Van ons lesers

Berge—noodsaaklik vir lewe op aarde (22 Maart 2005) My besoek aan die Grand Teton was een van die ongelooflikste ondervindinge in my lewe. Maar toe ek die artikel lees oor hoe noodsaaklik berge is, is ek met verwondering vervul. Ek het nou ’n baie groter waardering vir die berge op ons aarde en vir die wonderlike Skepper wat dit ontwerp het.

J. G., Verenigde State

Wanneer ek die prag van Jehovah se skepping sien, het ek nie woorde om my gevoelens uit te druk nie. Ten spyte van die mens se aggressiwiteit en die besoedeling van die omgewing kan ons nog steeds die berge waardeer en geniet. Ek put vreugde daaruit om ander te vertel wat in die nabye toekoms gaan gebeur, soos in Psalm 72:16 belowe word.

R. C., Verenigde State

Jongmense vra . . . Waarom moet ek fisiese werk doen? (22 Maart 2005) Ek werk by ’n verfmaatskappy wat deur my pa bestuur word, maar iemand het vir my gesê dat ’n mens nie jou kop hoef te gebruik met hierdie soort werk nie. Die artikel het egter daarop gewys dat Jesus en Paulus met hulle hande gewerk het. Ek voel nou aangespoor om my werk met selfs groter geesdrif te doen. Ek gaan hard werk sodat ek hierdie vaardigheid in die bou van Byeenkomssale en Koninkryksale kan gebruik.

M. J., Japan

Hierdie artikel het my werklik bemoedig! Dit het my weer daaraan herinner dat ons hoofdoel in die lewe is om Jehovah God te dien en dat die beroep wat ek kies, in ooreenstemming met hierdie voorneme moet wees. Hierdie wonderlike artikel het my beweeg om meer dikwels die inisiatief te neem om die nodige dinge in en om die huis te doen. Nog belangriker, die artikel het my gehelp om Jehovah se beskouing van fisiese werk te hê.

I. K., Rusland

Lewe—’n verstommende versameling kettings (22 Januarie 2005) Ek is 15 jaar oud. Ons is op skool besig om energiemetabolisme in die biologieklas te bestudeer. Toe ek hierdie tydskrif skool toe neem, het my biologie-onderwyser die artikel in die klas gebruik en die sketse daarin vir ons gewys. Ná die periode wou almal graag die tydskrif hê. Die artikel toon duidelik hoe wys Jehovah is. Hy verdien ongetwyfeld ons lof. Ek kan nie wag vir die tyd wanneer alles wat lewe, Jehovah sal loof nie!

I. B., Rusland

“As mense maar net geweet het!” (8 Januarie 2005) Ek is 17 jaar oud, en ek het dit al dikwels oorweeg om na ’n gebied te verhuis waar meer Koninkryksverkondigers nodig is. David se voorbeeld het my meer vasbeslote gemaak om na so ’n gebied te verhuis nadat ek my skoolloopbaan voltooi het. Hou asseblief aan om artikels met sulke aanmoedigende voorbeelde te publiseer. Jongmense van my ouderdom het voortdurend aanmoediging nodig om vooruitgang in die predikingswerk te maak.

K. O., Pole

Ek is 20 jaar oud, en ek was in trane toe ek hierdie artikel gelees het. Ek het gedink: ‘As ek sou sterf terwyl ek nog jonk is, wil ek nie spyt voel dat ek Jehovah nie na die beste van my vermoë gedien het nie!’ My doelwit is om binnekort ’n voltydse evangeliedienaar te word. Ek gaan hierdie artikel raam en dit aan die muur hang sodat ek nooit vergeet hoe ek gevoel het toe ek dit gelees het nie. Dankie dat julle sulke wonderlike ondervindinge publiseer.

N. N., Japan