Van ons lesers

Jongmense vra . . . Wat is daarmee verkeerd om te vloek? (Maart 2008) Ek het in ’n Christenhuis grootgeword, maar ek het die gewoonte aangeleer om te vloek. Ek het keer op keer probeer ophou, maar sonder sukses. Hierdie artikel het my egter gehelp om selfbeheersing aan die dag te lê. Soos in die artikel gesê is, wil ek nie die gawe van spraak misbruik nie. Ek dink nou twee keer voordat ek praat. Baie dankie.

C.P., Brasilië

Ek is 12 jaar oud. By die skool word ek omring deur kinders wat vloek, en ek is bang dat ’n vloekwoord dalk eendag sal uitglip. Ek was op die punt om te skryf en te vra of ’n “Jongmense vra”-artikel oor hierdie onderwerp geskryf kan word, toe presies die artikel wat ek wou hê in die Ontwaak! verskyn. Die artikel het my herinner waarom dit verkeerd is om te vloek en my verder aangemoedig. Hou aan om sulke artikels te skryf!

A.P., Verenigde State

Ek en my man maak huise skoon vir ’n bestaan, en een van ons kliënte het ons vertel van haar “nuwejaarsvoorneme” om op te hou vloek. Sy het gesê dat sy God elke dag vra om haar te help om haar slegte gewoonte af te leer. Sy het my ook gevra of ek vir haar enige lektuur oor die onderwerp het. Ek het daaroor gebid en toe, soos gewoonlik, die nuutste tydskrifte van die webwerf www.pr2711.com op my MP3-speler afgelaai. Julle kan julle net voorstel hoe bly ek was toe ek die volgende dag die inhoudsopgawe hoor. Ek was so opgewonde! Al was die artikel vir jongmense geskryf, het ek geweet dat ons kliënt tog praktiese raad daarin sou vind. Ek kon nie wag om dit vir haar te gee nie.

S.C., Verenigde State

Lugverkeerbeheer—Hoe verseker dit jou veiligheid? (April 2008) “Veilig en gereed om op te styg!”, het ek uitgeroep nadat ek die artikel gelees het. Ek het bemoedig en veiliger gevoel, omdat die Ontwaak! my gewys het dat lugverkeerbeheerders werklik in ons veiligheid belangstel. Dankie.

T.S., Brasilië

Hoe sal jy antwoord? Ek is 12 jaar oud en woon in Suid-Ierland. Ek wil julle bedank vir die spesiale vasvra vir kinders agter in die Ontwaak! Dis ’n goeie idee. Dit kry kinders by die tydskrif betrokke. Hou asseblief aan om dit te druk. Weer eens, dankie.

A.C., Ierland