Ons beskou die wêreld

Deppertoetse toon dat die toetsborde van kitsbanke [OTM’e] in stadsentrums in Engeland met net soveel potensieel gevaarlike bakterieë besmet is as die sitplekke van openbare toilette.—THE TELEGRAPH, BRITTANJE.

“Soms word wetenskaplikes onverhoeds gevang deur aardbewings [soos dié in Nieu-Seeland hierdie jaar en Haïti verlede jaar] omdat dit op onontdekte verskuiwingslyne plaasvind. . . . Dit lei tot ’n kommerwekkende vraag: Hoeveel groot aardbewings skuil nog in verskuiwingslyne waarvan die gevaar onderskat word of in dié wat nog nie ontdek is nie?”—THE NEW YORK TIMES, VSA.

“Die wêreld se vier rykste mense . . . beheer meer rykdom as die wêreld se 57 armste lande.”—FOREIGN POLICY, Januarie/Februarie 2011, VSA.

Die eienaars van 90 persent van Poolse besighede sê dat hulle in die afgelope twee jaar slagoffers van diefstal of bedrog deur werknemers was.—GAZETA PRACA, POLE.

’n Katolieke kerk in Brasilië beboet bruide nou met R2 000 as hulle laat is vir hulle troue. Paartjies moet voor die seremonie ’n tjek uitskryf, en dit word slegs teruggegee as hulle betyds opdaag.—G1, BRASILIË.

Pous nie meer ’n orgaanskenker

Toe Joseph Ratzinger ’n kardinaal in die Rooms-Katolieke Kerk was, was hy ’n orgaanskenker, sê die Italiaanse koerant La Repubblica. Maar sedert Benediktus XVI as pous verkies is, is hy nie meer ’n orgaanskenker nie. Waarom nie? “Die liggaam van ’n pous behoort aan die hele Kerk”, verduidelik aartsbiskop Zygmunt Zimowski, ’n lid van die Vatikaanse hiërargie. “Dit is dus te verstane dat die liggaam van ’n pous in ’n ongeskonde toestand bewaar moet word wanneer hy sterf, aangesien dit moontlik in die toekoms vereer sal word.”

Lewe in ruil vir geld?

Sal mense bereid wees om ’n jaar van hulle lewe te verruil vir ’n miljoen euro? In Duitsland sal meer as 1 uit 4 mans en 1 uit 6 vroue dit doen, sê ’n opname wat namens Reader’s Digest Deutschland deur Emnid, ’n instituut vir meningspeilings, gedoen is. Hoe jonger die mense was wat ondervra is, hoe meer geneig was hulle om so ’n aanbod te aanvaar—29 persent van die 14- tot 29-jariges en 25 persent van diegene tussen 30 en 39 sou die aanbod aanvaar. Maar hoe ouer mense word, hoe kosbaarder is die lewe vir hulle. Slegs 13 persent van die 50- tot 59-jariges en 11 persent van diegene bo 60 sou dit oorweeg om ’n jaar van hulle lewe te verkoop.