Binnekort sal misdaad “daar nie meer wees nie”

“Nog net ’n klein rukkie en die goddelose sal daar nie meer wees nie.”—PSALM 37:10.

ONS Skepper, Jehovah God, stel intens belang in sy menseskepping; hy is nie afsydig, soos sommige glo nie (Psalm 11:4, 5). Wat meer is, hy sien elke misdaad en elke onreg raak, insluitende dié wat mense nie sien nie. “Die oë van Jehovah is op elke plek, en hulle let op die slegtes en die goeies” (Spreuke 15:3). Jy kan dus daarvan seker wees dat die goddeloses werklik “op glibberige grond” is.—Psalm 73:12, 18.

Die onberispelikes en regskapenes het egter ’n wonderlike vooruitsig, selfs wanneer hulle dalk materieel arm is en verdruk word. “Gee ag op die onberispelike en kyk na die regskapene”, het die psalmis Dawid geskryf, “want die toekoms van dié man sal vreedsaam wees” (Psalm 37:37). Hierdie woorde kan ons vandag baie vertroos omdat ons die hoop het dat dit in die nabye toekoms wêreldwyd vervul gaan word.

Ons lewe in die laaste dae

Ongeveer 2 000 jaar gelede het dissipels van Jesus Christus hom ’n betekenisvolle vraag gevra. “Sê vir ons”, het hulle gevra, “wat sal die teken . . . van die voleinding van die stelsel van dinge wees?” (Matteus 24:3). Jesus se antwoord word in besonderhede uiteengesit in die Bybel in Matteus hoofstuk 24, Markus hoofstuk 13 en Lukas hoofstuk 21. Hierdie Evangelieverslae, wat mekaar aanvul, beskryf die laaste dae van die teenswoordige wêreld as ’n tyd wat gekenmerk sal word deur oorloë, hongersnode, siektes, groot aardbewings en ’n opvallende toename in wetteloosheid.

Die kritieke toestande wat Jesus voorspel het, het in 1914 begin. Soos die geskiedkundige Eric Hobsbawm in sy boek Age of Extremes sê, was die 20ste eeu “ongetwyfeld die moorddadigste eeu op rekord”.

Aangaande die huidige toename in boosheid sê die Bybel: “Wanneer die goddeloses uitspruit soos die plante en almal wat skadelike dinge beoefen, bloei, is dit sodat hulle vir ewig verdelg kan word” (Psalm 92:7). Ja, die bewyse is onbetwisbaar: Vandag se ontsaglike toename in wetteloosheid—soos plante wat in die groeiseisoen uitspruit—is in werklikheid ’n aanduiding dat die vernietiging van die goddeloses op hande is! Is dit nie goeie nuus nie?—2 Petrus 3:7.

“Die regverdiges sal die aarde besit”

“Die regverdiges sal die aarde besit, en hulle sal vir ewig daarop woon”, sê Psalm 37:29. Elke vorm van misdaad en ongeregtigheid sal dan iets van die verlede wees. Alles wat met misdaad verband hou—alarmstelsels, slotte, howe, regsgeleerdes, polisie en tronke—sal dus nie meer bestaan nie. “Die vorige dinge”, belowe die Bybel, “sal nie onthou word nie, en ook sal dit nie in die hart opkom nie.”—Jesaja 65:17.

Ja, die aarde en die mensegemeenskap sal ’n verandering ondergaan soos nog nooit tevore nie (Jesaja 11:9; 2 Petrus 3:13). Dit is die gegronde hoop wat Jehovah se Getuies het, en hulle nooi jou om self seker te maak dat dit binnekort ’n werklikheid sal wees. Onthou dat die Een wat die Heilige Skrif geïnspireer het, “nie kan lieg nie”.—Titus 1:2.

[Venster/Prent op bladsy 9]

GEESTELIKE HULP VIR GEVANGENES

Oor die jare heen het Jehovah se Getuies in die Verenigde State briewe ontvang van mense in 4 169 korrektiewe inrigtings, hospitale en dwelmrehabilitasiesentrums. Sommige vra Bybellektuur aan; ander vra ’n gratis Bybelstudie aan. Bekwame Getuies besoek hierdie belangstellendes. Trouens, die Getuies besoek gereeld tronke regoor die wêreld om Bybelstudies te hou met gevangenes, mans en vroue, wat geestelike hulp soek. ’n Aantal van hulle het merkwaardige veranderinge in hulle persoonlikheid aangebring, is as Christene gedoop en is sedertdien wetsgehoorsame burgers.