bly as jy siek is
6. Vermy persoonlike kontak
[Venster/Prent op bladsy 29]
WANNEER ’N MEDIESE NOODGEVAL ONTSTAAN
Volg in die eerste plek die instruksies van gesondheidsbeamptes. Moenie paniekerig raak of oorreageer nie. Hou streng by die goeie gewoontes wat in hierdie artikel bespreek word. Vermy groot groepe mense indien moontlik. As jy siek is, kan ’n gepaste gesigsmasker nuttig wees. Was jou hande gereeld. Sorg dat jy ’n voorraad onbederfbare voedselprodukte het wat jou ongeveer twee weke sal hou, asook gesondheidsprodukte en reinigingsmiddels ingeval jy nie by ’n winkel kan uitkom nie.
Wanneer jy by die werk, plekke van aanbidding of by enige ander plek is waar jy tussen baie mense is, moet jy die wenke volg wat voorsien word. Sorg ook dat die vertrek waarin jy is, genoeg vars lug het.
[Prent op bladsy 27]
Die H1N1-griepvirus, vergroot
[Erkenning]
CDC/Cynthia Goldsmith