Jongmense vra . . . 

Wat is daarmee verkeerd om ’n geheime verhouding te hê?

Jessicaa was in ’n penarie. Dit het alles begin toe ’n klasmaat met die naam Jeremy in haar begin belangstel het. “Hy was baie oulik”, sê sy, “en my vriende het gesê dat hy die ordentlikste ou is wat ek ooit sal ontmoet. ’n Hele paar meisies het al ’n verhouding met hom probeer aanknoop, maar hy het nie in hulle belanggestel nie. Hy het net van my gehou.”

Kort voor lank het Jeremy vir Jessica gevra om met hom uit te gaan. Jessica sê: “Ek het aan hom verduidelik dat ek, as een van Jehovah se Getuies, nie met iemand kan uitgaan wat nie aan dieselfde geloof as ek behoort nie. Maar toe het Jeremy ’n idee gehad. Hy het gevra: ‘Kan ons nie net agter jou ouers se rug uitgaan nie?’”

HOE sal jy reageer as iemand wat jy aantreklik vind, so ’n voorstel maak? Dit sal jou dalk verbaas om te weet dat Jessica aanvanklik ingestem het met Jeremy se plan. “Ek was seker dat ek hom sou kon leer om Jehovah lief te hê as ek met hom uitgaan”, sê sy. Hoe het dinge afgeloop? Ons sal later uitvind. Kom ons kyk eers hoe selfs iemand wat andersins ’n voorbeeldige jong Christen is, soos Jessica, in die strik van geheime verhoudings kan trap sonder om dit te besef.

Waarom hulle dit doen

Sommige jongmense paar op ’n vroeë ouderdom af. “Ek het al kinders van 10 of 11 jaar gesien wat ’n kêrel of ’n meisie het!” sê Susan, in Brittanje. Waarom is hulle so gretig om dit te doen? Die natuurlike aantrekkingskrag van die teenoorgestelde geslag en ’n bietjie portuurdruk—dikwels is dit al wat nodig is. “Jou hormone is op hol en al die ander kinders by die skool gaan met iemand uit”, sê Lois, in Australië.

Maar waarom het sommige verhoudings in die geheim? “Hulle is waarskynlik bang vir wat hulle ouers gaan sê”, sê Jeffrey, in Brittanje. David, in Suid-Afrika, dink ook so. “Hulle weet dat hulle ouers dit nie sal goedkeur nie”, sê hy, “en daarom vertel hulle hulle nie.” ’n Meisie in Australië genaamd Jane meld nog ’n moontlikheid. “Geheime verhoudings het te doen met rebelsheid”, sê sy. “As jy voel dat jy nie behandel word soos die jong volwassene wat jy dink jy is nie, besluit jy dat jy gaan doen wat jy wil en net nie vir jou ouers sal sê nie. Om dit geheim te hou, is maklik.”

Die Bybel beveel jou natuurlik om jou ouers te gehoorsaam (Efesiërs 6:1). En as jou ouers daarteen beswaar maak dat jy met iemand uitgaan, moet hulle sekerlik goeie redes hê. Byvoorbeeld, as jou ouers Jehovah se Getuies is, sou hulle wil hê dat jy net met ’n medegelowige ’n verhouding moet hê—en dan net wanneer julle albei gereed is om aan trou te dink.b Moet egter nie verbaas wees as die volgende gedagtes by jou opkom nie:

◼ Ek voel uitgesluit omdat almal met iemand uitgaan, behalwe ek.

◼ Ek voel aangetrokke tot iemand wat nie aan dieselfde geloof as ek behoort nie.

◼ Ek wil graag met ’n mede-Christen uitgaan, al is ek te jonk om te trou.

Jy weet waarskynlik wat jou ouers oor hierdie stellings sou sê. En in jou hart weet jy dat jou ouers reg is. Nogtans voel jy dalk soos Manami, in Japan, wat sê: “Die druk om met iemand uit te gaan, is so sterk dat ek soms twyfel oor my standpunt. Vir vandag se jongmense is dit ondenkbaar om nie met iemand uit te gaan nie.” Sommige wat in daardie situasie is, het ’n verhouding aangeknoop en dit van hulle ouers weggesteek. Hoe?

“Hulle het vir ons gesê om dit geheim te hou”

Die uitdrukking “geheime verhouding” sê klaar vir jou dat ’n mate van misleiding plaasvind. Sommige hou hulle verhouding geheim deur hoofsaaklik per telefoon of oor die Internet te kommunikeer. In die openbaar is hulle net vriende, terwyl hulle e-posse, SMS’e en telefoonoproepe toon dat hulle beslis meer as net vriende is.

Caleb, in Nigerië, noem nog ’n onderduimse metode wat party gebruik. “Sommige jongmense wat ’n geheime verhouding het, gebruik kodewoorde en byname wanneer hulle met hulle vriende gesels sodat ander nie sal agterkom waaroor hulle praat nie”, sê hy. Nog ’n metode is om te reël om iets as ’n groep te doen en dan later af te paar. James, in Brittanje, sê: “Een keer is ’n klompie van ons genooi om iewers te ontmoet, maar toe vind ons uit dat die hele ding gereël is sodat twee in die groep bymekaar kon wees. Hulle het vir ons gesê om dit geheim te hou.”

Soos James sê, word ’n geheime verhouding dikwels met die samewerking van vriende voortgesit. “Ten minste een vriend weet van die situasie, maar besluit om niks te sê nie weens ’n ‘moenie klik nie’-mentaliteit”, sê Carol, in Skotland.

Dikwels is skaamtelose oneerlikheid daarby betrokke. “Baie hou hulle verhouding ’n geheim deur vir hulle ouers leuens te vertel oor waarheen hulle gaan”, sê Beth, in Kanada. Misaki, in Japan, erken dat sy juis dit gedoen het. “Ek moes my stories mooi uitdink”, sê sy. “Ek was versigtig om nie enige leuens te vertel behalwe oor my verhouding nie, sodat ek nie my ouers se vertroue sou verloor nie.”

Die slaggate van geheime verhoudings

As jy in die versoeking kom om ’n geheime verhouding aan te knoop—of as jy reeds een het—moet jy nadink oor die volgende.

◼ Waarop stuur my oneerlike weg af? Is jy van plan om redelik gou met die persoon te trou? “Om met iemand uit te gaan sonder dat jy van plan is om te trou, is soos om iets te adverteer wat nie te koop is nie”, sê Evan, in die Verenigde State. Spreuke 13:12 sê: “’n Uitgestelde verwagting maak die hart siek.” Wil jy werklik iemand vir wie jy omgee, seermaak?

◼ Hoe voel Jehovah God oor wat ek doen? Die Bybel sê dat “alles . . . naak en oop en bloot [lê] voor die oë van hom aan wie ons rekenskap moet gee” (Hebreërs 4:13). As jy dus jou eie verhouding—of dié van ’n vriend—wegsteek, moet jy onthou dat Jehovah alreeds daarvan weet. En as leuens daarby betrokke is, het jy goeie rede om besorg te wees. Jehovah God keur leuens ten sterkste af. Trouens, “’n valse tong” word uitdruklik in die Bybel genoem as een van die dinge wat hy haat.—Spreuke 6:16-19.

Ja, as jy ’n geheime verhouding het, ontneem jy jou die beskerming wat jy geniet wanneer jy eerlik en openhartig oor jou verhouding is. Dit is nie verbasend dat sommige wat ’n geheime verhouding het, hulle aan seksuele wangedrag skuldig maak nie. Jane, in Australië, vertel van ’n vriendin wat in die geheim met ’n skoolvriend uitgegaan het en ’n dubbele lewe gelei het. “Teen die tyd dat haar pa uitgevind het dat sy ’n kêrel het, was sy swanger”, sê Jane.

Dit sal beslis verstandig van jou wees om met jou ouers of ’n ryp Christenvolwassene te praat oor enige geheime verhouding waarby jy dalk betrokke is. En as jy ’n vriend of vriendin het wat in die geheim met iemand uitgaan, moet jy nie deel hê aan wat hy of sy doen deur dit te help wegsteek nie (1 Timoteus 5:22). Hoe sal jy immers voel as die verhouding skadelike gevolge het? Sou jy nie ten minste gedeeltelik daarvoor verantwoordelik wees nie? Gestel ’n vriend wat suikersiekte het, eet in die geheim lekkers. Sê nou jy vind daarvan uit, maar jou vriend soebat jou om vir niemand te sê nie? Wat sal vir jou die belangrikste wees—om jou vriend se geheim te bewaar of om iets te doen wat moontlik sy of haar lewe kan red?

Dieselfde geld as jy iemand ken wat ’n geheime verhouding het. Moenie bekommerd wees dat jy julle vriendskap permanente skade gaan aandoen nie! ’n Ware vriend sal mettertyd besef dat jy sy of haar belange op die hart gedra het.—Spreuke 27:6.

‘Ek het geweet wat ek moes doen’

Jessica, wat aan die begin genoem is, het haar mening omtrent geheime verhoudings verander toe sy die ondervinding van ’n ander Christen gehoor het wat in dieselfde situasie was. “Nadat ek gehoor het dat sy die verhouding verbreek het”, sê Jessica, “het ek geweet wat ek moes doen.” Was dit maklik om die verhouding te beëindig? Nee! “Hy was die enigste seun van wie ek ooit werklik gehou het”, sê Jessica. “Ek het weke lank elke dag gehuil.”

Maar Jessica het ook iets anders geweet—dat sy Jehovah liefhet en dat sy, hoewel sy die spoor ’n ruk lank byster geraak het, werklik wou doen wat reg is. Ná verloop van tyd het sy oor die pyn gekom. “Nou”, sê Jessica, “is my verhouding met Jehovah beter as ooit. Ek is so dankbaar dat hy op net die regte tyd vir ons die leiding gee wat ons nodig het!”

Nog artikels uit die reeks “Jongmense vra . . . ” kan gevind word op die webwerf www.watchtower.org/ype

[Voetnote]

IETS OM OOR TE DINK

◼ Kyk weer na die drie situasies wat op bladsy 27 in vetdruk verskyn. Watter een, indien enige, beskryf hoe jy soms voel?

◼ Hoe kan jy die situasie hanteer sonder om ’n geheime verhouding aan te knoop?

[Venster op bladsy 28]

Geheimsinnigheid of privaatheid?

Nie alle geheimsinnigheid in verband met verhoudings is as gevolg van oneerlikheid nie. Gestel ’n jong man en vrou wat oud genoeg is om te trou, wil mekaar beter leer ken, maar wil dit ’n tyd lank redelik privaat hou. Dit is dalk soos ’n jong man genaamd Thomas gesê het: “Hulle wil nie geterg word met vrae soos: ‘Wanneer trou julle?’ nie.”

Ongepaste druk van ander kan beslis skadelik wees (Hooglied 2:7). Daarom sal sommige paartjies aan die begin van ’n verhouding dalk met goeie rede besluit om nie hulle verhouding openbaar te maak nie—hoewel hulle versigtig sal wees om hulle nie af te sonder nie (Spreuke 10:19). “Dit gee twee mense tyd om te besluit of hulle ernstig is oor mekaar”, sê Anna, wat 20 is. “As hulle is, kan hulle die verhouding dan openbaar maak.”

Terselfdertyd sal dit verkeerd wees om jou verhouding weg te steek van dié wat ’n reg het om daarvan te weet, soos jou ouers en die ouers van die persoon met wie jy uitgaan. As jy nie eerlik kan wees oor jou verhouding nie, moet jy jou afvra waarom dit die geval is. Is jou situasie soortgelyk aan dié van Jessica wat aan die begin van hierdie artikel genoem is? Weet jy in jou hart dat jou ouers geldige redes sou hê om daarteen beswaar te maak?

[Venster op bladsy 29]

’N WOORDJIE AAN OUERS

Nadat jy die vorige artikel gelees het, wonder jy dalk: ‘Sal my seun of dogter agter my rug met iemand uitgaan?’ Let op wat ’n aantal jongmense vir Ontwaak! gesê het oor waarom sommige moontlik in die versoeking kom om in die geheim met iemand uit te gaan, en dink dan na oor die bygaande vrae.

◼ “Sommige kinders vind nie ondersteuning by die huis nie, en daarom besluit hulle om te steun op ’n kêrel of ’n meisie.”—Wendy.

Hoe kan jy as ouer seker maak dat die emosionele behoeftes van jou kinders voldoende bevredig word? Kan jy in hierdie opsig verbeter? Indien wel, in watter opsigte?

◼ “Toe ek 14 was, het ’n uitruilstudent my gevra om sy meisie te wees. Ek het ingestem. Ek het gedink dit sou lekker wees as iemand sy arms om my sit.”—Diane.

Hoe sou jy hierdie situasie hanteer het as Diane jou dogter was?

◼ “Selfone maak dit maklik om ’n geheime verhouding te hê. Ouers het geen idee van wat aangaan nie!”—Annette.

Watter voorsorgmaatreëls kan jy tref wanneer dit kom by jou kinders se gebruik van selfone?

◼ “Dis baie makliker om in die geheim met iemand uit te gaan wanneer ouers nie noukeurig let op wat hulle kinders doen en saam met wie hulle dit doen nie.”—Thomas.

Is daar maniere waarop jy ’n groter rol in jou tiener se lewe kan speel, terwyl jy hom of haar nog steeds gepaste vryhede gun?

◼ “Ouers is dikwels nie by die huis wanneer hulle kinders daar is nie. Of hulle is te goedgelowig wanneer hulle hulle kinders toelaat om saam met ander mense na plekke te gaan.”—Nicholas.

Dink aan jou kind se beste vriend. Weet jy werklik wat hulle doen wanneer hulle saam is?

◼ “Geheime verhoudings kan ontstaan wanneer ouers te streng is.”—Paul.

Hoe kan jy ‘jou redelikheid bekend laat word’ sonder om Bybelwette en -beginsels prys te gee?—Filippense 4:5.

◼ “In my vroeë tienerjare het ek ’n swak selfbeeld gehad en het ek gesmag na aandag. Ek het e-posse begin stuur aan ’n seun in ’n nabygeleë gemeente en het verlief geraak. Hy het my spesiaal laat voel.”—Linda.

Kan jy aan heilsamer maniere dink waarop daar by die huis in Linda se behoeftes voorsien kon word?

Gebruik gerus hierdie artikel en hierdie bladsy as ’n grondslag vir ’n bespreking met jou seun of dogter. Die beste manier om geheimsinnigheid teë te werk, is hartlike en eerlike kommunikasie. Dit verg tyd en geduld om te onderskei wat die behoeftes van ’n jongmens is, maar die belonings maak dit die moeite werd.—Spreuke 20:5.