Jongmense vra

Moet ons die verhouding beëindig?

“Ná drie maande het al twee van ons gesê dat die verhouding só reg voel. Ons het gepraat asof dit ’n uitgemaakte saak was dat ons die res van ons lewe saam sou wees.”—Jessica.a

“Ek was smoorverlief op hom en toe, ’n paar jaar later, het hy my uiteindelik begin raaksien! Ek het daarvan gehou om ’n ouer kêrel te hê wat vir my daar sou wees.”—Carol.

Mettertyd het Jessica sowel as Carol hulle verhoudings met hulle kêrels beëindig. Waarom? Was hulle dom om met sulke wonderlike kêrels uit te maak?

JULLE gaan al amper ’n jaar uit. Aanvanklik was jy seker dat hy “die een” is.b By tye kan jy selfs weer die romantiese gevoelens laat opvlam wat jy aan die begin van die verhouding gehad het. Maar nou het jy bedenkinge. Moet jy daardie gedagtes ignoreer? Hoe weet jy of jy die verhouding moet beëindig?

Eers moet jy ’n harde waarheid onder die oë sien: Om gevaartekens in ’n verhouding te verontagsaam, is soos om die waarskuwingsliggies op jou kar se paneelbord te ignoreer. Die probleem sal nie weggaan nie; dit sal waarskynlik net erger word. Wat is party van die gevaartekens in ’n verhouding waarop jy gerus kan ag slaan?

Dinge vorder te vinnig. Probleme kan ontstaan wanneer ’n verhouding te vinnig vorder. “Ons het mekaar ge-e-pos, op die Internet geklets en oor die telefoon gepraat”, sê Carol. “Om op hierdie maniere te kommunikeer, kan kragtiger wees as om van aangesig tot aangesig te praat, want jy kan gans te vinnig baie persoonliker raak!” Moenie julle die geleentheid ontsê om mekaar te leer ken nie. ’n Verhouding moet nie soos onkruid wees wat gou opskiet en dan verwelk nie. Dit moet eerder soos ’n kosbare plant wees wat tyd neem om te groei.

Hy is krities en neerhalend. “My kêrel het my altyd verkleineer”, sê ’n meisie genaamd Ana, “maar ek wou só graag by hom wees.” Sy voeg by: “Ek het situasies geduld wat ek nooit gedroom het ek sou toelaat nie!” Die Bybel veroordeel “smadende taal” (Efesiërs 4:31). Daar is eenvoudig nie plek vir neerhalende woorde in ’n liefdevolle verhouding nie—selfs al word dit kalm en bedaard gesê.—Spreuke 12:18.

Hy het ’n vinnige humeur. “’n Man met onderskeidingsvermoë is kalm van gees”, sê Spreuke 17:27. Erin het gevind dat haar kêrel probleme hiermee gehad het. “Wanneer ons meningsverskille gehad het, het hy my partykeer gestamp”, sê sy, “en soms het ek met kneusplekke gesit.” Die Bybel sê vir Christene: “Laat alle kwaadwillige bitterheid en toorn en gramskap . . . van julle af weggeneem word” (Efesiërs 4:31). Iemand met min selfbeheersing is beswaarlik gereed vir ’n verhouding.—2 Timoteus 3:1, 3, 5.

Hy hou ons verhouding geheim. “My kêrel wou nie hê dat ander mense moes weet dat ons uitgaan nie”, sê Angela. “Hy was selfs kwaad toe my pa uitgevind het!” Natuurlik is daar dalk geldige redes waarom ’n paartjie ’n mate van privaatheid wil hê. Maar geheimhouding—’n doelbewuste poging om die verhouding weg te steek van diegene wat ’n reg het om daarvan te weet—voorspel probleme.

Hy is nie van plan om te trou nie. Om met iemand uit te gaan, het vir Christene ’n eerbare doel—om ’n jong man en vrou te help vasstel of hulle met mekaar wil trou. Dit beteken natuurlik nie dat jy trouplanne moet begin maak die oomblik wat julle begin uitgaan nie. Om die waarheid te sê, baie mense trou nie met die eerste persoon met wie hulle uitgaan nie. Terselfdertyd moet iemand nie in ’n verhouding wees as hy of sy nog nie gereed is om die verantwoordelikhede van die huwelik na te kom nie.

Ons verhouding ry wipplank. Spreuke 17:17 sê: “’n Ware metgesel het te alle tye lief.” Julle twee sal nie altyd saamstem nie. Maar ’n verhouding wat gedurig wipplank ry tussen uitmaak en opmaak, kan toon dat iets onderliggends aandag nodig het, soos Ana later besef het. “Al die kere wat ek met my kêrel uitgemaak het, het my soveel hartseer besorg!”, sê sy. “Ek het bly teruggaan om ’n verhouding te herstel waarsonder ek beter af sou gewees het.”

Hy plaas druk op my om seks te hê. “As jy my liefhet, sal jy dit doen.” “Ons moet ons verhouding na die volgende vlak neem.” “Dit is nie regtig seks as daar nie omgang is nie.” Hierdie is almal manipulerende maniere waarop seuns al druk op meisies geplaas het om seks te hê. Jakobus 3:17 sê: “Die wysheid van bo is allereers kuis.” Jy verdien ’n kêrel wat sedelik rein is en wat jou kuise seksuele perke respekteer. Moenie met minder tevrede wees nie!

Ander het my oor hom gewaarsku. Die Bybel sê: “Win soveel raad as moontlik in, en jy sal suksesvol wees; daarsonder sal jy misluk” (Spreuke 15:22, Today’s English Version). “Jy kan nie ignoreer wat jou gesin en persone met wie jy al lank vriende is, dink nie, net soos jy nie die alarms wat in jou kop afgaan, kan ignoreer nie”, sê Jessica. “Hoe meer jy ignoreer wat ander sê, hoe moeiliker maak jy dit vir jouself.”

Die bogenoemde is net ’n paar gevaartekens wat tot probleme in ’n verhouding kan lei.c As jy in ’n verhouding is, hoe vaar jou kêrel op die gebiede wat bespreek is? Skryf enigiets waaroor jy dalk besorg is, hieronder neer.

․․․․․

Hoe om die verhouding te beëindig

Sê nou jy besluit dat dit beter is om die verhouding te beëindig. Hoe gaan jy dit doen? Daar is ’n paar maniere, maar hou die volgende in gedagte.

Wees moedig. “Ek het so afhanklik van my kêrel geword dat ek bang was om hom te los”, sê ’n meisie genaamd Trina. Dit verg moed om iets te sê wanneer ’n verhouding beëindig moet word. Maar om vir jouself op te kom, is goed vir jou (Spreuke 22:3). Dit stel jou in staat om definitiewe perke te stel ten opsigte van wat jy in ’n verhouding—en later in ’n huwelik—sal en nie sal toelaat nie.

Wees redelik. Hoe sou jy wou hê hy moet jou behandel as die rolle omgeruil was? (Matteus 7:12). Jou kêrel verdien tog sekerlik meer as net ’n kort e-pos, SMS of ’n stempos wat sê: “Dis verby!”

Kies die regte geleentheid. Moet jy van aangesig tot aangesig praat of oor die telefoon? Moet jy ’n brief skryf of moet julle dit bespreek? Dit hang baie af van die omstandighede. Moenie êrens ontmoet waar jy in gevaar gestel kan word nie, en dit sal ook nie wys wees om op ’n afgesonderde plek te wees waar verkeerde begeertes opgewek kan word nie.—1 Tessalonisense 4:3.

Praat die waarheid. Spreek jou eerlik uit oor waarom jy voel die verhouding nie kan voortgaan nie. As jy voel dat jou kêrel jou nie reg behandel het nie, sê so. Hou by stellings wat sê hoe jý voel. Byvoorbeeld, moenie sê: “Jy verkleineer my altyd” nie, sê eerder: “Ek voel verkleineer wanneer jy . . .”

Wees ook bereid om te luister. Het jy dalk iets verkeerd verstaan omtrent die situasie? Moenie toelaat dat jy deur slim woorde gemanipuleer word nie, maar wees terselfdertyd redelik en oorweeg al die feite. Die Bybel vermaan Christene wyslik om “gou [te] wees om te hoor, stadig om te praat”.—Jakobus 1:19.

Nog artikels uit die reeks “Jongmense vra” kan gevind word op die webwerf www.watchtower.org/ype

[Voetnote]

IETS OM OOR TE DINK

◼ Skryf die eienskappe wat vir jou noodsaaklik is in iemand met wie jy sou uitgaan, hieronder neer. ․․․․․

◼ Watter eienskappe is vir jou onaanvaarbaar? ․․․․․

[Venster op bladsy 20]

DIE PERSOON WAT JY KIES OM MEE UIT TE GAAN, MOET . . .

□ dieselfde geestelike oortuigings as jy hê.—1 Korintiërs 7:39.

□ jou sedelike perke respekteer.—1 Korintiërs 6:18.

□ jou en ander in ag neem.—Filippense 2:4.

□ ’n goeie reputasie hê.—Filippense 2:20.

[Venster op bladsy 20]

PASOP AS JOU KÊREL . . .

□ altyd daarop aandring om sy sin te kry.

□ jou gedurig skuldig, dom of nikswerd laat voel.

□ jou van jou vriende en familie probeer weghou.

□ gedurig wil weet waar jy is.

□ jou beskuldig dat jy met ander flankeer wanneer daar geen rede daarvoor is nie.

□ jou dreig of ultimatums stel.

[Prent op bladsy 19]

Om gevaartekens in ’n verhouding te verontagsaam, is soos om die waarskuwingsliggies op jou kar se paneelbord te ignoreer

CHECK OIL