‘Net een van die baie lewens wat jy geraak het’
IN Januarie 1996 was Carol siek weens ’n breingewas. Sy was in haar sestigerjare en was altyd ’n gelukkige, sterk vrou met ’n bemoedigende gedagte vir almal. Maar nou het die dokters probeer om die dodelike gewas te verwyder. Gedurende haar stryd het Carol die volgende brief ontvang:
“Liewe Carol
“Ek is baie jammer om van jou siekte te hoor. Gelukkig het ons die ware hoop wat die Bybel ons help om te leer ken en lief te hê. Hierdie hoop is dat Jehovah se Koninkryk oor die aarde gaan heers sodat ons onder paradystoestande kan lewe, ’n tyd waarna ons almal uitsien.
“Ek wil hê jy moet weet dat jou persoonlike predikingswerk baie mense van die ewige dood gered het. Ek is een van daardie mense. Ek is nie seker of jy ons eerste ontmoeting onthou nie. Ek was toe 20 jaar oud. Ek het lang hare gehad, het dwelms verkoop en het met ’n klomp straatboewe uitgehang. Ons het almal vuurwapens gehad en het geen ware liefde gehad nie behalwe vir onsself.
“Jy en ’n ander Getuie het aan my deur geklop en vir my Die Wagtoring en Ontwaak! aangebied. Ek het jou ’n dollar probeer gee en het gesê dat ek nie die tydskrifte wil hê nie. Jy het vir my vertel dat julle doel nie bloot is om bydraes te kry nie. Jy het vir my gesê dat julle ’n werk doen om mense die Bybel te help lees. Ek is nie seker of ek die tydskrifte geneem of gelees het nie. Jy het egter die saadjie van waarheid in my lewe geplant.
“Jare later het ’n ander Getuie, Gary, na my ma se huis gekom terwyl ek daar was. Ek het hom van jou besoek ’n paar jaar tevore vertel. Gary het die Bybel ’n lang tyd met my gestudeer totdat ek uiteindelik in 1984 gedoop is. Nou leer ek my kinders die waarheid van God se Koninkryk.
“Ek is seker dat ek net een van die baie lewens is wat jy geraak het in jou jare van getroue diens. Maar deur hierdie liefdevolle goedhartigheid het jy dit vir my en my gesin moontlik gemaak om die Groot God, Jehovah, en sy Seun, Christus Jesus, te leer ken. Ek sien uit na die dag wanneer ek jou in die nuwe stelsel van dinge kan sien wanneer Jehovah al die trane van ons oë sal afvee en die dood nie meer daar sal wees nie.—Openbaring 21:4.
“Wat my en my gesin betref, ons is bly dat ons die geleentheid gehad het om jou te ken en om deel van jou getuieniswerk te wees. Dankie.
“Met broederliefde,
Peter”
Ná ’n siekbed van ses maande is Carol in Maart 1996 oorlede, nadat sy baie saadjies van waarheid gedurende haar 35 jaar as ’n ywerige evangeliedienaar geplant het. Sy het geleer dat ’n mens nooit weet wanneer ’n saadjie vrug sal voortbring nie, miskien eers jare later.—Matteus 13:23.