TV—’n Tydrower?
AS IEMAND jou ’n miljoen rand aanbied om vir die res van jou lewe nie televisie te kyk nie, sou jy dit aanvaar? ’n Paar jaar gelede het 1 uit 4 Amerikaners met wie ’n onderhoud gevoer is, gesê dat hulle dit nie sou doen nie. In ’n ander opname is mans gevra wat hulle die graagste wou hê. Die meerderheid het gesê dat hulle vrede en geluk begeer. Maar vrede en geluk het tweede op hulle verlanglysie gekom. Wat hulle die graagste wou hê, was ’n grootskermtelevisie!
Televisie is regoor die wêreld ongelooflik gewild. In 1931, toe televisie nog in sy kinderskoene was, het die voorsitter van die Amerikaanse Radiokorporasie gesê: “Wanneer televisie ten volle ontwikkel is, is dit redelik om te verwag dat die potensiële kykerstal net deur die grootte van die aarde se bevolking beperk sal wees.” Daardie woorde het destyds dalk vergesog geklink, maar nie meer vandag nie. Die aantal televisies in die wêreld word op 1,5 miljard geskat, met baie meer kykers. Hetsy jy daarvan hou of nie, televisie speel ’n groot rol in mense se lewens.
Dit is verstommend hoeveel tyd baie mense daaraan bestee om televisie te kyk. Volgens ’n onlangse wêreldwye studie kyk mense elke dag gemiddeld ’n bietjie meer as drie uur lank TV. Noord-Amerikaners sit daagliks vier en ’n half uur voor die TV, terwyl die Japannese boaan die lys is met vyf uur per dag. Uiteindelik word baie tyd so in beslag geneem. As ons elke dag vier uur lank TV kyk, sal ons teen die ouderdom van 60 altesaam tien jaar voor die TV deurgebring het. Tog sou nie een van ons dié inskripsie op ons grafsteen wou hê nie: “Hier lê ons geliefde vriend, wat een sesde van sy [of haar] lewe daaraan gewy het om TV te kyk.”
Kyk mense ure lank TV omdat hulle dit geniet? Nie noodwendig nie. Baie glo dat hulle te veel tyd voor die TV deurbring en voel skuldig omdat hulle nie hulle tyd beter benut het nie. Party sê dat hulle “TV-verslaafdes” is. Jy kan natuurlik nie aan TV verslaaf raak soos ’n mens aan dwelms verslaaf raak nie, hoewel daar ooreenkomste is. Verslaafdes wy baie tyd aan die dwelm wat hulle gebruik. Hoewel hulle minder tyd daaraan wil bestee of heeltemal wil ophou, kan hulle nie. Hulle gee belangrike sosiale en gesinsbedrywighede prys om dwelms te misbruik en ly aan onttrekkingsimptome wanneer hulle dit nie gebruik nie. Al hierdie simptome kan voorkom by mense wat baie televisie kyk.
“Dit is nie goed om te veel heuning te eet nie”, het die wyse koning Salomo geskryf (Spreuke 25:27). Dieselfde beginsel geld wanneer ’n mens TV kyk. Hoewel televisie baie bied wat die moeite werd is, kan te veel tyd voor die TV inbreuk maak op tyd saam met die gesin, kan dit kinders se leesgewoontes en akademiese prestasie belemmer en ’n bydraende faktor tot vetsug wees. As jy baie tyd daaraan bestee om TV te kyk, sal dit verstandig wees om na te dink oor wat jy in ruil daarvoor kry. Ons tyd is te kosbaar om te mors. Dit is ook verstandig om na te dink oor die programme waarna ons kyk. Ons sal hierdie onderwerp in die volgende artikel bespreek.