Jongmense vra

Waar pas ek in?

“Ek is 21. Daar is nie baie mense van my ouderdom hier nie, en daarom kuier ek saam met hoërskoolkinders of getroude paartjies. Die eerste groep stres oor die eksamen, en die tweede groep is bekommerd oor huisverbande. Nie een van hierdie dinge laat my snags wakker lê nie. Dit sal so lekker wees om mense te vind by wie ek kan inpas!”—Carmen.a

BYNA almal, ongeag hulle ouderdom, wil deur ander aanvaar word. Dit is seker ook met jou die geval. Daarom maak dit ’n mens so seer as jy uitgesluit en geïgnoreer word, asof jy onsigbaar is, of “net iemand op die agtergrond” is, soos die 15-jarige Michaela haarself beskryf.

As jy ’n Christen is, het jy natuurlik ’n “hele gemeenskap van broers” by wie jy kan inpas (1 Petrus 2:17). Nogtans kan dit soms voel asof jy nie inpas nie. “Op pad huis toe van die Christelike vergaderinge af het ek agter in die motor gesit en huil”, vertel die 20-jarige Helena. “Hoe meer ek gesukkel het om in te pas, hoe meer teleurgesteld was ek.”

Wat kan jy doen as jy voel dat jy nêrens inpas nie? Om hierdie vraag te beantwoord, kan ons eers identifiseer (1) by watter soort mense dit vir jou die moeilikste is om in te pas en (2) hoe jy gewoonlik reageer wanneer jy in hulle geselskap is.

Maak ’n ✔ langs die groep by wie jy eenvoudig nie kan inpas nie.

1. Ouderdom

□ portuurs □ ouer jong-mense □ volwassenes

2. Vermoëns

Mense wat

□ atleties □ talentvol □ intellektueel is

3. Persoonlikheid

Mense wat

□ vol selfvertroue is □ gewild is □ in ’n kliek is

Maak nou ’n ✔ langs die stelling wat beskryf hoe jy gewoonlik reageer wanneer jy by die mense is wat jy hierbo geïdentifiseer het.

□ Ek gee voor dat ek dieselfde belangstellings of vermoëns het.

□ Ek ignoreer die dinge waarin hulle belangstel en praat oor die dinge waarin ek belangstel.

□ Ek bly stil en soek na die eerste geleentheid om weg te kom.

Noudat jy geïdentifiseer het by watter groep dit vir jou die moeilikste is om in te pas en hoe jy die situasie hanteer het, is ons amper gereed om te kyk hoe jy jou plek kan vind. Maar kom ons kyk eers na ’n paar hindernisse waarvan jy bewus moet wees en wat jy moet vermy as jy by ander wil inpas.

HINDERNIS 1: Afsondering

Die uitdaging. Wanneer jy saam met mense is wie se belangstellings of talente van joune verskil, is dit maklik om soos die vyfde wiel aan die wa te voel—veral as jy skaam is. “Ek haat dit om ’n gesprek aan die gang te probeer hou”, sê die 18-jarige Anita. “Ek is bang dat ek die verkeerde ding gaan sê.”

Wat die Bybel sê. “Wie hom afsonder, sal sy eie selfsugtige verlange soek; teen alle praktiese wysheid sal hy losbreek” (Spreuke 18:1). As jy in jou dop kruip, sal dit sake dus net vererger. Om die waarheid te sê, wanneer jy jou afsonder, beland jy op die ou end in ’n bose kringloop: Jou eensaamheid oortuig jou dat jy nie inpas nie, wat maak dat jy jou van ander onttrek, wat jou eensaam laat voel, wat jou oortuig dat jy nie inpas nie. En jy bly vasgevang in hierdie kringloop; jy gaan om en om, totdat jy iets daaromtrent doen!

“Mense kan nie gedagtes lees nie. As jy nie sê wat jy wil hê nie, gaan jy dit nie kry nie. As jy jou eenkant hou, gaan jy nie vriende maak nie. Jy moet darem ’n poging aanwend. Dis nie regverdig om te dink dat dit die ander persoon se verantwoordelikheid is nie. Vriendskap is ’n tweerigtingstraat.”—Melinda, 19.

HINDERNIS 2: Desperaatheid

Die uitdaging. Party mense is so desperaat om in te pas dat hulle by die verkeerde groep betrokke raak—hulle dink dat enige vriende beter is as geen vriende nie. “Ek was altyd baie hartseer dat ek nie deel was van die gewilde groep by die skool nie. Ek het amper gewens dat ek in die moeilikheid kan kom net sodat hulle my sou aanvaar”, sê die 15-jarige René.

Wat die Bybel sê. “Hy wat hom met die sotte inlaat, met hom sal dit sleg gaan”—of soos die Contemporary English Version dit stel: “Jy benadeel jouself as jy met dwase omgaan” (Spreuke 13:20). Moet dit nie verkeerd verstaan nie: die “sotte” of “dwase” van wie hierdie vers praat, is nie noodwendig letterlik dom nie. Inteendeel, hulle kan topstudente wees. Maar as hulle min respek vir Bybelstandaarde het, is hulle dwaas in God se oë. En jy sal net seerkry as jy soos ’n verkleurmannetjie is en jou kleure verander om by hulle in te pas.—1 Korintiërs 15:33.

“Nie almal is goeie geselskap nie. Jy wil nie vriende hê wat jou laat voel dat jy moet verander wanneer jy by hulle is nie. Jy wil vriende hê wat regtig vir jou lief is en wat jou sal ondersteun.”—Paula, 21.

Neem die inisiatief

Moenie wag vir ander om jou te nader en jou te nooi om met hulle vriende te wees nie. “Ons kan nie altyd verwag dat mense met ons moet vriende maak nie”, sê die 21-jarige Gene. “Ons moet met hulle vriende maak.” Hier is twee wenke wat jou kan help om dit te doen:

Soek buite jou ouderdomsgroep. Die ouderdomsverskil tussen die Bybelkarakters Jonatan en Dawid was omtrent 30 jaar, en tog het hulle “boesemvriende” geword (1 Samuel 18:1, CEV).b Die les? Dit is moontlik om by volwassenes in te pas! Dink hieraan: Waarom sal jy jou beperk tot net een ouderdomsgroep en dan kla dat jy nie vriende kan vind nie? Dit sal wees soos om op ’n verlate eiland van die honger dood te gaan terwyl visse oral om jou swem! Die feit is: daar is goeie mense by wie jy kan inpas. En een manier om hulle te vind, is om buite jou ouderdomsgroep te soek.

“My ma het my aangespoor om met ouer persone in die gemeente te gesels. Sy het gesê dat ek verbaas sal wees oor hoeveel ek met hulle in gemeen het. Sy was reg, en nou het ek baie vriende!”—Helena, 20.

Leer hoe om gesprekke te voer. Dit verg inspanning om ’n gesprek te voer—veral as jy skaam is. Maar jy kan dit doen. Die sleutel is om (1) te luister, (2) vrae te vra en (3) opregte besorgdheid te toon.

“Ek probeer meer luister as praat. En wanneer ek praat, probeer ek om nie oor myself te praat of ander in ’n negatiewe lig te stel nie.”—Serena, 18.

“As iemand oor iets wil gesels waarvan ek nie veel weet nie, vra ek hom om dit te verduidelik, wat hom hopelik nog meer met my sal laat gesels.”—Jared, 21.

Miskien is jy van nature teruggetrokke. Daar is niks daarmee verkeerd nie. Jy hoef nie ’n ekstrovert te word nie! Maar as jy voel dat jy nie by ander inpas nie, kan jy die wenke in hierdie artikel probeer volg. Later sal jy dalk soos Leah voel. “Omdat ek skaam is”, sê sy, “moet ek my dwing om met ander te gesels. Maar as jy vriende wil maak, moet jy vriendelik wees. Daarom het ek met ander begin gesels.”

Nog artikels uit die reeks “Jongmense vra” kan gevind word op die webwerf www.watchtower.org/ype

[Voetnote]

[Venster/Prente op bladsy 19]

WAT JOU PORTUURS SÊ

“Ek probeer om met ten minste een persoon te praat met wie ek nog nie voorheen by ’n Christelike vergadering gepraat het nie. Ek het gevind dat ’n vriendskap met ’n eenvoudige groet kan begin!”

“Dit was vir my maklik om terug te sit en te sê dat ander mense nie van my hou nie en dat ek nooit by hulle sal inpas nie. Dit het werklik inspanning geverg om iets daaromtrent te doen. Op die ou end is dit die moeite werd om die inisiatief te neem, en dit help om jou karakter te bou.”

“Ek het stadig maar seker met volwassenes begin gesels. In die begin het ek baie ongemaklik gevoel! Maar op die ou end was dit tot my voordeel, want ek het op ’n jong ouderdom lewenslange vriende gemaak op wie ek altyd kan staatmaak.”

[Prente]

Lauren

Reyon

Carissa

[Venster op bladsy 20]

VRA JOU OUERS

Was dit vir julle moeilik om in te pas toe julle so oud soos ek was? By watter groep mense was dit vir julle die moeilikste om in te pas? Hoe het julle die situasie hanteer?

․․․․․

[Diagram op bladsy 20]

(Sien publikasie vir oorspronklike teksuitleg)

DIE BOSE KRINGLOOP VAN EENSAAMHEID

EENSAAMHEID, wat my soos ’n . . .

UITGEWORPENE laat voel, en maak dat ek my . . .

ONTTREK, lei tot . . .