Ons beskou die wêreld
◼ Tydens ’n opname wat in die Verenigde State gedoen is, “het nege-en-twintig persent van die mans wat ondervra is, gesê dat hulle 15 of meer vroulike seksmaats in hulle leeftyd gehad het, terwyl 9 persent van die vroue gesê het dat hulle 15 of meer manlike seksmaats in hulle leeftyd gehad het”.—SENTRUMS VIR SIEKTEBEHEER EN-VOORKOMING, VSA.
◼ In Griekeland erken “62 persent van kinders 16 jaar en jonger dat hulle al pornografiese materiaal op hulle selfone afgelaai het”.—ELEFTHEROTYPIA, GRIEKELAND.
◼ In Brittanje beskou 82 persent van die mense wat ondervra is, “godsdiens as iets wat verdeeldheid en spanning veroorsaak”.—THE GUARDIAN, BRITTANJE.
Hoofpyne 64 jaar lank
’n Chinese vrou het uiteindelik uitgevind wat die oorsaak was van die “onophoudelike hoofpyne” wat haar meer as 60 jaar lank geteister het, toe dokters ’n drie sentimeter lange koeël uit haar kop verwyder het. Toe die Japannese ’n dorpie in die Xinyi-distrik in September 1943 ingeval het, het die vrou, wat destyds 13 jaar oud was, ’n kopbesering opgedoen. Niemand het gedink dat ’n koeël die oorsaak van haar probleem was nie. Toe sy meer dikwels hoofpyne begin kry het, is die koeël deur middel van X-strale ontdek, sê die Xinhua-nuusagentskap. Die vrou, wat nou 77 is, is volgens berig “in ’n goeie toestand”.
’n Langlewende walvis
Toe inboorlingjagters van Alaska in 2007 ’n Groenlandse walvis doodgemaak het, het die punt van ’n ou harpoen en ander fragmente daarvan nog in hom vasgesit. Dit is geïdentifiseer as “dele van ’n plofbare lans wat in die laat 1800’s in New Bedford [Massachusetts, VSA] gemaak is”, sê The Boston Globe. Hierdie soort lans het gou in onbruik geraak, wat geskiedkundiges by die Walvismuseum in New Bedford tot die gevolgtrekking laat kom het dat die walvis “die een of ander tyd tussen 1885 en 1895” met die harpoen geskiet is. Hy moes dus ten minste 115 jaar oud gewees het toe hy doodgemaak is. Hierdie ontdekking, sê die Globe, voorsien “nog bewyse vir [die] lank gehuldigde opvatting dat die Groenlandse walvis een van die soogdiere op aarde is wat die langste lewe, tot 150 jaar lank”.
’n Versteende reënwoud
Geoloë het ’n enorme ondergrondse versteende reënwoud gevind wat ’n verstommende verskeidenheid uitgestorwe plante bevat, waarvan sommige tot ’n hoogte van meer as 40 meter gegroei het. Die unieke woud is in die tonnels van ’n steenkoolmyn in Illinois, VSA, gevind. Wetenskaplikes glo dat die woud deur ’n katastrofiese aardbewing onder die aarde se oppervlak begrawe is. “Dit is baie opwindend”, sê Bill DiMichele, die hoofnavorser van die span wat die vonds bekend gemaak het. “Ons kan ons die woud min of meer voorstel asof ons daardeur loop.”
Mense grawe na kwaliteitswyn
’n Toenemende aantal besoekers reis na Masedonië, ’n voormalige republiek van Joego-Slawië, “om kwaliteitswyn op te grawe wat gedurende die Eerste Wêreldoorlog . . . deur geallieerde troepe agtergelaat is”, berig die koerant Kathimerini—English Edition. Die besoekers kom meestal van Frankryk, en toegerus met kaarte, doen hulle opgrawings by verlate militêre bergplekke. Teen hierdie tyd is enige wyn wat nog daar is, ten minste 90 jaar oud, en volgens die koerant “kan ’n goedbewaarde bottel . . . ’n prys van tot 2 000 euro [R19 450] haal”. Plaaslike mense wat wyn en konjak opgegrawe het, sê dat “hulle nog nooit iets beters geproe het nie”.