’n Regsgeleerde ondersoek Jehovah se Getuies

“MY KENNIS van Jehovah se Getuies was baie beperk”, sê Les Civin, ’n prokureur en ’n direkteur van ’n prokureursfirma in Suid-Afrika. Waarom het hy die opvattings van die Getuies ondersoek? Tot watter slotsom het hy gekom oor hierdie opvattings? Hier is wat hy vir Ontwaak! vertel het.

Wat was jou godsdiensagtergrond?

Ek kom uit ’n Joodse agtergrond, maar in die vroeë 1970’s het ek met Carol getrou, wat Anglikaans was. Sy het glad nie in godsdiens belanggestel nie, en godsdiens het destyds geen invloed op ons lewe gehad nie. Maar toe ons seun, Andrew, agt jaar oud was, het Carol gemeen dat ons iets moet doen sodat hy in die een of ander godsdiens kan grootword. ’n Rabbi het vir my gesê dat Andrew outomaties Joods sou word en ’n barmitswa kon hê wanneer hy 13 word, indien Carol haar tot Judaïsme bekeer. Ons het dus elke week bekeringsklasse by die sinagoge bygewoon.

Hoe het jy met Jehovah se Getuies in aanraking gekom?

Wanneer die Getuies na ons deur toe gekom het, het ek hulle altyd kortgeknip. “Ek is Joods en glo nie in die Nuwe Testament nie”, het ek gewoonlik gesê. Toe het Carol vir my vertel dat een van haar vriendinne ’n Getuie is en dat sy die Bybel baie goed ken. Carol het voorgestel dat ons ’n bietjie meer omtrent die Bybel leer. Ek het dus teen my sin ingestem om saam met die Getuies te studeer.

Hoe het jy op die Bybelstudie gereageer?

Ek was baie hooghartig. Ek het my Joodse geestelike waardes herontdek en gevoel dat ek deel is van die uitverkore volk. ‘Wat kan hierdie mense my leer?’ het ek gedink. Gedurende ons eerste bespreking het ek vir die Getuie wat na ons huis toe gekom het, gesê: “Ek is as ’n Jood gebore. Ek het my godsdiens gevind, en ek sal as ’n Jood sterf. Niks wat jy kan sê, sal my laat verander nie.” Hy het vriendelik erkenning gegee aan my standpunt. Ons het dus op Vrydag- en Maandagaande Joodse bekeringsklasse bygewoon, en op Sondagoggende (as ek nie daaruit kon kom nie) het ons saam met die Getuies gestudeer. Terloops, hulle studie was gratis, terwyl ons moes betaal vir die klasse by die sinagoge.

Ek het my Joodse Bybel gebruik omdat ek gedink het dat die Getuies ’n vertaling gebruik wat by hulle beskouings pas. Maar ek was verbaas oor hoeveel die twee Bybels ooreengestem het. Dit het my selfs meer vasbeslote gemaak om te bewys dat die Getuies nie weet waarvan hulle praat nie.

Nadat Carol ’n paar van die rabbi se klasse bygewoon het, het sy vir my gesê dat die rabbi na haar mening nie sy Bybel goed genoeg ken nie. Sy het my vertel dat sy die klasse nie meer gaan bywoon nie en dat sy Christus nie sal verwerp nie. Ek was verpletter en het dit oorweeg om ons huwelik te beëindig. Toe die skok egter oorgewaai het, het ek op ’n ander strategie besluit—ek sou my regsagtergrond gebruik om aan Carol te bewys dat hierdie ‘malkop sekte’ verkeerd is.

Het jy daarin geslaag?

’n Rabbi het my ’n boek gegee wat geskryf is om Messiaanse profesieë te weerlê. Ek en Carol het hierdie boek 18 maande lank bestudeer. Ons het ook aangehou met ons weeklikse studie saam met die Getuies. Maar namate ons elke profesie in die rabbi se boek ondersoek het, het ek al hoe onrustiger geraak. In teenstelling met die redenasies in die boek het die Messiaanse profesieë in die Bybel deurentyd gewys na net een persoon—Jesus Christus. Die saak het uiteindelik ’n klimaks bereik toe ons die profesie in Daniël 9:24-27 gestudeer het, wat voorspel het dat die Messias in die jaar 29 HJa sou verskyn. Die Getuie het ’n interlineêre Hebreeuse Bybel gehad met die letterlike Engelse vertaling onder elke woord. Ek het die bewoording nagegaan, my eie berekeninge van die chronologie gedoen en gesê: “Nou goed, die profesie wys na 29 HJ. Wat daarvan?”

“Dít is die jaar toe Jesus gedoop is”, het die Getuie gesê.

Ek was stomgeslaan! Ek was ook verbaas oor hoe akkuraat Bybelprofesieë is en hoe goed hulle inmekaarpas.

Hoe het jou vriende op jou verandering van sienswyse gereageer?

Party was diep besorg en het belowe om my en my vrou voor te stel aan mense wat ons kon wys dat ons gebreinspoel word. Maar ons oortuigings was gebaseer op deeglike navorsing en logiese redenering—juis die teenoorgestelde van breinspoeling.

Wat het jou laat besluit om ’n Getuie te word?

Ek het eers ’n paar vergaderinge by die Koninkryksaal begin bywoon saam met my vrou, wat teen daardie tyd reeds ’n Getuie was.b Ek is beïndruk deur die vriendelikheid van die Getuies en hulle liefde vir mekaar, ongeag hulle ras. Ek het dit nie in mý godsdiens gesien nie. Ek is dus ná sowat drie jaar se verdere studie gedoop.

Hoe voel jy oor jou besluit om ’n Getuie te word?

Dit is ’n eer om te kan sê: “Ek is een van Jehovah se Getuies.” Maar wanneer ek terugdink aan hoe ek teen die waarheid gestry het, voel dit of ek nie die geestelike skatte verdien wat Jehovah my gegee het nie. Ek sal nooit spyt wees oor my besluit nie.

Watter seëninge het jy al geniet?

Baie. Om maar een ding te noem, ek beskou dit as ’n kosbare voorreg om as ’n ouer man, of geestelike herder en onderrigter, in ons plaaslike gemeente te dien. Ek kon ook help by die Regsafdeling van die Suid-Afrikaanse takkantoor van Jehovah se Getuies. Maar die grootste seën is sonder twyfel die feit dat ek Jehovah en sy Seun kan ken en dat ek die ware betekenis begryp van die tye waarin ons lewe en van die betekenisvolle gebeure wat die wêreld skud.

[Voetnote]

[Lokteks op bladsy 11]

Ek was . . . verbaas oor hoe akkuraat Bybelprofesieë is en hoe goed hulle inmekaarpas