Die merkwaardige proses van kindergeboorte
DIE wagtyd van nege maande is uiteindelik verby, en die baba na wie daar soveel uitgesien is, sal binnekort gebore word.a Die verwagtende moeder se serviks het dig toe gebly en die fetus veilig in die baarmoeder gehou. Maar nou word haar serviks dunner, sagter en ontspan dit. Die wonderwerk van geboorte begin.
Wat sit die wonderlike proses van kindergeboorte aan die gang? Van al die faktore wat betrokke is, is twee besonder merkwaardig. Eerstens word die hormoon oksitosien deur die brein vrygestel. Hierdie hormoon kom in mans sowel as vroue voor, maar wanneer die swanger moeder begin kraam, word ’n groot hoeveelheid daarvan vrygestel, wat die serviks laat oopgaan en die baarmoeder laat saamtrek.
Presies hoe die pituïtêre klier van die verwagtende moeder weet wanneer om hierdie hormoon te begin vrystel, is ’n raaisel. Die boek Incredible Voyage—Exploring the Human Body sê: “Op die een of ander manier weet haar brein dat die einde van die swangerskap aangebreek het en dat dit tyd is vir die kragtige baarmoederspiere . . . om hulle kort maar belangrike taak te verrig.”
’n Tweede faktor wat by hierdie proses betrokke is, is die rol van die plasenta, wat ophou om progesteroon te vervaardig. Gedurende swangerskap het progesteroon hewige sametrekkings voorkom. Maar nou, sonder die werking van progesteroon, begin die baarmoeder saamtrek. Gewoonlik word die baba ná ’n kraamproses van 8 tot 13 uur by die ontspanne, ontsluite serviks uitgestoot. Daarna word die plasenta ook uitgewerp.
Nou moet die pasgebore baba gou aanpas by nuwe lewensomstandighede, wat baie anders is as dié in die baarmoeder. Byvoorbeeld, terwyl die fetus in die baarmoeder was, was sy longe vol vrugwater, wat uitgedruk is toe die baba deur die geboortekanaal beweeg het. Nou moet die longe met lug gevul word sodat die baba kan begin asemhaal, wat gewoonlik deur sy eerste gehuil aangedui word. Drastiese veranderinge vind ook in die hart en die res van die bloedsomloopstelsel plaas. ’n Gat tussen die twee atriums van die hart en ’n bloedvat wat die bloed van die longe af wegkeer, sluit sodat die bloed ’n nuwe roete deur die longe kan volg om suurstof op te neem. Dit is verstommend dat hierdie aanpassing by die wêreld buite die baarmoeder so vinnig plaasvind.
Die hele proses van kraam en geboorte laat ons dink aan die woorde van die Bybel: “Vir alles is daar ’n vasgestelde tyd, ja, ’n tyd vir elke aangeleentheid onder die hemel.” Dit sluit “’n tyd vir geboorte” in (Prediker 3:1, 2). Jy sal sekerlik saamstem dat hierdie reeks biochemiese en fisiese gebeure, wat alles in net ’n paar uur plaasvind, ’n treffende bewys is van ontwerp deur ons Skepper, wat in die Bybel “die bron van die lewe” genoem word.—Psalm 36:9; Prediker 11:5.
[Voetnoot]
a Swangerskap duur gewoonlik 37 tot 42 weke.
[Diagram/Prente op bladsye 16, 17]
Proses van kindergeboorte
1 Posisie van fetus voordat kraam begin
2 Beweging van fetus na die geboortekanaal
3 Serviks gaan oop
4 Fetus word uitgestoot
[Diagram]
(Sien publikasie vir oorspronklike teksuitleg)
1
plasenta
vagina
serviks
2
3
4