Ons beskou die wêreld
◼ “Tot die helfte van alle paartjies erken dat hulle hulle aan ‘finansiële ontrouheid’ skuldig maak—dat hulle vir hulle huweliksmaat leuens vertel oor die uitgawes wat hulle aangegaan het.”—THE WALL STREET JOURNAL, VSA.
◼ “’n Oorweldigende 84 persent van Griekeland se landoppervlak loop die gevaar om woestyn te word, en ’n verdere 8 persent is reeds dor.”—KATHIMERINI (ENGELSE UITGAWE), GRIEKELAND.
◼ Lateu, op die eiland Tegua, in Vanuatu, Oseanië, is dalk die eerste dorpie wat verlate gelaat is—of om meer presies te wees, verskuif is—weens die veranderende klimaat. Die huise daar is herhaaldelik “oorstroom deur stormgolwe en verwoestende branders”.—VANUATU NEWS, VANUATU.
Al hoe meer honderdjariges
Dit is deesdae nie meer so ongewoon vir mense om tot 100 jaar te lewe nie, sê die tydskrif New Scientist. Daar is nou wêreldwyd sowat 200 000 honderdjariges. Daarbenewens het 66 van hulle, volgens daardie tydskrif, al hulle 110de verjaarsdag bereik. Volgens New Scientist is dit soms moeilik om bewerings van ’n baie lang lewensduur te bevestig, maar “die gebrek aan betroubare rekords beteken ook dat die werklike getal mense ouer as 110, tot 450 kan wees”.
Raaiselagtige moordenaar uitgeken
“DNS wat verkry is uit tande uit ’n antieke Ateense grafkuil het gehelp met die uitkenning” van ’n eertydse moordenaar, sê die Kanadese tydskrif Maclean’s. Die Griekse skrywer Tukidides meld in sy Geskiedenis van die Peloponnesiese Oorlog ’n plaag wat Atene omstreeks 430 v.G.J. getref het en die vyand, Sparta, die oorhand in die oorlog tussen die twee stede gegee het. Tukidides se beskrywing van die pessiekte was nie spesifiek genoeg om dit te kon identifiseer nie. Maar volgens berig het ’n ontleding van tandmurg, waarin patogene eeue lank behoue kan bly, navorsers nou in staat gestel om die raaiselagtige moordenaar as buiktifus te identifiseer.
Robot-jokkies vir kamele
Die voortbestaan van kameelwedrenne, ’n gewilde sport in lande in en om die Persiese Golf, is bedreig toe menseregtegroepe die gebruik van kinders as jokkies gekritiseer het. Maar die deskundiges sê dat jokkies minder as 27 kilogram moet weeg om die beste resultate te behaal, en dit beteken dat nie eers tieners gebruik kan word nie. Die oplossing? Robot-jokkies. Switserse ontwerpers het ’n afstandbeheerde androïed van 26 kilogram ontwerp, wat in ’n spesiale saal vir kamele vasgegordel kan word. Om te voorkom dat die kameel skrik vir die robot, het die robot die vorm en stem van ’n mens. Dit kan ook leun, balanseer, ’n sweep gebruik en die rydier stuur. Kameeleienaars is entoesiasties oor die gebruik hiervan.
Saad ontkiem ná 2 000 jaar
Eertydse Judese dadelpalms, wat gesog was weens hulle prag, skadu en geneeskragtige eienskappe, is tydens die Middeleeue deur die kruisvaarders vernietig. Maar nou het “Israeliese dokters en wetenskaplikes daarin geslaag om ’n dadelsaad wat byna 2 000 jaar oud is, te laat ontkiem”, berig The New York Times. “Die saad, wat die bynaam Metusalag gekry het, is ontdek tydens ’n opgrawing by Masada”, die bergvesting wat in 73 G.J. deur die Romeine verower is. Dr. Elaine Solowey, ’n deskundige op die gebied van landbou in dor streke, het die saad laat ontkiem en sê dat dit jare sal neem voordat die jong plant enige vrug voortbring, en dan slegs as dit vroulik is. “As dit manlik is”, sê sy, “sal dit maar net iets interessants wees.”