Van ons lesers
Nuwe formaat van die Ontwaak! Ek het gisteraand die Ontwaak! van Januarie 2006 klaar gelees. Ek hou werklik van hierdie nuwe formaat! Die Ontwaak! is nou meer ’n studietydskrif, saamgestel om die leser te dwing om te dink. Deur die hele tydskrif kan ek Jehovah se hand sien in die bevordering van ons geestelike groei.
B. N., Kanada
Ek is 16 jaar oud. Die nuwe kenmerke van die Ontwaak! sal ons baie help om die Bybel te bestudeer. Sommige artikels het ’n reeks vrae om die leser te help om na te dink oor wat hy gelees het. Ek geniet dit om die Ontwaak! vir my skooltake te gebruik. Ek hoop dat julle sal aanhou om vir ons sulke wonderlike en nuttige inligting te voorsien.
S. N., Namibië
Onderskraag deur my geloof—my lewe met ALS (Januarie 2006) Nadat ek die ondervinding van Jason Stuart gelees het, het al my probleme onbenullig gelyk. Ek het besef dat Jehovah die diens waardeer wat ons na gelang van ons omstandighede aan hom verrig. Ek bewonder Jason se vrou vir haar selfopoffering en haar vertroue op Jehovah. Hierdie ondervinding sal altyd in my hart bly en my help om probleme die hoof te bied waarvoor ek moontlik in die toekoms te staan sal kom.
C.R.S., Peru
Ek het gehuil toe ek Jason se verhaal gelees het, nie net omdat dit my ontroer het toe ek van sy beproewinge gelees het nie, maar ook omdat ek, as een van Jehovah se Getuies, baie trots is om so ’n geestelike broer te hê. Die artikel het my laat besef hoe belangrik dit is om vir beproewinge voor te berei, aangesien “tyd en onvoorsiene gebeurtenisse” enigeen van ons kan tref.—Prediker 9:11.
T. A., Hongarye
Ek het my ma weens ALS aan die dood afgestaan. Jason se ondervinding het dus my hart geraak. Sy voorbeeld het my aangemoedig om aan te hou om my bes te doen in my bediening. Ek bid dat Jehovah sal aanhou om hierdie broer en sy vrou te versterk.
L.Z.G., Paraguay
Die feit dat Jason sy tyd gebruik het om hom in persoonlike studie te verdiep terwyl hy gesond was en dus geestelike reserwes gehad het waarop hy kon staatmaak toe hy dit nodig gekry het, het my laat dink. Dit het my meer vasbeslote gemaak om yweriger te wees in my persoonlike studie van die Bybel.
J. M., Japan
Jongmense vra—Waarom maak ek myself seer? (Januarie 2006) Ek het as ’n jongmens teen dwelms en alkohol gestry, maar die moeilikste probleem waarmee ek al ooit te kampe gehad het, is selfbesering. Dit is ’n aanhoudende stryd, maar artikels soos hierdie een het my die krag gegee om uit te hou. Ek het nie woorde om my waardering uit te spreek nie.
E. C., Verenigde State
Selfbesering is al sedert my tienerjare ’n deel van my lewe. Ek is nou 56 jaar oud. Ek het vier jaar gelede opgehou met die gewoonte om myself te beseer, maar soms is my probleme so groot dat ek dit weer wil doen. Hierdie artikel het my hart diep geraak. Dit sal mense soos ek in staat stel om ons lewe weer leefbaar te maak.
Naam weerhou, Nederland
Ek is 17 jaar oud en wil julle graag vir hierdie artikel bedank. My probleem is dat ek myself seermaak. Ek het myself onlangs weer gesny. Daarna het ek my ma genader en haar gevra om saam met my te bid. Ten spyte van hierdie probleem het ek geleer dat Jehovah lief is vir my. Julle artikel help baie, en ek is dankbaar teenoor God daarvoor!
N. M., Tsjeggiese Republiek
“Dit kan nie waar wees nie!” Dit was my reaksie toe ek hierdie artikel gesien het. Ek is 18 jaar oud. Ek beseer myself. Pyn help my om my emosies te onderdruk. Ek wil myself dikwels martel, en ek weet nie hoe om teen daardie gevoelens te stry nie. Dit was ’n groot verrassing om hierdie artikel te sien. Trane het in my oë opgewel, en ek het Jehovah in gebed bedank. Net in Jehovah se organisasie is dit moontlik om sulke vertroosting te vind!
A. P., Rusland
Ek het op 14-jarige ouderdom my emosionele pyn begin verwerk deur myself te beseer. Ek moes eenkeer selfs hospitaal toe gaan. Wat my baie gehelp het om my simptome onder beheer te hou, was om ’n dagboek te hou. Daarbenewens bel ek ’n simpatieke vriend wanneer ek in die versoeking kom om myself te beseer. Gebed help my baie. En wanneer ek onwaardig voel om te bid, bid vriende en Christen- ouer manne saam met my. Dit is ’n moeilike stryd, maar ek het geleer hoe om dit die hoof te bied en al die hulp wat beskikbaar is, te aanvaar sodat ek myself nie hoef te beseer nie.
N. W., Duitsland
Die prentjie op die eerste bladsy van hierdie artikel het ’n meisie gewys wat haar hare trek, en die artikel praat van “Sara”, wat haar hare uitgetrek het om haarself te straf. My dogter het ’n versteuring wat as trigotillomanie bekend staan, ’n toestand wat maak dat mense hulle hare uittrek. Hierdie siekte is verwant aan obsessief-kompulsiewe steurnis. Dit word aangebring deur ’n obsessie, nie ’n begeerte om jou te beseer nie. Wanneer iemand hulle hare uittrek, beteken dit nie noodwendig dat hulle hulle gaan sny nie.
M. H., Verenigde State
“Ontwaak!” antwoord: Die term trigotillomanie, wat in die 19de eeu ontstaan het, verwys na ’n gedragsversteuring wat gekenmerk word deur die onweerstaanbare drang om jou hare uit te trek. Soos ons prentjie smaakvol probeer uitbeeld het, beseer party hulle deur hulle hare uit te trek. Dit beteken egter nie dat almal wat kompulsief hulle hare uittrek, die soort selfbeseerder is wat in ons artikel beskryf word nie. Soos die leser hierbo sê, is die gewoonte dikwels nouer verwant aan obsessief-kompulsiewe steurnis.
Hoe dit ook al sy, sommige kenners verduidelik dat die rede vir trigotillomanie in ag geneem moet word sodat behandeling volgens die behoeftes van die individuele lyer aangepas kan word. Dit sal dus verstandig wees as diegene wat hierdie probleem het, ’n mediese deskundige raadpleeg vir ’n persoonlike diagnose en behandeling.
Hoe sal jy antwoord? (Januarie 2006) Ek is so opgewonde oor hierdie nuwe kenmerk! Ons leer ons kleinkinders, en dit sal hulle daaglikse Bybellees werklik aanvul, tesame met die Ontwaak!-artikels wat hulle vir hulle skooltake lees. Dankie dat julle soveel vir ons jongmense omgee.
B. E., Verenigde State
Hierdie deel van die tydskrif is moeilik, maar wanneer ek ’n antwoord vind, is ek baie bly! Hierdie bladsy is so interessant dat ek dit gisteraand die hele aand gelees het! Wanneer ek groot is, wil ek help om hierdie tydskrif te maak sodat ander oor Jehovah kan leer!
D. H., Verenigde State
Ek is agt jaar oud. Ons gesin het hierdie bladsy in ons gesinstudie gebruik. Ons geniet die navorsing wat ons moet doen. Die deel: “Wie is ek?” kan moeilik wees, maar ons hou van die uitdaging. Hou aan met die goeie werk.
C. W., Verenigde State