Noodoproep—Londen
DEUR ONTWAAK!-MEDEWERKER IN BRITTANJE
“ONS doel is om ernstig siek en beseerde pasiënte binne agt minute te bereik, waar hulle ook al is in die 620 vierkante myl [1 600 vierkante kilometer] waaruit Londen bestaan”, het die bestuurder van Londen se Ambulansdiens, Rob Ashford, verduidelik. “In meer as 75 persent van die gevalle slaag ons daarin, al neem die aantal gevalle elke jaar toe.”
Ek is genooi om Londen se Sentrale Ambulansbeheerkamer by die Waterloo-spoorwegstasie op die suidoewer van die Teemsrivier te besoek. Die sentrum is die grootste van sy soort in Europa en hanteer elke dag ongeveer 3 000 noodoproepe. Hierdie oproepe kom van ’n bevolking van sowat sewemiljoen mense, wat meer as 300 tale praat. Hoe is die 300 beheerkamerpersoneellede georganiseer om vir die taak opgewasse te wees?
Die oproepe word geklassifiseer
Ek het toegekyk terwyl ’n telefonis “999-noodoproepe” beantwoord—999 is die noodnommer in Brittanje. Die telefonis het vinnig vasgestel waar die probleem is sowel as die ligging van die naaste straatkruising. ’n Padkaart het onmiddellik op haar rekenaarskerm verskyn. Om te bepaal hoe dringend dit is, het sy ’n reeks vrae gevra: Hoeveel mense het hulp nodig? Hoe oud is hulle en wat is hulle geslag? Is hulle by hulle bewussyn? Haal hulle asem? Het hulle borspyne? Bloei hulle?
Terwyl hierdie inligting ingesleutel word, klassifiseer die rekenaar die voorval outomaties: rooi—in onmiddellike lewensgevaar, oranje—ernstig maar nie in onmiddellike lewensgevaar nie, of groen—nie in onmiddellike lewensgevaar of ernstig nie. Die telefonis stuur dan hierdie inligting aan ’n kollega deur wat hulp na die slagoffer stuur.
Hulp op die toneel
Die diens het 395 ambulanse en 60 reaksievoertuie. Wanneer ’n noodgeval aangemeld word, word die naaste gepaste voertuig na die toneel gestuur. Daar word ook van paramedici op motorfietse gebruik gemaak, want hulle kan makliker deur die verkeer vleg. Daarbenewens is 12 dokters 24 uur per dag beskikbaar om die paramedici te help.
Terwyl ek by die sentrum was, het die plaaslike polisie ’n ernstige ongeluk op ’n besige hoofweg aangemeld. ’n Ambulans was reeds op die toneel, maar die polisie het in elk geval die hoofkwartier geskakel. Waarom? Om die personeel daar in kennis te stel dat hulle moontlik hulle helikopterdiens gaan nodig hê. Hierdie kenmerkende rooi helikopter doen ongeveer 1 000 noodvlugte per jaar. Dit word beman deur ’n paramedikus en ’n dokter, en dit neem gewoonlik diegene met ernstige beserings na die Koninklike Londen-hospitaal, waar daar onmiddellik na hulle omgesien word.
In 2004 is nog ’n inisiatief bekend gestel—’n eksperimentele ambulanseenheid wat van fietse gebruik maak by Londen se Heathrow-lughawe, ’n uitbreiding van ’n diens wat reeds in die stad se Weseinde in werking is. ’n Span van nood- mediese tegnici en paramedici deel hierdie verantwoordelikheid, sodat ambulanse gebruik kan word om na ander pligte om te sien. Elke fiets, wat met ’n blou lig en ’n sirene toegerus is, het draagmandjies met toerusting van altesaam 35 kilogram, insluitende ’n defibrillator, suurstof en pynstillers.
Binne ’n paar dae nadat hierdie diens in werking getree het, het die fietseenheid bewys hoe nuttig dit is. In Terminaal 4 van die Heathrow-lughawe het ’n 35-jarige vrou siek geword en opgehou asemhaal. Twee paramedici het binne sekondes op die 999-oproep gereageer, haar suurstof gegee en dadelik met mond-tot-mond-asemhaling begin. ’n Ambulans het met haar na die naaste hospitaal gejaag. Nadat sy aangesterk het, het sy die paramedici persoonlik bedank dat hulle haar lewe gered het.
’n Diens wat uitbrei
Wanneer diegene wat 999 skakel, nie Engels praat nie, word hulle deurgeskakel na ’n tolk. Maar dit kan natuurlik ’n uitdaging wees om vas te stel watter taal die persoon praat, veral wanneer hy of sy vinnig praat as gevolg van angs of spanning!
Om die publiek oor noodgesondheidsorg in te lig, is ’n kort rolprent met Engelse byskrifte op DVD beskikbaar gestel. Die doel is om Londenaars uit gemeenskappe in Suid-Asië aan te moedig “om te leer hoe om kardiopulmonale resussitasie te doen”, sê LAS News, ’n publikasie wat deur Londen se Ambulansdiens uitgegee word. Die DVD wys ook wat gebeur wanneer ’n 999-oproep ontvang word.
Die inwoners van Engeland se kosmopolitaanse hoofstad is dankbaar vir die vinnige reaksie op hulle mediese noodgevalle, hetsy net een persoon of baie daarby betrokke is en of dit ondergronds of hoog in ’n wolkekrabber plaasvind. ’n Vrywillige dokter het aangaande die mans en vroue van Londen se Ambulansdiens gesê: “Hulle is van die beste mediese personeel saam met wie ek al gewerk het.” Dit is ’n hoë aanbeveling vir die lede van die grootste gratis ambulansdiens ter wêreld.
[Venster op bladsy 11]
Probleme en frustrasies
Ongepaste oproepe vir persoonlike inligting en oproepe oor minder ernstige siektes of beserings, sowel as mense wat 999 per ongeluk of net vir die pret skakel, veroorsaak probleme vir die nooddienste. Wat nog erger is, is dat party pasiënte en ander, insluitende hulle familielede, al mediese personeel wat kom help, uitgeskel en selfs aangerand het! Hierdie mense se woede word dalk veroorsaak deur stres, dwelmmisbruik of ongeduldigheid omdat hulle dink dat die ambulans te lank geneem het om op te daag. Daar is nie ’n maklike oplossing vir hierdie probleme nie, maar openbare opvoeding het die situasie verbeter.
[Prente op bladsy 10]
Die sentrum hanteer elke dag ongeveer 3 000 oproepe
[Foto-erkenning op bladsy 10]
Alle foto’s: Courtesy of London Ambulance Service NHS Trust