Die Kersgees versprei—Waarom?
SIEN jy uit na Kersfees? Of raak jy senuweeagtig en bekommerd namate dit nader kom? Miljoene mense vra: ‘Vir wie gaan ek geskenke koop? Wat moet ek koop? Kan ek dit bekostig? Hoe lank sal dit my neem om my skuld af te betaal?’
Ten spyte van sulke bekommernisse bly Kersfees baie gewild. Trouens, die viering het selfs na nie-Christelike lande versprei. In Japan vier die meeste gesinne nou Kersfees, nie om godsdiensredes nie, maar bloot as ’n geleentheid om fees te vier. In China “kan Kersvader se goedige rooi gesig oral in groot stede se winkelvensters gesien word”, sê The Wall Street Journal en voeg by: “Kerskoors het China se nuwe stedelike middelklas beetgepak, wat dit as ’n verskoning gebruik om inkopies te doen, te eet en partytjie te hou.”
In baie wêrelddele het Kersfees die plaaslike ekonomie ’n hupstoot gegee. Dit is veral die geval in China, wat nou “’n reuse-uitvoerder van plastiekbome, tooisels, flikkerliggies en ander Kersversierings” is, sê die Journal.
Lande wat oorwegend Moslem is, bevorder ook feeste soortgelyk aan Kersfees, hoewel dit nie noodwendig op 25 Desember gevier word nie. In Ankara, Turkye, en Beiroet, Libanon, is dit nie ongewoon om versierde bome en geskenkpakkies in winkelvensters te sien nie. In Indonesië word feesgeleenthede geborg deur hotelle en winkelsentrums, en kinders kan saam met Kersvader eet of ’n foto saam met hom laat neem.
In Westerse lande is Kersfees nou grotendeels sekulêr en kommersieel, met baie advertensies wat “openlik op kinders gemik is”, het die Royal Bank Letter van Kanada gesê. Party mense woon weliswaar nog steeds Kersdienste by ’n kerk by. Maar winkelsentrums, waar Kersliedere weerklink, het die nuwe tempels geword. Waarom die verandering? Hou die rede dalk verband met die oorsprong van Kersfees? Wat is die oorsprong daarvan?
Voordat ons hierdie vrae bespreek, sal dit goed wees om die Bybelverslae te lees waarop Kerstonele na bewering gegrond is.
[Venster/Prent op bladsy 4]
WAT DIE EVANGELIESKRYWERS SÊ
Die apostel Matteus: “Nadat Jesus in die dae van koning Herodes in Betlehem in Judea gebore is, kyk! toe het sterrewiggelaars uit oostelike streke na Jerusalem gekom en gesê: ‘Waar is die een wat as koning van die Jode gebore is? Want ons het sy ster gesien toe ons in die ooste was, en ons het gekom om aan hom hulde te bewys.’ Toe koning Herodes dit hoor, was hy ontsteld.” Daarom het Herodes “die hoofpriesters” gevra “waar die Christus gebore sou word”. Toe Herodes uitvind dat dit “in Betlehem” is, het hy vir die sterrewiggelaars gesê: “Gaan doen noukeurig ondersoek na die jong kindjie, en wanneer julle hom gevind het, moet julle dit aan my rapporteer.”
“Hulle [het] vertrek; en kyk! die ster wat hulle gesien het toe hulle in die ooste was, het voor hulle uit gegaan, totdat dit gaan staan het bo die plek waar die jong kindjie was. . . . Toe hulle in die huis ingaan, het hulle die jong kindjie by sy moeder Maria gesien.” Nadat hulle vir Jesus geskenke gegee het, is “hulle in ’n droom ’n goddelike waarskuwing gegee . . . om nie na Herodes toe terug te keer nie, [en daarom] het hulle langs ’n ander weg na hulle land teruggegaan”.
“Nadat hulle weggegaan het, kyk! toe het Jehovah se engel in ’n droom aan Josef verskyn en gesê: ‘Staan op, neem die jong kindjie en sy moeder en vlug na Egipte . . . ’ Toe het hy opgestaan en die jong kindjie en sy moeder in die nag saamgeneem en daarvandaan weggegaan . . . Toe Herodes sien dat hy deur die sterrewiggelaars uitoorlê is, het hy baie woedend geword, en hy het gestuur en al die seuntjies van twee jaar en jonger in Betlehem en in al sy omstreke om die lewe laat bring.”—Matteus 2:1-16.
Die dissipel Lukas: Josef het “van Galilea af opgegaan, uit die stad Nasaret, na Judea, na die stad van Dawid, wat Betlehem genoem word, . . . om geregistreer te word saam met Maria . . . Terwyl hulle daar was, . . . het [sy] geboorte gegee aan haar seun, die eersgeborene, en sy het hom met doeke toegedraai en hom in ’n krip neergelê, want daar was geen plek vir hulle in die gastekamer nie.”
“Daar was ook in daardie selfde landstreek herders wat in die oop veld gebly en in die nag oor hulle kuddes wag gehou het. En skielik het Jehovah se engel by hulle gestaan, . . . en hulle het baie bevrees geword. Maar die engel het vir hulle gesê: ‘Moenie vrees nie, want kyk! ek maak aan julle goeie nuus bekend van groot vreugde wat die hele volk sal hê, want daar is vandag vir julle in die stad van Dawid ’n Redder gebore, wat Christus die Here is.’” Daarop het die herders “hulle gehaas en Maria sowel as Josef gevind, en die kindjie wat in die krip lê”.—Lukas 2:4-16.