’n Gevaar waaroor elke ouer besorg moet wees
HEATHER en Scott is ’n lewenslustige, gelukkige egpaar en die ouers van ’n slim, gesonde driejarige seuntjie.a Hulle sorg goed vir hom. In vandag se wêreld is dit nie ’n maklike taak nie. Dit gaan gepaard met baie bekommernisse en verantwoordelikhede. Daar is soveel dinge wat kinders geleer moet word! Heather en Scott voel sterk oor een verantwoordelikheid in die besonder: Hulle wil hulle kind teen die gevare van seksuele molestering beskerm. Waarom?
“My pa was ’n liefdelose, buierige dronkaard”, sê Heather. “Hy het my vreeslik geslaan, en hy het my en my susters gemolesteer.”b Daar word algemeen aanvaar dat sulke mishandeling diep emosionele letsels kan laat. Geen wonder dat Heather vasbeslote is om haar seun te beskerm nie! Scott voel dieselfde hieroor.
Baie ouers is bekommerd oor kindermolestering. Miskien voel jy dieselfde. Anders as Scott en Heather, het jy dalk nie molestering en die gevolge daarvan self ervaar nie, maar jy het ongetwyfeld al skokkende berigte gehoor oor hoe algemeen hierdie walglike gebruik is. Regoor die wêreld word goeie ouers met afgryse vervul wanneer hulle hoor wat met kinders in hulle omgewing gebeur.
Dit is dus nie verbasend nie dat een navorser op die gebied van seksuele molestering die hoë voorkomssyfer van kindermolestering “een van die ontmoedigendste ontdekkings van ons era” genoem het. Dit is beslis hartseer nuus, maar is sulke verwikkelinge verbasend? Nie vir mense wat die Bybel bestudeer nie. God se Woord verduidelik dat ons in ’n tyd vol probleme lewe wat “die laaste dae” genoem word, ’n tyd wat gekenmerk word deur ‘wreedaardige’ gedrag, waartydens mense “liefhebbers van hulleself” en “sonder natuurlike geneentheid” sou wees.—2 Timoteus 3:1-5.
Seksuele molestering is ’n skrikwekkende probleem. Trouens, party ouers voel oorweldig wanneer hulle dink aan die volslae boosheid van die mense wat kinders probeer vind sodat hulle hulle seksueel kan molesteer. Maar is hierdie probleem te groot vir ouers om te hanteer? Of is daar praktiese stappe wat ouers kan neem om hulle kinders te beskerm? Die volgende artikels sal hierdie vrae bespreek.
[Voetnote]
a Name in hierdie reeks artikels is verander.
b Seksuele molestering van ’n kind vind plaas wanneer ’n volwassene ’n kind gebruik om sy of haar eie seksuele begeertes te bevredig. Dit behels dikwels wat die Bybel hoerery, of por·neiʹa, noem, wat die streling van geslagsorgane, geslagsomgang en orale of anale seks kan insluit. Sekere dade van molestering—soos om die borste te streel, growwe onsedelike voorstelle te maak, pornografie vir ’n kind te wys, afloerdery en selfontbloting—kan neerkom op wat die Bybel as “losbandige gedrag” of ‘onreinheid met hebsug’ veroordeel.—Galasiërs 5:19-21; Efesiërs 4:19.