Mediese sorg op wiele

● ’n Swanger vrou het in ’n groot ouditorium gesit en aandagtig na ’n program van Bybelonderrig geluister. Skielik het sy skerp geboortepyne gevoel. Maar die noodgeval was onder beheer. ’n Ambulans was in die omgewing, en binne enkele minute het die vrou en haar man by die hospitaal aangekom. Sy het geboorte gegee aan ’n pragtige babadogtertjie.

Vandag speel ambulanse wat as ’n intensiewesorgeenheid toegerus is, ’n belangrike rol in die gesondheidstelsel van baie lande. Hierdie voertuie word beman deur gekwalifiseerde personeel—dokters, verpleegsters en opgeleide bestuurders.a Hulle is ten volle toegerus om noodgevalle soos motorongelukke, hartaanvalle, beroertes of geboortes te hanteer. Elke jaar red hierdie vinnige mediese sorg op wiele duisende lewens.

In die aanvalle op vier passasierstreine in 2004 in Madrid, Spanje, is ongeveer 400 lewens gered omdat die ambulansspanne vinnig en doeltreffend opgetree het.b Dr. Ervigio Corral Torres, die direkteur van Madrid se nooddienseenheid, onthou hierdie tragedie. “Sulke voorvalle kry omvattende mediadekking”, verduidelik hy, “maar dit is in ons daaglikse roetine dat ons werklik doeltreffend is, wanneer ons gewone noodgevalle hanteer. Dít is die beste aspek van hierdie diens; dit red die lewe van mense wie se kanse op oorlewing maar skraal sou gewees het.”

Toe dr. Corral Torres gevra is wat hy meen hulle werk doeltreffender sal maak, het hy geantwoord: “Ons moet mense meer bewus daarvan maak om ons hulp in te roep wanneer daar rede is om dit te doen.” Hy het bygevoeg: “Ons doelwit is om gespesialiseerde mediese sorg na mense te neem waar en wanneer hulle dit ook al nodig het en om dit so gou moontlik te doen nadat ons die oproep ontvang het.” In groot stede daag hulp gewoonlik binne tien minute op.

In party besige stede, soos São Paulo, Brasilië, veroorsaak verkeer ernstige probleme vir ambulansbestuurders, en daarom verrig medici op twee wiele die taak. Per motorfiets kan hulle voor die ambulans die toneel bereik om noodgevalle te evalueer en te stabiliseer. Ander stede wat ook so ’n sneldiens gebruik, is Londen, Engeland; Koeala Loempoer, Maleisië; en Miami, Verenigde State.

[Voetnote]

[Venster/Prent op bladsy 11]

HOE JY KAN HELP

Hier is ’n paar basiese stappe wat jy tydens ’n noodgeval kan volg om mobiele mediese spanne te help om hulle lewensreddende werk te verrig:

1. Bel dadelik die noodnommer. In die Europese Unie is dit 112, in die Verenigde State 911 en in Suid-Afrika 10177 (landlyn) en 112 (selfoonnommer).

2. Sê duidelik waar die noodgeval is.

3. Beskryf die sigbare simptome. Byvoorbeeld: Haal die persoon asem? Is hy by sy bewussyn? Bloei hy?

4. As die persoon veelvuldige beserings het, moet hy nie beweeg word nie, aangesien dit sy beserings kan vererger.

5. As die persoon opgooi, laat hom op sy sy lê sodat hy nie verstik nie.