’n Tradisionele vorm van Russiese houtskilderkuns

● Die meeste mense wat Rusland besoek, hou daarvan om die een of ander soort kunshandwerk, soos matriosjka-poppe, te koop. In vroeë tye is die meeste van hierdie items deur bedrewe plattelandse vakmanne uit hout gemaak. ’n Tradisionele vorm van houtskilderkuns word chochloma genoem.

Russiese mense het eeue lank geëet uit houtbakke wat sorgvuldig uitgekerf en geverf is, en hulle het ook lepels, bekers en ander houers gebruik wat van hout gemaak is. Die ontwerpe wat hierop geverf is, het gewoonlik plante- of dierelewe uitgebeeld. Soms het almal in ’n dorpie hulle daarop toegespits om sekere houtvoorwerpe te maak.

Dorpsbewoners het gedurende die lang, koue winters, wanneer daar min plaaswerk was, aan hierdie projekte gewerk. Die vervaardiging van sulke kunshandwerk het tweehonderd of meer jaar gelede baie winsgewend geword in sommige dorpies. Die hele bevolking van Semjonof het byvoorbeeld eenkeer opgehou boer en byna tweemiljoen houtbakke, -borde, -bekers en -lepels in een jaar vervaardig.

Dorpsbewoners naby die dorpie Nizjni Nowgorod het ’n tegniek uitgevind om hulle geverfde houers ’n harde, vergulde afwerking te gee. Hittebestande verwe en vernisse is ontwikkel, en voorbereide voorwerpe is in ’n oond gebak. Hoë temperature het die silwerkleurige oppervlak ’n egalige goue kleur laat verkry. Die proses word tot vandag toe in chochloma-fabrieke in die omgewing van Nizjni Nowgorod gebruik.

Chochloma-ontwerpe sluit blomme en plante in wat in Russiese woude en graslande gevind word, sowel as voëls en visse. Krullende rankies en blare tesame met vrugte, soos verskillende soorte bessies, word ook dikwels uitgebeeld. Die kleure is gewoonlik rooi, swart, goud en groen. Danksy chochloma-kunshandwerk word die etenstafels van mense in baie plekke regoor die wêreld vandag versier met die pragtige kleure van die Russiese landskap.