’n Wêreld sonder godsdiens—’n Verbetering?
DIE nuwe ateïste stel hulle ’n wêreld voor sonder godsdiens—sonder selfmoordbomaanvallers, sonder godsdiensoorloë en sonder TV-evangeliste wat hulle kuddes melk. Sal jy van so ’n wêreld hou?
Voordat jy antwoord, vra jou af: ‘Is daar enige bewys dat die wêreld ’n beter plek sal wees as almal ateïste is?’ Dink hieraan: Tot 1,5 miljoen Kambodjane het gesterf in die Khmer Rouge-poging om ’n godlose Marxistiese staat te stig. En in die USSR, wat amptelik ’n ateïstiese staat was, het Josef Stalin se bewind tienmiljoene sterftes tot gevolg gehad. Daardie euwels kan weliswaar nie regstreeks aan ateïsme toegeskryf word nie. Maar dit toon wel dat ’n ateïstiese bewind nie vrede en eenheid kan waarborg nie.
Min mense sal ontken dat godsdiens al baie lyding veroorsaak het. Maar is dit God se skuld? Nee! Hy is net so min skuldig as wat ’n motorvervaardiger sal wees vir ’n ongeluk wat veroorsaak word deur ’n bestuurder wat ’n selfoon gebruik. Die mensdom se lyding word deur baie dinge veroorsaak, waarvan een diepliggender is as godsdiensopvattings. Die Bybel identifiseer dit as inherente onvolmaaktheid. “Almal het gesondig en skiet te kort aan die heerlikheid van God” (Romeine 3:23). Hierdie sondige neiging bevorder gewoonlik selfsug, ongepaste trots, geweld en ’n begeerte na sedelike onafhanklikheid (Genesis 8:21). Dit maak ook dat mense hulle probeer verontskuldig en opvattings verkies wat wangedrag verskoon (Romeine 1:24-27). Jesus Christus het tereg gesê: “Uit die hart kom daar . . . goddelose redenasies, moorde, egbreuk, hoererye, diefstalle, valse getuienisse, lasteringe.”—Matteus 15:19.
’n Belangrike onderskeid
Op dié stadium in die bespreking moet ’n onderskeid getref word tussen ware aanbidding—dit wil sê aanbidding wat vir God aanneemlik is—en valse aanbidding. Ware aanbidding sal mense help om teen slegte neigings te stry. Dit sal eienskappe bevorder soos selfopofferende liefde, vrede, goedhartigheid, goedheid, sagmoedigheid, selfbeheersing, huwelikstrou en respek vir ander (Galasiërs 5:22, 23). Valse godsdiens sal daarenteen geneig wees om te volg wat gewild is—om ‘mense se ore te streel’, soos die Bybel sê—deur party van die slegte dinge wat Jesus veroordeel het, goed te praat.—2 Timoteus 4:3.
Dra ateïsme dalk by tot dieselfde dubbele standaarde of verwarring wat sedes betref? ‘Geen God’ beteken geen aanspreeklikheid teenoor ’n goddelike gesag nie, sowel as “geen objektiewe waardes wat ons moet respekteer nie”, sê die regsprofessor Phillip Johnson. Sedelikheid word dan relatief, met elke persoon wat sy eie standaarde vasstel—as hy enige wil hê. Sulke denke maak ateïsme ongetwyfeld ’n aantreklike filosofie vir party mense.—Psalm 14:1.
Die feit is egter dat God nie onwaarheid—hetsy ateïsties of godsdienstig—en diegene wat dit bevorder, vir ewig sal duld nie.a Hy belowe: “Die regskapenes [op sedelike en geestelike gebied] sal op die aarde woon, en die onberispelikes sal daarop oorbly. Wat die goddeloses betref, hulle sal van die aarde af uitgeroei word; en die verraderlikes sal daarvan weggeruk word” (Spreuke 2:21, 22). Die resultaat sal iets wees wat geen mens, geen mensefilosofie en geen menslike instelling ooit teweeg kan bring nie—universele vrede en geluk.—Jesaja 11:9.
[Voetnoot]
a ’n Grondige Bybelse verduideliking van die redes waarom God goddeloosheid en lyding tydelik toelaat, kan gevind word in hoofstuk 11 van die studiehulp Wat leer die Bybel werklik?, uitgegee deur Jehovah se Getuies.
[Venster op bladsy 6]
GOD SE BESKOUING VAN GRUWELDADE IN DIE NAAM VAN GODSDIENS
Die land wat aan eertydse Israel gegee is, was bewoon deur die Kanaäniete, ’n verdorwe volk wat hulle skuldig gemaak het aan geslagsonsedelikheid—insluitende bloedskande, homoseksualiteit en bestialiteit—sowel as rituele kinderofferandes (Levitikus 18:2-27). Die boek Archaeology and the Old Testament sê dat argeoloë “hope as en oorblyfsels van kindergeraamtes opgegrawe het in begraafplase by heidense altare, wat toon dat [kinderofferandes] ’n algemene gebruik was”. Die Kanaäniete het hulle gode deur middel van growwe onsedelikheid aanbid en ook hulle eersgeborenes aan dieselfde gode geoffer, sê ’n Bybelhandboek. Dit voeg by: “Argeoloë wat in die puin van Kanaänitiese stede opgrawings doen, is verbaas dat God hulle nie vroeër vernietig het nie.”
God se vernietiging van die Kanaäniete is vandag vir ons ’n kragtige herinnering dat hy nie bose dade wat in sy naam gepleeg word, vir ewig sal duld nie. “[God] het ’n dag vasgestel waarop hy van voorneme is om die bewoonde aarde in regverdigheid te oordeel”, sê Handelinge 17:31.
[Prente op bladsy 7]
Godsdienstige sowel as niegodsdienstige persone het al gruweldade gepleeg
Die kerk ondersteun Hitler
Skedels van Khmer Rouge-slagoffers, Kambodja
[Erkenning]
AP Photo