Is jou voedsel veilig?

“Duitsland sluit skool weens gevalle van E. Coli.”—DIE REUTERS-NUUSDIENS, DUITSLAND.

“Uitbreking van salmonella in vyf state met spruite verbind.”—USA TODAY.

“Beeste radioaktiewe strooi gevoer; vleis van 6 bereik 9 prefekture.”—THE MAINICHI DAILY NEWS, JAPAN.

DIE bogenoemde nuusopskrifte het verlede jaar binne ’n tydperk van twee weke verskyn. Navorsers skat dat ongeveer 30 persent van die mense in ontwikkelde lande elke jaar voedselverwante siektes opdoen.

Hoe raak sulke berigte jou? “Ek raak bekommerd en selfs kwaad”, erken Hoi, ’n vader in Hongkong. “Ek het twee kinders, en ek is besorg oor hoe en waar hulle voedsel geproduseer word.”

In armer lande sterf daar elke jaar miljoene mense—meestal kinders—weens voedsel- en waterverwante siektes. “By die plaaslike markte is voedselprodukte blootgestel aan vlieë, reën, wind en stof”, sê Bola, wat in Nigerië woon. “Ek word bang wanneer ek lees of hoor van voedselverwante siektes. Ek wil my gesin beskerm.”

Is dit moontlik om jou gesin teen onveilige voedsel te beskerm? Die Kanadese Voedselinspeksie-agentskap sê: “As onveilige voedsel op winkelrakke beland, maak dit groot opslae in die nuus. En heel tereg. Maar onveilige voedsel, wat tot voedselverwante siektes kan lei, kan ook die gevolg wees van wat ons in ons eie kombuis doen—of nie doen nie.”

Wat kan jy doen om jou gesin teen voedselverwante siektes te beskerm? Ons sal na vier maniere kyk waarop jy jou voedsel veiliger kan maak.

[Venster op bladsy 3]

WIE IS VATBAAR?

Party mense is besonder vatbaar vir voedselverwante siektes, byvoorbeeld:

● Kinders onder die ouderdom van vyf

● Swanger vroue

● Mense oor die ouderdom van 70

● Mense met ’n swak immuunstelsel

As jy of iemand wat maaltye saam met jou eet, in een van hierdie kategorieë val, moet jy noukeurig let op die voedsel wat jy voorberei, bedien en eet.

[Erkenning]

Bron: Voedselowerheid van Nieu-Suid-Wallis, Australië.