Ons beskou die wêreld
’n Waarskuwing oor pasaangeërs
Die diefstalverklikkers wat tans in baie winkels en inkopiesentrums geïnstalleer word, kan ’n gesondheidsgevaar inhou vir mense wat ’n elektroniese pasaangeër dra om hulle hartklop te beheer. Die Franse mediese tydskrif Le Concours Médical berig dat die probleem in Frankryk onder dokters se aandag gebring is deur ’n pasiënt wat in ’n supermark werk en gekla het dat sy hartklop telkens kwaai toeneem wanneer hy die winkel se betaalpunte nader. Nadat die span dokters meer as 30 verskillende soorte pasaangeërs getoets het, het hulle bevind dat die elektromagnetiese velde wat deur die diefstalverklikkerstelsel geskep word, veroorsaak het dat die meeste pasaangeërs onklaar raak, en dat dit soms ernstig was. Die dokters waarsku dat mense met pasaangeërs van die gevaar bewus gemaak moet word.
’n Dodelike ritus
’n Kliniek in San Antonio, Texas, het onlangs ’n ongewone aantal versoeke vir vigs-toetse van tienermeisies ontvang. ’n Ondersoek het aan die lig gebring dat die meisies as deel van ’n inwydingsritueel seks sonder beskerming met “HIV-positiewe bendelede” gehad het. Volgens New York se Daily News sê amptenare dat die 14- en 15-jarige meisies “dit gedoen het om ’n deel van die bende te wees” en om “te bewys dat hulle ‘taai genoeg’ is om die vigs-virus te oorwin”. Baie van die meisies het by die bendes aangesluit op soek na die liefde en vertroosting wat hulle nie tuis ontvang het nie. Maar die bendelewe stel hulle net bloot aan geweld, promiskuïteit en seksueel oordraagbare siektes. Waar dit die mening van een amptenaar aangehaal het, het die Daily News gesê dat “die meeste van die meisies uit gebroke huisgesinne kom. Baie is deur gesinslede gemolesteer.”
Is vigs buite beheer?
Is die wêreldwye verspreiding van vigs nou buite beheer? Dit is moontlik, sê ’n verslag van 1000 bladsye deur die Global Aids Policy Coalition wat by die Harvard-universiteit in die Verenigde State gesetel is. Volgens The Guardian Weekly toon die verslag dat geen nasie die verspreiding van vigs kon stuit nie en dat diegene wat sê die siekte het sy hoogtepunt in Europa bereik, verkeerd kan wees. Die verslag sê: “Die HIV/vigs-pandemie gaan ’n nuwe, gevaarliker fase binne. Terwyl die wêreldwye bedreiging toeneem, is daar baie tekens van toenemende oorgerustheid, hardnekkige ontkenning en hernieude diskriminasie.”
Vrouewerkers word lastig geval
’n Onlangse opname by die Toronto-hospitaal, Toronto, Kanada, het aan die lig gebring dat 70 persent van sy vrouewerkers gekla het dat hulle seksuele teistering by die werk moet verduur. Volgens The Toronto Star vertel 2 persent van die vroue dat hulle seksueel aangerand is, en 1 persent sê dat seks van hulle afgedwing is. Baie van die vroue sê dat hulle “op ’n onrespekvolle en onbehoorlik informele manier aangespreek is”, en ’n groot persentasie “het oor seksgrappe gekla”. Die Star berig dat byna 60 persent van die vrouewerkers “soms onveilig voel in sekere dele van” die hospitaal.
Bybelklasse aan ’n Japannese universiteit
’n Onlangse opname onder studente in die letterkunde-afdeling van Japan se geëerde Waseda-universiteit het aan die lig gebring dat “baie studente gretig is om meer omtrent die klassieke werke en veral die Bybel te leer, wat volgens hulle mening noodsaaklik is vir ’n begrip van buitelandse kulture”, berig The Daily Yomiuri. Die universiteit, wat reeds erkenning op die gebied van die letterkunde verwerf het, het die Bybelklasse met die aanvang van 1993 se lentesemester by sy kursusse gevoeg. Sedert die Onderwysdepartement universiteite twee jaar gelede meer vryheid gegee het om hulle leerplan aan te pas, is dit die eerste geval in Japan waar studente toegelaat is om ’n aandeel in die formulering van ’n skool se leerplan te hê.
Die nadelige uitwerking van draf
Wanneer ’n mens draf, plaas jy die liggaam se gewrigte onder tien keer soveel spanning as wanneer jy fietsry, het ’n studie van die Ortopediese Universiteitskliniek in Berlyn, Duitsland, getoon. Deur van ’n kunsmatige heup gebruik te maak wat spesiaal vir dié doel ontwerp is, kon wetenskaplikes aan die universiteit vir die eerste keer die spanning meet wat gedurende verskillende bedrywighede op onderskeie gewrigte geplaas word. “Hoewel daar oor die algemeen aanvaar is dat drawwers hulle senings en gewrigte aan meer spanning onderwerp as mense wat fietsry,” berig Süddeutsche Zeitung, “is selfs die navorsers verbaas oor hierdie groot verskil.”
Kinderprostitusie floreer in Asië
“Op tien is jy ’n jong volwassene, op twintig is jy ’n ou vrou, op dertig is jy dood.” Dit is, volgens die National Geographic Traveler, ’n algemene gesegde oor die kinderprostitute van Bangkok, Thailand. Daar is ongeveer ’n miljoen kinderprostitute in Asië, en baie van hulle is jonger as tien jaar. Die tydskrif sê toerisme voed hierdie florerende, onwettige bedryf. Baie pedofielorganisasies in Australië, Japan, die Verenigde State en Wes-Europa moedig “sekstoere” na Asiatiese lande aan. The Times van Londen het onlangs berig dat ongeveer 5000 meisies jaarliks uit die berge van Nepal “gewerf” word om in die bordele van Bombaai, Indië, prostitute te wees. Daar is tans ongeveer 200 000 in Bombaai, en omtrent die helfte is besmet met HIV, die virus wat vigs veroorsaak. ’n Hoogs georganiseerde bedryf voer selfs meisies na Wes-Europa en die Verenigde State uit.
Kitsaanbidding
“Waarom moet ’n kerkdiens om 11 vm. begin en ’n uur of langer duur?” Daardie vraag, wat volgens ’n Associated Press-berig in die Times-West Virginian verskyn en onlangs deur ’n Baptistepredikant in Florida, VSA, geopper is, het tot ’n voorspelbare antwoord gelei. Die geestelike bied ’n “Kompakte mini-aanbiddingsdiens van 22 minute” aan wat hom glo tyd sal gee om “’n preek te lewer, gesange te lei, Bybeltekste te lees, te bid en sy gemeente by die deur uit te hê”. Die preek self sal tot agt minute beperk word en sal die predikant in staat stel “om vir die kerk te doen wat [die kitskos-restaurant] McDonald’s vir kos gedoen het”, sê die Associated Press. Maar die berig voeg by dat “genoeg tyd aan kollektes toegestaan sal word”.
Denguekoors word in die kiem gesmoor
’n Studie in Thailand vir die beheer van denguekoors, ’n siekte wat jaarliks omtrent 100 000 mense in daardie land aantas, lyk belowend. Denguekoors self is selde dodelik, maar in Suidoos-Asië veroorsaak dit gewoonlik ’n dodelike siekte onder kinders. Die Aëdes aegypti-muskiet versprei denguekoors. Maar volgens Kanada se Medical Post was programme wat op insekdoders gesteun het om die siekte te stuit, ondoeltreffend, duur en ongewild. Wetenskaplikes by Bangkok se Mahidol-universiteit het onlangs bevind dat die algemeenste en belangrikste broeiplekke vir die muskiet die groot wateropgaarhouers is wat mense by hulle huis hou. Toe ontwerp hulle deksels vir die houers wat styf soos ’n stortmus pas, maar wat tog voorsiening maak dat water in- en uitgetap kan word. Die wetenskaplikes het gevind dat die behoorlike gebruik van die deksels 100 persent doeltreffend was om die siektedraende larwes dood te maak. In dorpies waar die deksels gebruik is, het denguekoorsgevalle van tussen 11 en 22 persent tot 0,4 persent afgeneem.
Verminder oogvermoeidheid
As jy aan oogvermoeidheid ly omdat jy stip na jou televisie- of rekenaarskerm kyk, kan dit verligting bring as jy die skerm eenvoudig laer plaas en dit boontoe laat wys. Hierdie aanbeveling, uit die New England Journal of Medicine, is gegrond op die opvatting dat mense hulle oë minder knip en hulle oë groter oopmaak wanneer hulle horisontaal kyk as wanneer hulle afkyk. Hoe minder die oë geknip word, hoe minder word hulle gesmeer, en die oë se beskermende voglagie verdamp wanneer hulle groter oopgemaak word.
Kerke te koop
Die Rooms-Katolieke Kerk in Italië weet nie presies hoeveel godsdiensgeboue hy besit nie, maar een ding is seker: Hy kan hulle nie almal in stand hou nie. Die aantal verlate kerkgeboue wat stadig verweer, neem daagliks toe. Daarom het Pietro Antonio Garlato, president van die Raad vir die Kultuurerfenis van die Italiaanse Kerk, gesê dat die kerk dit oorweeg om sekere geboue te verkoop wat nie meer vir godsdiensdoeleindes gebruik word nie. Hoeveel kerke sal te koop aangebied word? “’n Ruwe voorlopige skatting”, het die biskop in Il Messaggero verduidelik, “dui op ’n syfer van 10 persent” van die meer as 95 000 kerke in Italië.
Heeltemal te hard
’n Onlangse studie oor klankbesoedeling in Berlyn, Duitsland, het bevind dat baie mense met gevaarlik hoë geraasvlakke saamleef. Die koerant Süddeutsche Zeitung sê dat 40 persent van die stad se woonstelle langs hoofpaaie geleë is “waar dit feitlik altyd te raserig is”. Trouens, gedurende die dag is die geraasvlak in 95 persent van die kamers wat op die strate uitkyk bo die maksimum-toelaatbare 65 desibel. In ’n vyfde van hierdie kamers is die geraasvlak 75 desibel. Nagtelike geraas was ook te hard in bykans al die strate waar die toets gedoen is. Dit is bekend dat hoë geraasvlakke kommunikasie, konsentrasie en intellektuele werkverrigting belemmer.