Die miniatuurpaleise van Istanboel

● Voëlhuisies wat van hout gemaak is, kan in baie wêrelddele gesien word. Dit is ideale plekke vir voëls om te eet, warm te bly, nes te maak, kleintjies groot te maak en beskerming teen roofdiere en die elemente te vind. In Istanboel is voëlhuisies ontwerp om soos regte geboue te lyk. Party lyk soos weelderige woonhuise, ander soos moskees of paleise.a Dit staan bekend as duiwehuise, voëlwonings en selfs mossiepaleise.

Die oudste van hierdie voëlhuisies dateer uit die 15de eeu of vroeër en is volgens die Ottomaanse boustyl gebou. Dit is eenvoudige huisies, maar vanaf die 18de eeu is deftige, weelderige voëlhuisies gemaak. Party het houers vir kos en water, wandelpaadjies en selfs balkonne gehad van waar die voëls as ’t ware die uitsig kon geniet. Hierdie huisies is gewoonlik aangebring teen die kant van ’n gebou wat die meeste son gekry het en die beste beskutting teen die wind gebied het—ver buite die bereik van katte, honde en mense. Soms is hierdie voëlhuisies nie net vir die voëls opgerig nie, maar ook as deel van die versiering en algehele ontwerp van ’n gebou. Voëlhuisies kan teen die mure van groot en klein moskees sowel as op openbare drinkfonteine, teen biblioteke, brûe en woonhuise gesien word.

Ongelukkig het baie van hierdie miniatuurpaleise verweer as gevolg van voortdurende blootstelling aan die elemente, terwyl ander doelbewus verwoes is deur mense wat nie besef het hoe waardevol dit is nie. Voëlhuisies word al hoe skaarser. Maar as jy Istanboel besoek en van geskiedkundige argitektuur hou, kan jy kyk of jy hierdie delikate huisies op hulle beskutte plekke kan raaksien. Noudat jy meer van die huisies weet, sal dit jou besoek aan die stad verryk as jy hierdie miniatuurpaleise sien.

[Voetnoot]